Mateo 6

Jwibadönö iyawa jawa Jesús yöawina wene

1Tupakwö yöawinobe Jesúsma:

—Chömöledö, ökwödö otiwanö ja̧köbaduwenama, sule jojodöda tjedo jö̧ba̧löma ja̧bökönaduwi. Jau chömöledö, jojodöda ökwödönö ösödö tjedobö ja̧köbaduwiökwe, mölejȩbe jo̧ Kwabe'doduwima otiwanö ja̧köbaduwaja̧ mikwa baibanöma iyökakobe, ida̧ökö jojodötjö ja̧tjaja̧ mikwa baibanö emajadö jö̧ba̧lö.

2Jo̧kwajabetjö̧, jwibadönö kwiyaduwenama, sulabenö dötölajatanö omukwatadö ja̧tji̧danöma ja̧köbaduwa. Jobadöma jwibadönö tjiyakwa̧ abönö, tjiyakwa̧ yöbawadö, judío jojodö ba̧nö tja̧ja̧kwa̧lakwawejubiyatjöbi, comunidad ö'wejetjöbi, okobe deinö tjiyi̧ edö, Aaa, bidöma otiwanö jwibadönö iyö pjabatadö, jö̧ba̧lö tjomukwatobö. Isabenö yötawaduwakwö chömöledö: Tjiyaja̧ mikwa baibanöma iyökakwo̧ Diosma, otiwanö iyadöja jö̧ba̧löma, ida̧ökö okobe jwiinö tjiyaja̧ mikwa tjeminobetjö̧. 3Ökwödö jwibadönö kwiyaduwenama, ju'wedö wajwitjonö kwiyaduwo, bakwo̧bi kwiyi̧ edapji jö̧ba̧lö. 4Jau chömöledö, jojodö wajwitjonö kwiyaduwo. Ja̧danö baikwö yötawa: Ju'wedö wajwitji̧ jawa edo̧ Kwabe'doduwida kwiyaja̧ mikwa baibanö ökwödönö otiwanö iyakwo̧—

jö̧ba̧lö yöawinobe Jesúsma.

Diosnö aekwa jawa Jesús yöawina wene

5Tupakwö yöawinobe Jesúsma:

—Ja̧danö, Diosnö akebaduwenama, jobadö dötölatajanö omukwatadö atjebi̧danöma akebaduwa. Jobadöma tjösödobe, judío jojodö ba̧nö tja̧ja̧kwa̧lakwawejubiyatjö jamatö labinö Diosnö atjebobö, ja̧danö ba̧jekwadö jojodö kwetjachemi ö'öbönö ja̧nö, labinö Diosnö atjebobö, böjȩ jojodö Diosnö atjebi̧ tjedobö. Isabenö yötawaduwakwö chömöledö: Atjebaja̧ mikwa baibanöma iyökakwo̧ Diosma otiwanö abebadöja jö̧ba̧löma, ida̧ökö okobe jwiinö atjebaja̧ mikwa tjeminobetjö̧. 6Jau chömöledö, ökwödö Diosnö akebaduwenama, isȩko̧ okwa tebachö, apjude tumatö, jojodö wajwitjonö Kwabe'doduwinö akebaduwo. Ja̧danö, jejenö akebaduwiökwe, jojodö tjedökö jawa edo̧ Kwabe'doduwima, akebaduwaja̧ mikwa baibanö pjaatakobe.

7Ja̧danö, Diosnö akebaduwenama, Diosnö ösödöködö tjösödawö̧nö atjebi̧danöma abebökönaduwi. Jobadöma sule yöa̧lakwawa ko̧ko̧da̧lö atjebobedanö ichejekwa, Aaa, nöinö ja̧danö lekwe atebitjö̧ma, chuluwo̧ a̧ja̧kwena jö̧ba̧lö. 8Jobadö atjebi̧danöma abebökönaduwi chömöledö. Kwabe'doduwima isabenö ökwödönö a̧ja̧kwo̧, ja̧danö akebaduwakwa̧ abönö ida̧ökö jwiköbaduwi̧ waiso̧. 9Jo̧kwajabetjö̧, Diosnö akebaduwenama, baikwö akebaduwo chömöledö:

Mölejȩbe jo̧ Dabe'do, jojodö otiwanö ökwönö tjomukwatobö dösöda, Diosma isabenö suli̧ jwibo̧ jö̧ba̧lö. 10Ja̧danö ju'wibi la'aka luwo̧ kwö̧jakwa̧ möle juluwanö baibobö dösöda. Mölejȩbe ju̧kwadö jwaikwöda kwösödi̧danö ja̧bö tjö̧ji̧danö, böjȩnö ju̧kwadönöbi kwösödi̧danö ja̧bö tjö̧jobö dösöda. 11Ja̧danö, ju'wibi, mölekwena du̧kwa kwakwawa kwiyobö adeba Dabe'do. 12Ja̧danö, ökwödönö sulabenö ja̧bajadö sulabenö ja̧tjaja̧ omukwatökönö, jobadönö dösödi̧danö, sulabenö ja̧daja̧ omukwatökönö kwösödo ökwödönö. 13Ja̧danö, sulabenö ja̧dakwojobö jö̧ba̧lö ja̧i̧ jawa döbaledenama, dujuluwachibanö pjabati, sulabenö ja̧dapji jö̧ba̧lö. Ja̧danö inesö sulabo̧ ujulutjö dö̧jibinö pjabati, Dabe'do

jö̧ba̧lö akebaduwo Kwabe'doduwi Diosnöma—

jö̧ba̧lö yöawinobe Jesúsma.

14Tupakwö yöawinobe Jesúsma:

—Jau chömöledö, jojodö ökwödönö sulabenö ja̧tjaja̧ omukwatökönö jobadönö kwösödaduwitjö̧ma, mölejȩbe jo̧ Kwabe'doduwima ökwödö sulabenö ja̧köbaduwaja̧ omukwatökönö ökwödönöbi ösödakobe. 15Jo̧kwaijayonö, ju'wedö sulabenö ja̧tjaja̧ junibökönö kwö̧jaduwitjö̧ma, Kwabe'doduwibi ökwödö sulabenö ja̧köbaduwaja̧ ujunibökakobe—

jö̧ba̧lö yöawinobe Jesúsma.

16Tupakwö yöawinobe Jesúsma:

—Ja̧danö, Diosnö omukwatö kwökönö ö̧tö̧chö kwö̧jaduwenama, dötölatajanö omukwatadö ja̧tji̧danöma ja̧köbaduwa. Jobadöma o̧'wo̧ tjo̧achö tjöba dichawökönö, kamijido̧ sulabado̧ 'dutjawobe, okobe deinö edadö ö̧tö̧chö tjö̧ji̧ edö, Aaa, bidöma otiwanö Diosnö omukwatö ö̧tö̧chö ju̧kwadö, jö̧ba̧lö tjomukwatakobetjö̧. Isabenö yötawaduwakwö chömöledö: Jobadöma ida̧ökö okobe jwiinö ö̧tö̧chö tjö̧ji̧ mikwa emajadö jojodötjö chömöledö, Diosma jobadönö iyökakobe. 17Jau chömöledö, jobadö ja̧tji̧danöma ja̧köbaduwa. Ökwödö Diosnö omukwatö ö̧tö̧chö kwö̧jaduwenama, kwöwö'ye so̧bekwö, kwöba dichawö ja̧köbaduwo. 18Jejenö ja̧köbaduwiawö̧, edadöma wajwitjena ö̧tö̧chö kwö̧jaduwi̧ma. Sule Kwabe'doduwi, jojodö tjedokonö ja̧köbaduwi̧ waiso̧ Kwabe'doduwima ö̧tö̧chö kwö̧jaduwi̧ öwaisakobe. Ja̧danö, Kwabe'doduwi okobe jwiinö edo̧ma, jo̧bada mikwa baibanö ökwödönö iyakobe—

jö̧ba̧lö yöawinobe Jesúsma.

Mölejȩbe nöinö mikwawi̧ jawa Jesús yöawina wene

19Tupakwö yöawinobe Jesúsma:

—Chömöledö, nöinö mikwawi̧ jawa ko̧ko̧dö junökönaduwi böjȩtjöma. Jau chömöledö, böjȩtjöma, pjȩlȩbö̧ma nöinö mikwawi̧ jawa suli̧ tjöwaedobe, ja̧danö duwetjekwachö suli̧ waekwobe nöinö mikwawi̧ jawama, ja̧danö naukwabidö sobö tebachö tjönaukwobe. 20Ökwödöma mölejȩbetjöda ko̧ko̧dö kwujunaduwo nöinö mikwawi̧ jawama chömöledö. Jobetjöma pjȩlȩbö̧ma suli̧ tjöwaedökakobe, ja̧danö duwetjekwachöma suli̧ waekwökakobe, ja̧danö naukwabidöma sobö tjönaukwökakobe. 21Jau chömöledö, nöinö mikwawi̧ jawa böjȩtjö juna̧ladöma, jwaikwöda böjȩ jawada omukwatadö, ja̧danö mölejȩbetjö nöinö mikwawi̧ jawa juna̧ladöma, jwaikwöda mölejȩbe jawada omukwatadö, ¿jö̧tö? Jo̧kwajabetjö̧ mölejȩbetjöda ko̧ko̧dö kwujunaduwo nöinö mikwawi̧ jawama, jobe jawada omukwatö kwuju̧kwaduwakobetjö̧—

jö̧ba̧lö yöawinobe.

Tjöbajalema dejewa'yu̧danö ji̧, jö̧ba̧lö Jesús wanedö yöawina wene

22Tupakwö yöawinobe Jesúsma:

—Chömöledö, wanedö yötawa, kwöbajaleduwima, kwiteba'o jawatjö dejewa'yu̧danö ichejekwa. Baikwö labebö lobö yötawa chömöledö: Kwöbajaleduwinö otiwanö kwedaduwitjö̧ma, okobe jwiinö kwiteba'oduwi dewinö jo̧bedanö ichejekwa, 23jo̧kwaijayonö, kwöbajaleduwi sulitjö̧ma, okobe jwiinö kwiteba'oduwima yȩa'wo okwa jo̧bedanö ichejekwa, ¿jö̧tö? Ja̧danö chömöledö, Aaa, otiwanö edadösa jö̧ba̧lö kwomukwataduwijayonö sulabenö kwedaduwitjö̧ma, yȩa'wo okwa kwö̧jaduwi̧ma isabenö jwiinö yȩobe—

jö̧ba̧lö yöawinobe.

Du̧ju̧taja tjömöayedö kwö̧jaduwobö jwiobe, jö̧ba̧lö Jesús yöawina wene

24Tupakwö yöawinobe Jesúsma:

—Chömöledö, du̧ju̧taja tjömöayedö kwö̧jaduwoböma jwiobe. Du̧ju̧taja tjömöayedö kwö̧jaduwitjö̧ma, kwuluwo̧ bakwo̧nö kwösödaduwonö, jelo̧nö kwöpöjödaduwena, ja̧danö bakwo̧ wei̧ ja̧bö kwö̧jaduwonö, jelo̧nö kwöpöjödaduwena, mikwawö̧kö̧ jö̧ba̧lö. Jau chömöledö, jwaikwöda balada kwemaduwotö jö̧ba̧lö kwisakwaduwitjö̧ma, balada kwemobö kwösödi̧ ömöayedödanö kwö̧jaduwena. Ja̧danö, balada kwemobö kwösödi̧ ömöayedöbi, Dios ömöayedöbi kwö̧jaduwoböma jwiobe. Jau chömöledö, balada kwemaduwotö jö̧ba̧lö isakwö kwö̧jaduwitjö̧ma, Dios wei̧ ja̧bö kwö̧jaduwi̧ma waekwakobe.

25Jo̧kwajabetjö̧ baikwö yötawaduwakwö chömöledö: Böjȩnö kwö̧jaduwi̧ jawama omukwatö kwö̧jaduwoko, Aaa, ¿taji dukwakwa̧jö?, ¿taji dowakwa̧jö?, ¿taji 'dudawakwa̧jö? jö̧ba̧löma. Jau chömöledö, ja̧kwawa mikwawi̧ma, sule kwakwawadamaökö, ja̧danö sule kwiteba'oduwinö 'duawakwawadamaökö, ¿jö̧tö? Jo̧kwajabetjö̧ ja̧ jawa omukwatö kwö̧jaduwoko chömöledö. 26Pji̧yu̧nö omukwatö edaduwi chömöledö. Jobadöma ¿batjo lödö, ja̧danö wa̧ji̧ emö tjotidobeji̧? Jobadöma ¿kwakwawa ko̧ko̧dö, kwakwawasejunö tjujunobeji̧? Jejenöma otidöködö chömöledö, Kwabe'doduwima jobadönö kwakwawa iyö ite'ada̧lobetjö̧. Ja̧danö chömöledö, Dios edemi ökwödöma jobadö pji̧yu̧nötjö bajalekwönönö mikwawadöja, jo̧kwajabetjö̧ jobadönö ite'ada̧litjö̧ma, ökwödönöbi ite'ada̧lakwo̧ chömöledö. 27Ja̧danö chömöledö, Aaa, dakwö ja̧bö lekwe chö̧jakwa̧jö, jö̧ba̧lö kwomukwataduwi̧ma, ¿ajayitjö bajalekwönönö lekwe kwö̧jaduwobö pjaatenaji̧? Pjaatokobe chömöledö.

28Ja̧danö, ¿tajawedö kamijido̧ jawa kwomukwataduwobö chömöledö? Mejetjö o̧bubiya kwomukwataduwo chömöledö. Otiwa, ¿jö̧tö? Jejenö otiwi̧ma, ¿'diinö otidajabetjö otiwobeji̧? ¿Kamijido̧ otiwado̧ 'dö̧ajabetjö otiwobeji̧? 29Otidokobe chömöledö. Jo̧kwaijayonö otiwanö 'duawobedanö ichejekwa o̧bubiyama, ¿jö̧tö? Jau chömöledö, damötjö ji̧na la'aka luwo̧bina Salomónmine inesö otiwanö 'duawi̧tjö bajalekwönönö otiwanö 'duawobedanö ichejekwa mejetjö o̧bubiyama. 30Jau chömöledö, ja̧ o̧bubiyama, babe ji̧jayonö, itekwayi juwö lotjakwa̧, lekwökö ji̧ o̧bubiyama. Ja̧danö, ja̧ lekwökö ji̧ o̧bubiya Dios otiwanö ite'ada̧litjöma, ökwödönöbi ite'ada̧lökenaji̧? Isabenö otiwanö ökwödönöbi pjabatö te'ada̧lo̧ chömöledö. Jau chömöledö, Diosma otiwanö pjabatö chite'ada̧lakwo̧sa, jö̧ba̧lö yöbawö ujuninobe, jo̧kwaijayonö ina dö̧ji̧ jawa dakwö ja̧dakwa̧jö jö̧ba̧lö omukwatadöja chömöledö. Ja̧danö, jejenö omukwatö kwi̧sebaduwobe, ina Dios chite'ada̧lakwo̧sa, jö̧ba̧lö yöawi̧ omukwatökönö kwö̧jaduwi̧ma.

31Jo̧kwajabetjö̧, ja̧ jawa kwomukwataduwoko chömöledö, Aaa, taji dukwakwa̧jö jö̧ba̧lö, ja̧danö taji dowakwa̧jö jö̧ba̧lö, ja̧danö taji 'dudawakwa̧jö jö̧ba̧lö. 32Jau chömöledö, ¿tajawedö ja̧ jawa omukwatö kwo̧'wo̧ tjo̧kekwaduwobö? Kwabe'doma ¿ökwödönö wajwienaji̧, ja̧ jawa tjujuna̧lobö jo̧be jö̧ba̧löma? Böjȩ bakwameachibanö jojodöma ja̧ jawa isakwadö chömöledö. Ja̧danö Kwabe'doduwima isabenö ökwödönö waiso̧, ju'wedö ja̧ jawa tjujuna̧lobö ji̧danö, chi̧tji̧mubi ja̧ jawa tjujuna̧lobö jo̧be jö̧ba̧lö. 33Jo̧kwajabetjö̧ ja̧ jawa omukwatökönö kwö̧jaduwo chömöledö. Ja̧ jawa omukwatökönö jwaikwöda Dios la'aka luwo̧ ö̧jakwa̧ jawada isakwö kwö̧jaduwo. Ja̧danö chömöledö, jwaikwöda Dios la'aka luwo̧ ö̧jakwa̧ jawa isakwö kwö̧jaduwiökwe, Kwabe'doma isabenö ökwödönö ite'ada̧lakobe. Jau chömöledö, kwakwawabi, owawabi, 'dukawaduwakwa̧bi jo̧bada ökwödönö te'ada̧lö iyakobe.

34Jo̧kwajabetjö̧ itekwayi jawa omukwatöma kwö̧jaduwoko chömöledö, dakwö ja̧dakwa̧jö jö̧ba̧löma. Jau chömöledö, itekwayi möleda ja̧ möle jawa kwomukwataduwena, ja̧danö ju'wi möle jwiinö, iya̧da möle jawada kwomukwataduwobö jo̧be, ju'wi möle jawa omukwatökönö—

jö̧ba̧lö yöawinobe Jesúsma.

Currently Selected:

Mateo 6: WPC

Highlight

Copy