Mateo 7

Ju'wedönö sulabedö jö̧ba̧lö yöba̧lökönaduwi, jö̧ba̧lö Jesús yöawina wene

1Tupakwö yöawinobe Jesúsma:

—Chömöledö, jojodönö bidöma sulabedö jö̧ba̧löma lȩkebaduwa, Diosma ökwödönöbi sulabedö jö̧ba̧lö lȩebapji jö̧ba̧lö. 2Jau chömöledö, ökwödö jojodönö lȩkebaduwi̧danö, ökwödönöbi lȩebakwo̧ Diosma, ja̧danö ökwödö jojojodönö, Aaa, biya̧ ja̧tjobetjö̧ sulabedö, jö̧ba̧lö badedö kwomukwataduwi̧danö, Diosma ökwödönö omukwatö edakobe, sulabedö kwö̧jaduwojobö jö̧ba̧lö.

3Jau chömöledö, ökwödöma kwömöledöduwi wene tjujuna̧li̧ omukwatadöja, ¿jö̧tö? ¿Tajawedö kwömöledöduwi wene tjujuna̧li̧ kwomukwataduwijayonö, ökwödöda wene kwujuna̧laduwi̧ma kwomukwataduwokobeda? ¿Tajawedö ju'wedönö jwekebaduwijayonö, ökwödöda ja̧bö kwö̧jaduwi̧ma jwekekwaduwokobeda? Baikwö wanedö yötawa: Ökwödöma kwömöledöso̧ öbajaletjö iso̧pja̧ ja'yuwo̧pja̧ edadöja, jo̧kwaijayonö ja̧ kwedaduwijayonö, ökwöda kwöbajaletjö towisöte nööte edöködöja. 4Jejenö ösöte kwöbajalenö a̧jijayonö, kwömöledöso̧nö yöba̧ladöja: Kwöbajaletjö iso̧pja̧ loköbobö pjatato, jö̧ba̧lö. Jejenö ösöte ina kwöbajalenö a̧jonö, ¿dakwö otiwanö edö kwömöledöso̧nö pjakatobö? 5Jejenö ja̧bo̧ dötölatajanö omukwato̧nö baikwö yötawa: Abönö ökwöda kwöbajaletjö towisöte emö loköbo. Ikenama lobajo̧, otiwanö kwedena, kwömöledöso̧ öbajaletjö i̧so̧pja emö loköbobö—

jö̧ba̧lö wanedö yöawinobe Jesúsma.

6Tupakwö yöawinobe Jesúsma:

—Chömöledö, Dios jawama, Diosnö öpöjödadönö iyökönaduwi, tjöpöjödobetjö̧. Baikwö wanedö yötawa: Inesö otiwi̧ jawa a̧wi̧li̧dönö iyökönaduwi, jobadönö kwiyaduwitjö̧ma tjösödökakwedö, ja̧danö jalachibö ökwödönö metjibakwedö. Ja̧danö, nöinö mikwawi̧ önebiya perla ötjabi̧ önebiyama, ku̧si̧dönö iyökönaduwi, Aaa, nöinö mikwawi̧ jö̧ba̧löma tjomukwatökakobetjö̧, sule kwiyaja̧ma ja̧tö lotjakobe—

jö̧ba̧lö yöawinobe Jesúsma.

Diosnö aekwa jawa Jesús yöawina wene

7Tupakwö yöawinobe Jesúsma:

—Diosnö akebaduwitjö̧ma, ökwödönö iyakwo̧, ja̧danö kwisakwaduwitjö̧ma, kwisakwaduwi̧ kwöbadekwajaduwakobe, ja̧danö tekachaduwobö akebaduwitjö̧ma, apjude po̧ekwakobe. 8Jau chömöledö, okobe deinö abebadö atjebiökwe iyo̧ Diosma, ja̧danö okobe deinö isakwadöma badekwajadö, ja̧danö okobe deinö tetjachobö abebadönöma, apjudema po̧ekwakobe. Jau chömöledö, Kwabe'doduwima otiwanö ökwödönö te'ada̧lo̧. 9Baikwö wanedö yötawa: Ökwödö tjabe'dodöma, ¿suli̧ jawa kwi̧tji̧muduwinö kwiyaduwenaji̧? Kwitji̧ panpja̧ aebitjö̧ma, ¿inawa ukwobö kwiyaduwenaji̧? 10Kwitji̧ ökwönö ba̧i̧ ukwobö aebitjö̧ma, ¿jo̧banö nibo̧ a̧ko'danö kwiyaduwenaji̧? Kwiyaduwökena, ¿jö̧tö? 11Jau chömöledö, ökwödöma sulabedököbaduwijayonö, kwi̧tji̧muduwinö otiwanö te'ada̧lö iyadöja. Ja̧danö, ökwödö sulabedöma kwi̧tji̧muduwinö otiwanö kwiyaduwitjö̧ma, ¿mölejȩbe jo̧ Kwabe'doduwima ja̧tjö o̧penönö jo̧banö abebadönö otiwa jawa iyökenaji̧? Iyo̧ chömöledö—

jö̧ba̧lö yöawinobe Jesúsma.

Ju'wedönö otiwanö ja̧bö kwö̧jaduwo, jö̧ba̧lö Jesús yöawina wene

12Tupakwö yöawinobe Jesúsma:

—Chömöledö, kwöwaisaduwa ju'wedö ökwödönö otiwanö ja̧tjobö kwösödaduwi̧ma, baikwö ötjönö ja̧tjobö chösöda, baikwö ötjönö ja̧tjobö chöpöjöda jö̧ba̧lö, ¿jö̧tö? Baikwö wetaduwakwö chömöledö: Ja̧ baikwö chösödo jö̧ta̧lena jö̧ba̧lö kwöwaisaduwi̧danö ju'wedönö ja̧bö kwö̧jaduwo. Jobekwö laebobe Moisés iwȩyudinabi, ju'wedö Dios yöawi̧ yöbawadö tjiwȩyudinabi—

jö̧ba̧lö yöawinobe Jesúsma.

Dios la'aka luwo̧ ö̧jakwa̧ teachakwawa jawa Jesús yöawina wene

13Tupakwö yöawinobe Jesúsma:

—Chömöledö, baikwö wanedö yötawa: Apjude bakwadeda jo̧be, ja̧kwawa manasadema, ja̧danö jadema ja'yuwade. Jelede apjudema, jalade, ja̧danö jade manama waiyökö, ja̧danö ba̧jekwadö jojodöma ja̧manö kwebachadö. Jo̧kwaijayonö ja̧ manama, ökwöla nöolabe 'ya̧kwawama. 14Jau chömöledö, ja̧kwawa jawasade apjudema, ja'yuwade, ja̧danö ja̧kwawa manama, wayama, ja̧danö ja'yubeda jojodö jade apjude badekwajadö. Jade ja'yuwadenöda tekachaduwo chömöledö—

jö̧ba̧lö wanedö yöawinobe Jesúsma.

Towinö wa̧ji̧ jawa Jesús wanedö yöawina wene

15Tupakwö yöawinobe Jesúsma:

—Chömöledö, ö'wiakwawönö edö kwö̧jaduwo sulabenö yöbawadönö. Jobadöma, Dios yöawi̧ yöbawadösa, jö̧ba̧lö yötja̧lijayonö, omöna yöba̧ladö. Ja̧danö wanedö yötawa: O̧bȩja̧dödanö ichejekwadö tjichejekwijayonö, o̧bȩja̧döböködö. Labidö. Tebo a̧wi̧li̧dödanöbedö chömöledö. 16Baikwö kwöwaisaduwakwedöja jobadönö chömöledö: Ja̧tji̧ edö kwöwaisaduwakobe jobadönö. Baikwö wanedö yötawa: Na̧i̧ma, ¿sȩowi towitjö 'dötjobeji̧? Higos ötjabi̧ wa̧ji̧ma, ¿sȩötjetjö 'dötjobeji̧? Kwöwaisaduwa chömöledö, na̧i̧ma, sule na̧i̧nutjöda 'dötjobe, ja̧danö higosma, sule higos towitjöda 'dötjobe, ¿jö̧tö? 17Jau chömöledö, otiwowinö wa̧ji̧ma otiwa jawa wa̧jowi, jo̧kwaijayonö sulabowinö wa̧ji̧ma, suli̧ jawa wa̧jowi, ¿jö̧tö? 18Otiwowima, suli̧ jawa wa̧jobö jwiowi, ja̧danö sulabowima, otiwa jawa wa̧jobö jwiowi, ¿jö̧tö? 19-20Jau chömöledö, sulabenö yöbawadöbi ja̧danö. Towinö wa̧ji̧ jawa edö kwöwaisaduwi̧danö, jobadö ja̧tji̧ edö kwöwaisaduwakobe jobadönö, otiwanö yöbawadö tjö̧jojobö, sulabenö yöbawadö tjö̧jojobö jö̧ba̧lö. Ja̧danö, sulabenö yöbawadönö isabenö lȩekwa ja̧kobe, baikwö wanedö yötawa: Okobe jwiinö suli̧ jawa wa̧ji̧owibiyama, jubö lobö tjujuwakwa̧owibiya—

jö̧ba̧lö wanedö yöawinobe Jesúsma.

Ju'wedöma, chuluwo̧ja jö̧ba̧lö ötjönö yötja̧lijayonö, chömöayedöböködö, jö̧ba̧lö Jesús yöawina wene

21Tupakwö yöawinobe Jesúsma:

—Chömöledö, ju'wedöma ötjönö Duluwo̧ jö̧ba̧lö ötjabijayonö, chömöayedöböködö, ja̧danö ötjönö Duluwo̧ jö̧ba̧lö ötjabijayonö, mölejȩbe jo̧ Dios la'aka luwo̧ ö̧jakwa̧ tetjachökakwedö. Jau chömöledö, sule mölejȩbe jo̧ Chabe'do ösödi̧danö ja̧badöda jobe tetjachakwedö. 22Inesö jojodönö lȩebakwa̧ möle baibenama, ba̧jekwadö ötjönö yötja̧lakwedö: Duluwo̧, isabenö kwömöayedösa. Ökwö kwiminö Dios yöawi̧ yödawijatö, ja̧danö ökwö kwiminö tjo̧'wo̧ luwo̧nö sulabedönö a'dewö lodijatö, ja̧danö jojodö edajitjökö ujulu jawa kwiminö di̧sebijatö, jö̧ba̧lö yötja̧lakobe. 23Jejenö yötja̧lijayonö, baikwö chatadakwo̧sa jobadönö: Chö̧jelö döbibajaduwi, la'akatjöda wajwitawö̧ja ökwödö sulabenö ja̧badönöma, jö̧ba̧lö chatadakwo̧sa—

jö̧ba̧lö yöawinobe Jesúsma.

O̧do otidadönö Jesús wanedö yöawina wene

24Tupakwö yöawinobe Jesúsma:

—Jau chömöledö, yötawi̧ a̧ja̧kwö ja̧badöma isabenö waisanö omukwatadö. Baikwö wanedö yötawa: 'Diena, inawaena o̧do otido̧danö tjichejekwobe. 25Jejenö 'diena otido̧ma, 'dieju juna̧lo̧. Ja̧danö, nöinö ojwiyo o̧ba̧lijayonö, ja̧danö ojwe okwatibijayonö, ja̧danö jwa̧lȩ'epjo labinö jwa̧le'ewijayonö, 'diinö jȩju ujuna̧lena, 'diena otidinobetjö̧. 26Jo̧kwaijayonö yötawi̧ a̧ja̧kwö, yötawi̧danö ja̧böködöma, waisanö omukwatöködö. Baikwö wanedö yötawa: Jobadöma waisanö omukwatö̧kö̧ o̧do otido̧danö tjichejekwobe. Jo̧ba waisanö omukwatö̧kö̧ o̧do otido̧ma, so̧biyapuena o̧do otido̧. Ja̧danö, ajayinö otiweju ichejekwijayonö, 27ojwiyo nöinö o̧ba̧lena, ja̧danö ojwe okwatena, ja̧danö jwa̧lȩ'epjo labinö jwa̧le'ewenama, meeju, isabenö okobe jwiinö meeju jwiinö baibanö—

jö̧ba̧lö yöawinobe Jesúsma.

28Ja̧ jawa Jesús yöbawö kaatenama, jo̧banö a̧ja̧kwö ko̧ko̧kwadöma tjöbajale jalaka baibanö tjomukwatinobe, Ayö, bitema ¿dakwö yöbawo̧jö? jö̧ba̧lö. 29Moisés iwȩyudina jawa ba̧ja̧dadö tjöba̧ja̧di̧danö öba̧ja̧dököwö̧, jejenö tjomukwatinobe, Jesúsma isabenö luwo̧ yöawi̧danö yöawobetjö̧.

Currently Selected:

Mateo 7: WPC

Highlight

Copy