Mateo 8

I̧sȩdo̧ sulabo̧nö Jesús otidö loina wene

1Jesúsma mö'ösa'obetjö yutuajenama, ba̧jekwadö jojodö jo̧ba ökömanö lutja̧linobe. 2Ja̧danö, bakwo̧ i̧sȩdo̧ sulabo̧ma ichö, Jesús öba a'o bȩbachibö aebinobe:

—Chuluwo̧, kwösöditjö̧ma, chi̧sȩdo̧ suli̧ waekwi̧ otiwanö baibobö pjakatena—

jö̧ba̧lö. 3Jejenö aebökwe, Jesúsma ömamu debatö jo̧banö mabö yöa̧linobe:

—Jau, chösöda. Kwi̧sȩdo̧ otiwo̧ babibi—

jö̧ba̧lö. Jejenö Jesús yöa̧lenama, i̧sȩdo̧ sulaja̧ma, jwiinö baibinobe. 4Ikenama, Jesús weinobe otidö loajökwenö:

—Jojodönö yöbawökönuwi ökwönö pjatataja̧ma. Ju'wedönö yöbawökönö, Diostjö jojodötjö ö'weje pjabato̧ ö̧jobekwö da̧ji, kwi̧sȩdo̧ otiwi̧ edo jö̧ba̧lö. Ikenama, tji̧sȩdo̧ sulabedötjö otiwanö babibajadö tjiyobö Moisés weinadanö, Diosnö iyawa kwiyo, okobe deinö otiwanö bakibaja̧ tjöwaiso jö̧ba̧lö—

weinobe Jesúsma.

Roma jojodö tjuluwo̧ guardiaso̧ Jesús yöawi̧ ösödina wene

5Jesús Capernaúm nijibe ȩwa̧jenama, Roma jojodötjö guardia luwo̧, cienbedö guardia jojodö tjuluwo̧ma, Jesús öba a'o ichibö jo̧banö aebinobe:

6—Chuluwo̧, chömöayo̧ma chejubetjö nöinö ö'wöchobe. Kamapjonöda 'dö̧bachö usula emawö bo̧. ¿Pjakatakwa̧ji̧?—

jö̧ba̧lö aebinobe. 7Jejenö aebökwe, Jesúsma atadinobe:

—Jau, kwejube chichocha, jo̧ba ö'wöchi̧ otidö lobö—

jö̧ba̧lö. 8Jo̧kwaijayonö, jejenö atadökwe guardia luwo̧ma atadinobe:

—Ja̧maökö chuluwo̧. Ichökönuwi. Mikwawö̧kö̧sa, chejube tekachoböma. Belöda weköbitjö̧ma, otiwanö baibakwo̧ chömöayo̧ma. 9Jau Jesús, chöwaisa ödötjö chömöayo̧ otiwanö baibobö weköbitjö̧ma, ödötjö weköbijayonö, isabenö otiwanö baibakwo̧ chömöayo̧ma. Jau Jesús, ötjöbi chuluwedö tjömöayo̧ chö̧jobetjö̧, ja̧danö ötjöbi chömöayedö guardia jojodö tjuluwo̧ chö̧jobetjö̧ chöwaisa, weköbi̧ma isabenö juluwobe, ja̧danö ödötjö weköbitjö̧bi weköbi̧danö baibakobe jö̧ba̧lö. Ötjöma guardia jojonö chömöayo̧nö, 'ya̧wi, jö̧ba̧lö wetitjö̧ma, 'yo̧, ja̧danö, ichi, jö̧ba̧lö wetitjö̧ma, icho̧, ja̧danö midö cheminökwenö chömöayo̧nö, baikwö otidi, jö̧ba̧lö wetitjö̧ma, weti̧danö otido̧. Ja̧danö chöwaisa, ötjö mikwawö̧kö̧ chömöayedönö wetenama weti̧danö baleditjö̧ma, ökwö weköbi̧danö isabenö baledena, ötjötjö bajalekwönönö isabenö la'aka luwo̧köbobetjö̧. Jo̧kwajabetjö̧ ödötjö chömöayo̧ otiwanö baibobö weköbitjö̧ma, ödötjö weköbijayonö isabenö weköbi̧danö baledakobe. Chömöayo̧ isabenö otiwanö ö̧bibakobe—

jö̧ba̧lö atadinobe. 10Jejenö yöa̧liökwe, Jesúsma jo̧bakwö ichajadönö yöawinobe:

—Ayö, bitema Israel jojobö̧kö̧jayonö isabenö otiwanö chujulu ösödo̧. Okobe jwiinö Israel niji ju̧kwadötjö bakwo̧bi bite chujulu ösödi̧danö ösödo̧nö chöbadekwajokobe. Bitema isabenö otiwanö omukwato̧. 11Isabenö yötawaduwakwö, Mölejȩbe jo̧ Dios la'aka luwo̧ ba̧nö weenama, ba̧jekwadö Israel jojodöböködö jelobetjö ichajadöma ichö mesasötenö tjöbamatakobe Abrahamkwö, Isaackwö, Jacobkwö. 12Jo̧kwaijayonö jobadö jelobetjö ichajadö mesasötenö tjöbamatijayonö, jobe tjöbamato jö̧ba̧linadö Israel jojodötjöma ba̧jekwadönö 'da̧batö loakobe Diosma, yȩa'wo okwa ba̧nö budekwabinö tjo'ye kikiso ja̧bö usula tjemawobö—

jö̧ba̧lö yöawinobe Jesúsma. 13Jemi ikenama Jesúsma guardia luwo̧nö yöawinobe,

—Kwejube da̧ji. Yötawi̧ kwösödobetjö̧, akebaja̧danö baibajabe, kwömöayo̧ma ö̧bibajabe—

jö̧ba̧lö yöawinobe. Ja̧danö, Jesús yöawaja̧danö, iya̧da horada jo̧ba ömöayo̧ma otiwanö baibinobe.

Jesús ba̧jekwadönö pjaatina wene

14Jesúsma Pedro ejube teachinobe, ja̧danö tebachajo̧, Pedro öja'unö öbadekwajinobe kamapjonö ba̧nö nia'o tjo̧awokonö. 15Jesúsma jömamunö mainobe, ja̧danö jömamunö maenama, nia'o ja̧jama jwiinö baibinobe. Jemi ikenama bi̧baju, a̧laibö kwakwawa jotidinobe Jesús ukwobö.

16Ja̧ yö̧te, jobe ju̧kwadöma ba̧jekwadö tjo̧'wo̧ luwo̧nö sulabedönö juna̧ladönö tjichejebinobe, ja̧danö Jesúsma yöba̧lö a'dewö loinobe tjo̧'wo̧ luwo̧nö sulabedönö. Ja̧danö, okobe deinö ö'wöchadönö otidö loinobe. 17Ja̧ baledi̧ma, damötjö Dios yöawi̧ yöbawo̧ Isaías yöawinadanö baledinobe. Baikwö laebobe Isaías iwȩyudinama:

Jo̧bama dö'wöchi̧bi, usula demawi̧bi eminobe,

jö̧ba̧lö.

Chöba̧ja̧di̧ waisachadö tjö̧jakwa̧ma waiya, jö̧ba̧lö Jesús yöawina wene

18Jesús iteda ipjeanö ba̧jekwadö jojodö tjoko̧ko̧kwachibobe edö, iteda öba̧ja̧di̧ waisachadönö weinobe, o̧pesobu nöobu bakwachobe petjibobö isowinö. 19Ja̧danö, Moisés iwȩyudina jawa ba̧ja̧dadötjö bakwo̧ma Jesúsnö yöa̧linobe:

—Ba̧ja̧dakwawa luwo̧, okobe jwiinö kwekachi̧teniama, ötjöbi kwökömanö chichocha—

jö̧ba̧lö yöa̧linobe. 20Jejenö yöa̧lökwe, Jesúsma atadinobe:

—Chömöledöso̧, ötjöma cheju jwibo̧sa. Yo̧lo̧ko̧döma laju sobö tjabakwemi juna̧ladö, ja̧danö pji̧yu̧ma, tja'di̧ju juna̧ladö. Jobadö tjabakwemi tjujuna̧li̧danöma chujuna̧lökö chömöledöso̧. Ötjö jojo baibanö jeminökwema chabakwemi jwibo̧sa. ¿Isabenö chökömanö kwichobö jö̧ka̧liji̧, kwabakwemi jwibo̧ bakibanö?—

jö̧ba̧lö atadinobe.

21Jesús öba̧ja̧di̧ waisachadötjö jelo̧ma Jesúsnö yöa̧linobe:

—Chuluwo̧, chabe'donö o̧tjö kabatajo̧da kwökömanö chichocha—

jö̧ba̧lö yöa̧linobe. 22Jo̧kwaijayonö, jejenö yöa̧lökwe Jesúsma atadinobe:

—Ö'wö babibajadönö o̧tjawama woba jojodö tjo̧tji̧. Ökwöma babeda chökömanö kwicho—

jö̧ba̧lö atadinobe Jesúsma.

Jesús jwa̧lȩ'epjo yöachibobö weina wene

23Jemi ikenama, Jesúsma isowinö a̧jibinobe iteda öba̧ja̧di̧ waisachadökwö, ja̧danö jamatö petjibinobe. 24Petjibonö, jwa̧lȩ'epjo labinö doibajinobe, ja̧danö balawa labinö loinobe, ja̧danö isowi meajo jö̧a̧linobe. Jejenö baledijayonö, Jesúsma bö̧ti̧söinö aba̧linobe. 25Jejenö aba̧liawö̧, Jesús öba̧ja̧di̧ waisachadöma jo̧banö tjiwiludinobe:

—Duluwo̧, o̧dibapji jö̧ba̧lö dö̧jibinö pjabati—

jö̧ba̧lö. 26Jejenö yötja̧lökwe, Jesúsma atadinobe:

—¿Tajawedö Diosnö kwo̧'wo̧ wana̧lökönö yekabiduwobedaja̧?—

jö̧ba̧lö. Ikenama, a̧laibö Jesúsma weinobe jwa̧lȩ'epjo yöachibobö, ja̧danö balawa loaja̧bi yöachibobö. Jejenö weenama, ja̧ jwiinö baibinobe, ja̧danö o̧pesobuma yöachibinobe. 27Jejenö balediawö̧, Jesús öba̧ja̧di̧ waisachadöma tjöbajale jalaka baibanö yötja̧linobe:

—Ayö, bitema ¿ditejayo̧jö? Jwa̧lȩ'epjobi, balawabi bite wei̧ a̧ja̧kwobe— jö̧ba̧lö.

Jesúsma du̧ju̧taja tjo̧'wo̧ luwo̧nö sulabedönö juna̧ladönö otidö loina wene

28Jesúsma o̧pesobu bakwachobe ichibinobe, gadarenos niji ötjabobe. Jobe ichibenama, du̧ju̧taja tjo̧'wo̧ luwo̧nö sulabedönö juna̧ladöma i̧lȩdi̧ju wobiako i̧lȩdi̧jutjö latjebinobe. Jobadöma wobiakonö tjö̧jinobe, ja̧danö okobe deinö yetjabiwö̧ tjö̧jinobe, okobe deinö jobe baledadönö labinö metjiba̧lobetjö̧. 29Jobadöma Jesús ichobe edö, labinö jwötjeba̧linobe baikwö:

—Ökwö Dios i̧tji̧ma, ¿tajawedö dö̧jobekwö kwichobeda? Lȩebakwa̧ möle ina baibököjayonö, ¿ökwödönö lȩbebö kwichaji̧?—

jö̧ba̧lö jwötjeba̧linobe.

30Jobe tjipjeanöma, ku̧si̧dö ba̧jekwadö tjö̧jinobe, tju̧kwa kwanö, 31ja̧danö tjo̧'wo̧ luwo̧nö sulabedöma Jesúsnö atjebinobe:

—Bidö ömadötjö ökwödönö a'dewö loköbitjö̧ma, idö ku̧si̧dönö tebachibö döjamatobö webi—

jö̧ba̧lö Jesús weobö atjebinobe. 32Jejenö atjebökwe:

—Jau, kwatjöma ku̧si̧dönö tebachibö ja̧duwi—

jö̧ba̧lö weinobe Jesúsma. Jo̧kwajabetjö̧, tjo̧'wo̧ luwo̧nö sulabedöma jobadö ömadötjö labebö, ku̧si̧dönö tetjachibinobe. Ja̧danö, jejenö tetjachibawö̧, okobe deinö ku̧si̧döma mö'ösa'otjö ya̧likwaobe mötjö nijakwö bajalenö labinö yutubö ö'öbakwawö södöbakwaibö o̧tjawinobe o̧pesobunö.

33Jejenö baibiawö̧, ku̧si̧dönö te'ada̧ladöma jobetjö dötjibajinobe, jobetjö yöne comunidadbe, ja̧danö okobe deinö jojodönö yötjawinobe tjo̧'wo̧ luwo̧nö sulabedönö juna̧lajadönö baledaja̧ma. 34Jejenö yötawawö̧, okobe deinö comunidadnö ju̧kwadöma labebö, Jesús ö̧jobekwö tjichinobe, ja̧danö jo̧banö atjebinobe, tjitebotjö laebajobö.

Currently Selected:

Mateo 8: WPC

Highlight

Copy