Popular Bible Verses from Mateo 5

Share

Ja̧danö, jojodö dejewa'yu̧ tjönötedenama, ¿wi̧lȩyu̧ teebe tjujunenaji̧? Junöködö, mesasöte wame junadö, okobe deinö o̧do okwa ju̧kwadö otiwanö tjedobö, ¿jö̧tö? Ökwödöbi ja̧danö chömöledö. Ökwödö böjȩ jojodö tjö'da̧de ja̧nö, otiwanö ja̧bö ja̧nö kwidejataduwo, okobe deinö otiwanö ja̧bö kwö̧jaduwi̧ tjedakobetjö̧, ja̧danö jejenö edö, okobe deinö mölejȩbe jo̧ kwabe'doduwinö tjösödakobetjö̧— jö̧ba̧lö yöawinobe Jesúsma.

Ja̧danö, ökwödöma dejewa'yu̧danö ichejekwadöja böjȩtjöma, otiwanö ja̧bö ja̧nö kwidejataduwo jö̧ba̧lö. Kwöwaisaduwa chömöledö, comunidad mö'ösa'o wa̧pekwa'otjö tjotiditjö̧ma, otiwanö öwawobe, ja̧danö tojawa jwii̧, ¿jö̧tö?

Tjomajadenö sulabenö omukwatöködöma, isabenö tjo̧'wo̧ ösöwanö tjö̧jakwedö, jobadöma Diosnö tjedakobetjö̧.

Jwaikwöda sulabe jwii̧ Dios ösödi̧ jawa isakwadöma, isabenö tjo̧'wo̧ ösöwanö tjö̧jakwedö, Dios öba a'otjö sulabe jwibadö tjö̧jakobetjö̧.

Jo̧kwaijayonö, baikwö yötawaduwakwö chömöledö: Kwöpöjojodönöbi kwösödaduwo, ja̧danö usula kwemawobö ja̧badönö Diosnö akebaduwo, jö̧ba̧lö yötawaduwakwö.

—Do̧'wo̧ luwo̧nö usulasedösa jö̧ba̧lö omukwatadöma, isabenö tjo̧'wo̧ ösöwanö tjö̧jakwedö, Dios la'aka luwo̧ ö̧jakwa̧ tjö̧jakobetjö̧.

Jojodö tjömöledökwö wene jwiinö tjö̧jobö isakwadöma, isabenö tjo̧'wo̧ ösöwanö tjö̧jakwedö, jobadönö Dios i̧tji̧mu ötjabikobetjö̧.

Tjo̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, tjo̧'wo̧ tjo̧achajabetjö tjo̧'wo̧ ösöwachibanö tjö̧jakobetjö̧.

Otiwanö ja̧bö tjö̧jobetjö̧ ju'wedö usula tjemawinö ja̧tjawö̧ma, isabenö tjo̧'wo̧ ösöwanö tjö̧jakwedö, Dios la'aka luwo̧ ö̧jakwa̧ tjö̧jakobetjö̧— jö̧ba̧lö yöawinobe Jesúsma.

Jojodönö lȩlö̧jinö edadöma, isabenö tjo̧'wo̧ ösöwanö tjö̧jakwedö, Diosma jobadönö lȩlö̧jinö edakobetjö̧.

Tupakwö yöawinobe Jesúsma: —Ötjönö kwösödaduwiawö̧ ju'wedö ökwödönö sulabenö otjenama, ja̧danö usula kwemawaduwinö ja̧tjenama, ja̧danö sulabenö ja̧köbaduwököjayonö sulabenö ja̧köbaduwaja̧ omöna yötjawenama, kwo̧'wo̧ ösöwaduwachibanö jwiinö kwo̧'wo̧ ösöwanö kwö̧jaduwo chömöledö, mölejȩbetjö Diosma isabenö otiwa jawa iyakobetjö̧. Jau chömöledö, kwöwaisaduwa, ökwödönö sulabenö tjöpöjödi̧danö damötjö ji̧nadö Dios yöawi̧ yöbawadönöbi tjöpöjödinobe, ¿jö̧tö? Ja̧danö, ju'wibi kwöwaisaduwobö jo̧be, jobadö damötjö otiwanö ja̧bö ji̧nadö Diostjö otiwa jawa tjemi̧danö ökwödöbi bakwainö kwemaduwakwedöja— jö̧ba̧lö yöawinobe Jesúsma.

Aaa, otiwöködösa jö̧ba̧lö omukwatadöma, isabenö tjo̧'wo̧ ösöwanö tjö̧jakwedö, Diosma jobadönö böjȩ iyakobetjö̧.

Tupakwö wanedö yöawinobe Jesúsma: —Chömöledö, sayu kwakwawa söinö pjaati̧danö, ökwödöma böjȩ jojodö tjö'da̧de ja̧nö pjakataduwo. Jau chömöledö, meyuwökönö kwö̧jaduwo, baikwö yötawa: Sayuma kwöwaisaduwa, sayu meyuwachibitjö̧ma, mikwawökö ji̧, ja̧danö yemidanö o̧toböma jwii̧, ¿jö̧tö? Jejenö meyuwitjö̧ma, ikwö lotjena, ja̧danö jojodö tjö̧jatena, ¿jö̧tö?

Jau chömöledö, kwabe'doduwi mölejȩbe jo̧ Diosma, bakwainö otiwanö ja̧bo̧, jo̧kwajabetjö̧ ökwödö jo̧ba i̧tji̧mubi bakwainö otiwanö ja̧bö kwö̧jaduwo— jö̧ba̧lö yöawinobe Jesúsma.

Jau chömöledö, ju'wi jaye wanedö yöbawökönö, jweinö ja̧köbaduwakwa̧da yökawaduwo. Jau, ja̧takwo̧sa jö̧ba̧lö yökawitjö̧ma, yökawaja̧danö ja̧bi, ja̧danö ja̧tökakwo̧sa jö̧ba̧lö yökawitjö̧ma, ja̧bökönuwi. Jau chömöledö, ju'wi jaye wanedö yöbawö junawama, Diostjöma ichökö ji̧. Awetjatjö ichi̧— jö̧ba̧lö yöawinobe Jesúsma.

Tupakwö yöawinobe Jesúsma: —Chömöledö, weawa kwa̧ja̧kwinaduwobe, bakwo̧ sulabenö ja̧aja̧danö, balekwa mikwa jo̧banö lȩekwa jo̧be. Jelo̧ öbajale 'dainö kwaitjö̧ma, balekwa mikwa öbajale 'dainö ja̧bö lȩekwa jo̧be, ja̧danö jelo̧ o'ye paduwibanö doitjö̧ma, balekwa mikwa o'ye paduwibanö ja̧bö lȩekwa jo̧be, jö̧ba̧lö weawa kwa̧ja̧kwinaduwobe, ¿jö̧tö? Jo̧kwaijayonö, wainö wetaduwakwö chömöledö baikwö: Sulabenö ja̧badönö kwölabikwawaduwoko jö̧ba̧lö. Jelo̧ kwibekasa'wonö 'bȩitjö̧ma, jalachibi bakwachobesa'wobi 'bȩobö, balekwa mikwama jo̧banö 'bȩköboko.

Jo̧kwajabetjö̧ baikwö wanedö yötawaduwakwö chömöledö: Kwöbajale otiwale sulabenö Dios weökö jawa ja̧köbobö weitjö̧ma, jale kelekwö loköbo. Jau chömöledö, kwiteba'o jawa jwiinö kwö̧jijayonö o̧penönö otiwena, okobe jwiinö kwiteba'o jawakwö ökwöla nöolanö kwö̧japji jö̧ba̧lö. Ja̧danö, kwömamu, kwöwaisobekwöchobesamu sulabenö Dios weökö jawa ja̧köbobö weitjö̧ma, ja̧mu bulatö loköbo. Jau chömöledö, kwiteba'o jawa jwiinö kwö̧jijayonö o̧penönö otiwena, okobe jwiinö kwiteba'o jawakwö ökwöla nöolanö kwö̧japji jö̧ba̧lö—. Jejenö yöawinobe Jesúsma, okobe jwiinö Dios weökö jawa ja̧köbaduwobö weitjöma 'da̧bachibö kakatibaduwo jö̧ba̧lö.