Mateo 4

Jesús sulabenö ja̧ojobö jö̧ba̧lö Awetja ja̧ina wene

1Jemi ikenama, Dios O̧'wo̧ Luwo̧ma Jesúsnö öibinobe, jojodö deobe i̧'yobö, jobetjö Jesús sulabenö ja̧ojobö ja̧okojobö jö̧ba̧lö Awetja edö ja̧obö. 2Jobe ja̧nö, cuarenta mölebi, yö̧tebi ö̧tö̧chö kwakwawa kwökönö ö̧jinobe Jesúsma, ja̧danö jejenö ö̧tö̧chö ö̧jobetjö̧ jwiinö a̧wi̧chi̧lö̧jinobe Jesúsnö. 3Ja̧danö, a̧wi̧chi̧lö̧jökwe Jesús ö̧jobekwö ichinobe sulabenö ja̧ojobö jö̧ba̧lö ja̧bo̧ Awetjama, ja̧danö jo̧banö weinobe:

—Isabenö Dios itji̧köbitjö̧ma, biwa inawiyatjö pan baibanö otidö kwidi—

jö̧ba̧lö. 4Jejenö weökwe, Jesúsma atadinobe:

—Jejenöma chotidökö, Dios iwene baikwö laebobetjö̧:

Sule pan kwanödama otiwanö 'yaba̧löködö jojodöma, okobe jwiinö Dios yöawi̧bi tja̧ja̧kwoböbi jo̧be,

jö̧ba̧lö laebobe—

jö̧ba̧lö atadinobe Jesúsma.

5Jemi ikenama Awetjama Jesúsnö öbibö i̧'yinobe Jerusalénbe, Dios ejutjö wa̧pekwobe, 6ja̧danö jo̧banö weinobe:

—Dios iwene baikwö laebobe:

Diosma iteda ömöayedö ángelesdönö weakobe ökwönö tjite'ada̧lobö, ja̧danö ökwönö do̧tjatakobe, inawanö tököbapji jö̧ba̧lö,

laebobe. Jo̧kwajabetjö̧ isabenö Dios itji̧köbitjö̧ma, mötjö nijakwö döbi—

jö̧ba̧lö weinobe Awetjama. 7Jejenö weökwe, Jesúsma öpöjödö atadinobe, baikwö:

—Jejenöma dötökö. Ju'wibi laebobe Dios iwene, baikwö:

Kwuluwo̧ Dios dakwö ujuluwo jö̧ba̧löbi, dakwö ja̧o jö̧ba̧löbi ja̧bökönuwi—

jö̧ba̧lö atadinobe Jesúsma.

8Jemi ikenama Awetjama Jesúsnö öbibö i̧'yinobe mö'ösa'o jwiinö möa'o wa̧pekwa'obe, ja̧danö okobe deinö tjitebotenia i̧sebinobe, ja̧danö tjitebokwena otiwanö tjö̧ji̧ i̧sebinobe. 9Jejenö i̧sebö, Awetjama Jesúsnö yöa̧linobe:

—Ötjönö bȩbachibö kwösöditjö̧ma, okobe deinö tjitebotenia ökwönö chiyocha, ökwöda tjuluwo̧ kwö̧jo jö̧ba̧lö—

yöa̧linobe Awetjama. 10Jejenö yöa̧lökwe, Jesúsma atadö weinobe,

—¡Döbibaji Awetja! Ökwönö chösödökö. Dios iwenema baikwö laebobe:

Kwuluwo̧ Diosnöda ösödi, ja̧danö jo̧ba wei̧da ja̧bö ja̧wi,

jö̧ba̧lö laebobe—

jö̧ba̧lö atadö weinobe Jesúsma.

11Jejenö weökwe, Awetjama laebinobe. Ja̧danö jemi ikenama ángelesdöma ichö Jesúsnö te'ada̧lö pjatjatinobe.

Jesús jamatö yöawina wene

12La'aka luwo̧ma Juannö ka̧lena ödinobe, ja̧danö ja̧ wene a̧ja̧kwajo̧, Jesúsma Galilea nijibe ȩwa̧jinobe. 13Ajayinöma Nazaret comunidadbe ȩwa̧jinobe, ikenama jobetjö labebö Capernaúm comunidadbe ja̧nö i̧'yinobe. Jobe Capernaúmma, o̧pesobu nöobu Galileasobu ö'öbö comunidad, ja̧danö Israel jojodötjö Zabulónsaso, ja̧danö Neftalísaso jojodö tjitebo. 14Ja̧ baledi̧ma, Dios yöawi̧ yöbawo̧ Isaías mikwo̧ iwȩyudinadanö baledinobe. Baikwö iwȩyudinobe Isaíasma:

15Jordán tupakwö niji ja̧danö Zabulóntjöbi, Neftalítjöbi niji, ja̧danö isobu nöobu ö'öbö niji, Galilea ötjabi̧ nijima, ba̧jekwadö judío jojodöböködö tjö̧jena. 16Jobadö yȩa'wo okwa ju̧kwinadöma inesö dewi̧ tjedajabe, ja̧danö Diosnö tjöpöjödinobetjö̧ jobe bakwaida yȩa'woda ji̧najayonö, dewinö dejatajabe,

jö̧ba̧lö wanedö iwȩyudinobe Isaíasma.

17Ja̧ möle Jesúsma jamatö yöawinobe, jojodönö yöawi̧ma, baikwö:

—Sulabenö kwomukwataduwi̧ kabatibö balewachaduwi, Dios la'aka luwo̧ ö̧jakwa̧ möle yöneawachibobe—

jö̧ba̧lö jamatö yöawinobe.

Jesús iteda öba̧ja̧di̧ waisachadö batjibobö ju'wedönö jwöina wene

18Jesús o̧pesobu Galilea mikwobu ö'öbönö kweachemi, ömadö du̧ju̧taja ba̧i̧ jwobadönö edinobe, Simón ju'wi imi Pedro mikwo̧nöbi, öjawo̧ Andrés mikwo̧nöbi. Jobadöma maya jwobö tjotidinobe, ja̧danö maya jwotjobe edinobe. 19Jobadönö edö, Jesúsma yöawinobe:

—Ötjö chökömanö ichaduwi. Ja̧danö babe ba̧i̧ emö maya jwobö kwotidaduwi̧danö, jojodönö jwobadö bakibaduwanö ja̧takwo̧sa—

jö̧ba̧lö yöawinobe. 20Jejenö yöawiawö̧, juluwanö maya kabatibö, jo̧bakwö tji̧'yinobe.

21Jemi tupakwö kwebachö, ju'wedö ömadö du̧ju̧tajanö edinobe, Zebedeo i̧tji̧mu Jacobo mikwo̧nöbi, Juan mikwo̧nöbi. Tjabe'dokwö isowinö la̧nö, maya di̧'yadönö edinobe. Jobadönöbi jwöinobe, 22ja̧danö jobadöbi isowi junibö, ja̧danö tjabe'donö le'dedibö Jesúskwö tji̧'yinobe.

23Galilea niji bakwameachibanö kweachinobe Jesúsma. Judío jojodö ba̧nö tja̧ja̧kwa̧lejubiya tebachiabö öba̧ja̧dinobe, ja̧danö otiwa jawa wene yöbawö kweachinobe, Dios la'aka luwo̧ ö̧jakwa̧ jawa wenema, ja̧danö okobe jwiinö jojodö tjö'wöchi̧, ja̧danö tjime'dawi̧ otidö loinobe. 24Jejenö ja̧iawö̧, ba̧jekwadö tja̧ja̧kwinobe jo̧banöma, ja̧danö Siria niji bakwameachibanö jojodöbi jo̧banö tja̧ja̧kwinobe. Jo̧kwajabetjö̧, jo̧ba ö̧jobekwö tje'ewinobe okobe jwiinö tjö'wöchi̧tenia ja̧danö nitji̧tenia usula emawadönöbi, ja̧danö tjo̧'wo̧ luwo̧nö sulabedönö juna̧ladönöbi, ja̧danö nijinö mebö 'dö̧bachabidönöbi, ja̧danö 'wabadönöbi. Jejenö tjichejebiökwe, Jesúsma okobe deinö jobadönö tjö̧bibajinö otidö loinobe.

25Ja̧danö, ba̧jekwadö Jesús ökömanö lutjinobe, Galilea nijitjöbi, Decápolis nijitjöbi, Jerusalén comunidadtjöbi, Judea nijitjöbi, ja̧danö Jordán mikwödö tupakwö nijitjöbi.

Currently Selected:

Mateo 4: WPC

Highlight

Copy