Mat 24

Yesu naaranga okuhwerekezibwa kw'Enju ya Ruhanga

(Mar 13:1-2; Luk 21:5-6)

1Yesu obu akaba naaruga omu Nju ya Ruhanga, nubwo abeegesebwa be baizire kumuragirra enyombeka yayo. 2Uwe yabagarukamu ati: “Ebi byona timurukubirora? Mazima nimbagambira nti: Hanu tihalisigaraho ibaale eriri ha lindi, eritalinagwa hansi.”

Entandiko y'emihito

(Mar 13:3-13; Luk 21:7-19)

3 # 2Esid 4:51—5:19. Yesu obu akaba aikaliire ha rusozi rw'emiti Oliva, abeegesebwa be baija nambere ali baamukaguza omu nsita bati: “Tugambire, binu biribaho di, kandi karorwaho ki akalyoleka okwija kwawe n'okuhwaho kw'ensi?” 4Yesu yabagarukamu ati: “Mwerinde, hatalibaho muntu weena arukubahabisa. 5Habwokuba baingi abaliija omu ibara lyange, nibagamba bati: ‘Ninyowe Kristo’, kandi balihabisa baingi. 6Mulihurra obulemu n'engambo zabwo; mwerinde mutalyekanga; habwokuba ebi by'okubaho, baitu empero eriba etakahikire. 7#2Esid 13:31.Ihanga lirimukirra erindi, n'obukama bulirwanisa obundi, haligwa kiihe kandi halibaho emisisa omu biikaro bingi. 8Ebi byona eriba ntandiko y'emihito.

9 # Mat 10:22. “Nubwo balibahayo okubonabonesibwa n'okwitwa; amahanga goona galibanoba habwange. 10Abaingi balinaga okwikiriza, bagobezangane, kandi banobangane. 11Haliimuka abarangi baingi ab'ebisuba kandi balihabisa baingi. 12Habw'obubi kuhingurana buti, okugonza okwa baingi kulifuka. 13#Mat 10:22.Baitu ogu aligumiisiriza kuhika ha mpero, nuwe alijunwa. 14Kandi Amakuru Amarungi ganu ag'obukama bwa Ruhanga galirangirirwa omunsi yoona, gabe bwakaiso ha mahanga goona; obu nubwo empero erihika.”

Empero y'emihito

(Mar 13:14-23; Luk 21:20-24)

15 # Dan 9:27; 11:31; 12:11; 1Mak 1:54; 6:7. “Obu mulirora ekintu ekirukunugwa kandi ekirukuhwerekereza#24:15 Eri niryo itambiro ly'Abanyamahanga eryatairwe omu Nju ya Ruhanga kandi eryagambirweeho mu Daneeri 11:31; 12:11., ekyagambirweho Daneeri omurangi, kitairwe omu kiikaro ekirukwera (arukusoma binu abyetegereze), 16abo abaliba bali omu Buyudaaya bairukire ha nsozi; 17#Luk 17:31.alisangwa hanju eruguru, atalisirimuka kwiha ekintu omunju ye; 18n'alisangwa ali omu musiri, ataligaruka omu ka kutabarra omwenagiro gwe. 19Kandi bambi, abaliba baina enda n'abarukwonkya omu biro ebi balikibona! 20Musabe muleke kusingwa omu biro by'obutiti rundi ha Sabbato. 21#Dan 12:1; Kus 7:14.Habwokuba omu biro ebi halibaho omuhito mwingi ogutakabahoga okuruga Ruhanga ahanga ensi n'okuhika hati, kandi ogutaligaruka kubaho. 22Kakuba ebiro ebi bitarakeehiibweho, tihaakujunirwe muntu n'omu; baitu habw'abakomerwemu be, ebiro ebi Ruhanga akabikeehyaho. 23Omuntu weena obu alibagambira ati: ‘Dora Kristo ngunu!’ Rundi: ‘Ngugwo!’ Mutalimwikiriza. 24Habwokuba halizooka abarangi ab'ebisuba n'abarukweyeta Kristo, booleke ebihuniriza bingi n'ebyamahano, nukwo bahabise noobu baakubaire abakomerwemu. 25Binu mbibagambiire bitakabaireho. 26#Luk 17:23,24.Nahabweki obu balibagambira bati: ‘Darawe ali omwirungu,’ mutaligyayo. Rundi: ‘Ngunu ali omu kisiika’, mutaliikiriza. 27Omurabyo nkooku gumulikya niguruga Burugaizooba kuhika Bugwaizooba, n'okwija kw'Omwana w'omuntu nukwo kuliba kuti. 28#Luk 17:37.Nambere hali omutumbi, nuho esega zeesorooleza.”

Okugaruka kw'Omwana w'omuntu

(Mar 13:24-27; Luk 21:25-28)

29 # Is 13:10; Yow 2:10,31; 3:15; Kus 6:12; Is 13:10; Ezek 32:7; Yow 2:10; 3:15; Is 34:4; Kus 6:13. “Emihito y'ebiro ebi obu erihwa, ahonaaho izooba lirisiikirizibwa omwirima, n'okwezi tikulijwa, n'enyunyuuzi zirigwa hansi, kandi amaani ag'omwiguru galitengesebwa. 30#Dan 7:13; Zek 12:10-14; Kus 1:7.Nubwo akarorwaho k'Omwana w'omuntu kalizooka omu iguru, kandi enganda zoona ez'omunsi ziriganya. Aho balirora Omwana w'omuntu naizira omu bicu by'omwiguru, aina obusobozi n'ekitiinisa kingi. 31Nubwo alituma bamalaika be nibateera engwara ezirukugamba muno, basorooze abakomerwemu be nibabaiha omu mbaju ina, okuruga ha mpero emu y'iguru okuhika hali endi.”

Okwegera ha muti omutini

(Mar 13:28-31; Luk 21:29-33)

32“Mwegere ha muti omutini, itaagi lyagwo obu lirokera, likanjurra amababi, mumanya nkooku ekyanda kiri haihi. 33Na inywe obu mulirora ebi byona, mumanye nkooku ali haihi, ahikiire kimu ha irembo. 34Mazimakwo nimbagambira nti: Ab'obusinge bunu tibalihwaho, ebi byona bitakabaireho. 35Iguru n'ensi birihwaho, baitu ebigambo byange tibirihwaho.”

Akasumi ak'aliiziramu

(Mar 13:32-37; Luk 17:26-30,34-36)

36“Baitu ekiro eki n'esaaha egi busaho n'omu abimanyire, noobu baakuba bamalaika ab'omu iguru, noobu yakuba Omwana w'omuntu, kwihaho Isenyowe wenka. 37#Kub 6:5-8.Nkooku kyabaire omu biro bya Noha, n'okwija kw'Omwana w'omuntu nukwo kuliba kuti. 38Omu biro ebyayebembiire okusandaara kw'amaizi, abantu baalyaaga, baanywaga, basweranganaga, okuhika ha kiro Noha eki yataahiireho omu lyato erikooto, 39#Kub 7:6-24.kandi batakimanye okuhika okusandaara kw'amaizi obu kwaizire kwabahwerekereza boona; n'okwija kw'Omwana w'omuntu nukwo kuliba kuti. 40Abasaija babiri obu balisangwa omu musiri: omu alitwarwa, ondi asigale. 41Abakazi babiri obu baliba nibasa hamu: omu alitwarwa, ondi asigale. 42Nahabweki mwikale nimurora, habwokuba timumanyire kiro MUKAMA eki aliiziramu. 43#Luk 12:39,40.Baitu kinu mukimanye, kakuba nyineeka yamanyire akasumi omusuma ak'arukwiziramu omu bwire bw'ekiro, yaakwikaire naarora, taakulekere enju ye kucwibwa. 44Nahabweki na inywe musemeriire kwikara mweteekaniize; habwokuba Omwana w'omuntu aliija ha saaha ei mutarukumunihirranu.”

Oruganikyo rw'omuheereza omwesigwa

(Luk 12:41-48)

45“Nooha omuheereza ogu omwesigwa kandi ow'amagezi, mukama we ou yasigiire kurolerra ab'omu ka ye, abahe ebyokulya omu kasumi akahikire? 46W'omugisa omuheereza ogu, mukama we obu aligaruka, akamusanga naakora ati! 47Mazimakwo nimbagambira nti: Alimukwasa okurolerra ebintu bye byona. 48Baitu omuheereza omubi kakuba ateekereza ati: ‘Mukama wange aikaireyo’, 49kandi akatandika kuteera abaheereza bataahi be, akeeta ha kulya n'okunywa n'abatamiizi. 50Mukama w'omuheereza ogu obu aligaruka ha kiro eki atarukumunihirramu na ha saaha ei atarukumanya, 51alimufubira, amubarre omuli abo abatarukwesigwa; oku nuho abantu baliririrra kandi banene ensaya.”

Currently Selected:

Mat 24: BRR2008

Highlight

Copy