Mat 23

Yesu naahabura kwerinda engeso z'Abafalisaayo

(Mar 12:38-39; Luk 11:43-46; 20:45-46)

1Nubwo Yesu yagambiire ebitebe by'abantu n'abeegesebwa be ati: 2“Abeegesa b'ebiragiro n'Abafalisaayo balema omu kiikaro kya Musa; 3nahabweki muhurrege kandi mukuraatire byona ebi baraabagambiraga, baitu muleke kukora nka bo, habwokuba ebi bagamba, tibiri nibyo bakora. 4Baboha emigugu erukulemeera, etarukusobora kwetwekwa, bagyetwekesa abandi ha mitwe; baitu bbo bonka tibagonza kugitengesaaho n'orukumo rwabo. 5#Mat 6:1; Bir 6:8; Kubar 15:38.Bakora ebikorwa byabo byona nibagonza kurorwa abantu. Banyeesa ebihuuta byabo ebyahurwamu Ebiragiro, baraihya ebitutu by'ebijwaro byabo, 6bagonza ebiikaro by'omu maiso omu magenyi, n'entebe ez'ekitiinisa omu masorrokaniro, 7n'okuramukibwa omu butale, n'abantu okubeeta: Mwegesa. 8Baitu inywe mutalyetwa Mwegesa, habwokuba mwina omwegesa omu, kandi inywena muli iseemu. 9Mutalyeta muntu weena ow'omunsi isiinywe, habwokuba mwina Isiinywe omu, anyakuli omu iguru. 10Kandi mutalyetwa bakama, habwokuba mwina Mukama omu, nuwe Kristo. 11#Mat 20:26,27; Mar 9:35; 10:43,44; Luk 22:26.Arukukira obukuru omuli inywe, araabaga muheereza wanyu; 12#Luk 14:11; 18:14.weena anyakwenyumiza, alibundaazibwa; kandi weena anyakwebundaaza, alinyumizibwa.”

Yesu naahana Abafalisaayo

(Mar 12:40; Luk 11:39-42,44,52; 20:47)

13“Mulikibona ngobya inywe, abeegesa b'ebiragiro n'Abafalisaayo! Habwokuba mukingira abantu obukama bw'omu iguru na inywe timubutaahamu, kandi n'abarukugonza kubutaahamu timubaikiriza. [ 14Mulikibona ngobya inywe, abeegesa b'ebiragiro n'Abafalisaayo! Habwokuba munyaga ebintu eby'omu maju g'abafaakati, kandi musaba endanda abantu babarole; nikyo mulicwererwa omusango ogurukukira obukooto.]

15“Mulikibona ngobya inywe, abeegesa b'ebiragiro n'Abafalisaayo! Habwokuba mwambuka amayanja mugendagenda omu mahanga habw'okuhindura omuntu omu. Obu mumara kumuhindura, mumufoora muntu w'okunagwa omu kiinongoro ky'omurro, mubi okukira inywe emirundi ebiri.

16“Mulikibona inywe abeebembezi abafu b'amaiso abagamba muti: ‘Kakuba omuntu naarahira Enju ya Ruhanga, tikiri kigambo; baitu kakuba naarahira ezaabbu y'omu Nju ya Ruhanga, kimusemeriire kuhikiriza endahiro ye.’ 17Badoma inywe abafu b'amaiso! Ekirukukira obukuru nikiha, zaabbu rundi Enju ya Ruhanga enyakweza zaabbu egi? 18Kandi mugamba muti: ‘Kakuba omuntu naarahira itambiro, tikiri kigambo; baitu kakuba arahira ebinyakuli ha itambiro, kimusemeriire kuhikiriza endahiro ye.’ 19Inywe abafu b'amaiso! Ekirukukiraho obukuru nikiha, ekihongwa rundi itambiro erirukweza ekihongwa? 20Nahabweki ogu nanyakurahira itambiro, aba alirahire na byona ebinyakuliroho. 21Kandi na weena anyakurahira Enju ya Ruhanga aba agirahiire, kandi arahiire n'Ogu anyakugiikaramu. 22#Is 66:1; Mat 5:34.N'anyakurahira iguru, aba arahiire ekitebe kya Ruhanga n'Ogu anyakukiikaliireho.

23 # Lev 27:30. “Mulikibona ngobya inywe, abeegesa b'ebiragiro n'Abafalisaayo! Habwokuba muha ekicweka kya ikumi eky'omubwiga, n'eyobyo, n'emikubi endi; kandi timutaho mutima ebigambo ebikuru ebiri omu Biragiro: obwinganiza, embabazi n'okwikiriza. Binu nibyo mwakukozire, kandi ebindi nabyo muleke kubinagaija. 24Inywe abeebembezi abafu b'amaiso, musengiija ebyokunywa kubiihamu omubu, kandi mumira engamiya!

25“Mulikibona ngobya inywe, abeegesa b'ebiragiro n'Abafalisaayo! Habwokuba mwogya ekikopo n'esahaani haruguru, kandi kunu omu nda mwijwire obunyagi n'obubi. 26Mufalisaayo iwe omufu w'amaiso: Banza oyogye ekikopo n'esahaani omu nda, nukwo na haruguru yabyo hasemere.

27 # Ebik 23:3. “Mulikibona ngobya inywe, abeegesa b'ebiragiro n'Abafalisaayo! Habwokuba musisana nk'ebituuro ebisiigirwe inoni, ebizooka kurungi aheeru, kandi kunu omu nda bijwire amagufa g'abafu n'oburofu bwona. 28Na inywe haruguru muzooka nk'abahikiriire omumaiso g'abantu, baitu omu nda mwijwire obugobya n'obubi.

Yesu nabazaho ekifubiro kyabu

29“Mulikibona ngobya inywe, abeegesa b'ebiragiro n'Abafalisaayo! Habwokuba mwombekera abarangi ebituuro, musemeza n'ebiijukyo by'abahikiriire, 30nimugamba muti: ‘Kakuba twabaire turoho omu biro by'abaisenkuruitwe, titwakuteraine nabo kuseesa esagama y'abarangi.’ 31Habweki nimwerumiriza inywenka nkooku muli baijukuru b'abo abaisire abarangi. 32Na inywe muba nimumaliriza baisenkuru inywe eki baatandikire. 33#Mat 3:7; 12:34; Luk 3:7.Njoka inywe, baana b'encwera, mulitabuka muta omusango ogw'okunagwa omu kiinongoro ky'omurro? 34Nikyo ndukubatumira abarangi, abantu b'amagezi, n'abeegesa b'ebiragiro: abamu mulibo mulibaita nimubabamba ha musaraba, abandi mulibateera enkoba omu masorrokaniro ganyu, kandi abandi mubahiiganize omu mbuga zoona, 35#Kub 4:8; 2 Byok 24:20,21.nukwo esagama y'abahikiriire boona eyasesirwe omunsi ebaimukirre: okurugirra ha sagama y'Abberi ayaitiirwe busa, okuhika ha sagama ya Zakaliya mutabani wa Barakiya, ou mwaitiire hagati y'ekiikaro ekirukwera n'itambiro. 36Mazimakwo nimbagambira nti: Binu byona birihikaho abantu ab'obusinge bunu.”

Yesu naalirirra Yerusaalemu

(Luk 13:34-35)

37“Ai bambi Yerusaalemu, Yerusaalemu iwe anyakwita abarangi nooteeza amabaale abakutumirwa! Kaingaha obu naagondeze kusorooza hamu abaana baawe nk'enkoko oku ebumbatira obwana bwayo omu mapapa gaayo, baitu iwe otaikirize! 38#Yer 22:5.Dora, enju yaawe neija kusigara eri kifurukwa. 39#Zab 118:26.Nyowe nimbagambira nti: Timuligaruka kundora okuhika obu mulikagamba muti: ‘W'omugisa ogu arukwija omu ibara lya MUKAMA.’ ”

Currently Selected:

Mat 23: BRR2008

Highlight

Copy