Mat 22

Oruganikyo rw'obugenyi obwayangirwe

(Luk 14:15-24)

1Yesu yayongera kubaganikiza oruganikyo orundi ati: 2“Obukama bw'omwiguru nibulengesanizibwa nk'omukama ayakoliire mutabani we obugenyi bw'okuswera. 3Yatuma abaheereza be kweta abo abakaba baraaliziibwe kwija ha bugenyi; baitu bbo batagonze kwija. 4Yagaruka yatuma abaheereza abandi naagamba ati: ‘Mugende mugambire abo abaraaliziibwe muti: Nteekaniize obugenyi bwange, nyisire enimi y'esajwa, kandi nteekaniize buli kintu, mwije mutaahe obugenyi.’ 5Baitu abagenyi abaraaliziibwe batakifeeho, baayegendera, omu yagenda ha musiri gwe, ondi omu busubuzi bwe, 6abasigaireho baakwata abaheereza be, baabaswaza, baabaita. 7Omukama yabiihirwa muno, yatuma amahe ge, gaahwerekereza abaisi abo, gaayokya n'orubuga rwabo. 8Nubwo yagambiire abaheereza be ati: ‘Obugenyi buteekaniziibwe, baitu abaraaliziibwe tibabusemeriire. 9Hati nu, mugende omu ntangatangano z'emihanda, abantu baingi aba muraasangayo mubeete, baije ha bugenyi.’ 10Abaheereza baagenda omu mihanda, baasorooza boona abaakasangirweyo, ababi n'abarungi; enju yaijura abagenyi.

11“Baitu omukama obu yaizire kurora abagenyi, yasangamu omusaija atajwaire kijwaro ky'obugenyi; 12yamukaguza ati: ‘Mutaahi wange, munu otaahiremu ota, otajwaire kijwaro ky'obugenyi?’ Baitu uwe yaburwa eky'okugarukamu. 13#Mat 8:12; 25:30; Luk 13:28.Nubwo omukama yaragiire abaheereza be ati: ‘Mumubohe emikono n'amaguru, mumunage aheeru omu mwirima nambere abantu baliririrra kandi banene ensaya.’ 14#2Esid 8:3.Habwokuba abeetwa baingi, baitu abakomwamu bake.”

Ekikaguzo ha kuha omusoro

(Mar 12:13-17; Luk 20:20-26)

15Abafalisaayo baagenda, baahanuura nkooku baraatega Yesu omu bigambo. 16Baamutumaho abeegesebwa baabo hamu n'ab'ekitebe kya Herode, baamugambira bati: “Mwegesa, tumanyire nkooku oli w'amazima, oyegesa omuhanda gwa Ruhanga omu mazima otaina n'omu ou orukutiina kandi tororra ha kitiinisa ky'abantu. 17Tugambire eki orukuteekereza. Kihikire kuha Kaisaali omusoro, rundi nangwa?” 18Baitu Yesu yakenga obugobya bwabo, yagamba ati: “Nimuntegera ki, bagobya inywe? 19Munyoleke siringi ei muha omusoro.” Baamuleetera siringi. 20Yesu yabakaguza ati: “Ekisisani kinu n'ebihandiikirweho by'oha?” 21Baamugarukamu bati: “Bya Kaisaali.” Yesu yabagambira ati: “Ebya Kaisaali mubihe Kaisaali, n'ebya Ruhanga mubihe Ruhanga.” 22Obu bahuliire eki, baahunirra, baamurugaho, baagenda.

Ekikaguzo ha kuhumbuuka omu bafu

(Mar 12:18-27; Luk 20:27-40)

23 # Ebik 23:8. Ha kiro eki, Abasadukaayo abagamba ngu, tiharoho okuhumbuuka kw'abafu, bakaija hali Yesu baamukaguza bati: 24#Bir 25:5.“Mwegesa, Musa akagamba ati: ‘Kakuba omuntu afa atazaire baana, mugenzi we aswere omufaakati ogu, nukwo bazaare kifa abaana.’ 25Owaitu oku, hakaba haliyo banyineemu musanju: Mukuru waabo akaswera omukazi, baitu yafa atakamuzaireho baana, yamugwetera mugenzi we. 26Owa kabiri n'owa kasatu nabo nukwo bati, okuhikiza kimu ha wa musanju, boona batazaale. 27Abo boona obu baahoireho omukazi nawe yafa. 28Ha kuhumbuuka kw'abafu, omukazi ogu aliba muk'oha hali abo omusanju? Habwokuba boona bakamuswera.”

29Yesu yabagarukamu ati: “Muhabire habw'okutamanya ebyahandiikirwe noobu bwakuba obusobozi bwa Ruhanga. 30#Ama 5:5.Habwokuba ha kuhumbuuka, tibaliswera kandi tibaliswerwa, baitu baliba bali nk'abamalaika omwiguru. 31Kandi ha by'okuhumbuuka kw'abafu, timukasomaga Ruhanga eki yabagambiire ati: 32#Kurug 3:6.‘Ninyowe Ruhanga owa Abburahamu, Ruhanga wa Isaaka, kandi Ruhanga wa Yakobbo?’ Tali Ruhanga w'abafiire, baitu w'aboomeezi.” 33Abantu obu baahuliire eki, baahunirra habw'okwegesa kwe.

Ekiragiro ekikuru

(Mar 12:28-34; Luk 10:25-28)

34Baitu Abafalisaayo obu baahuliire Yesu nkooku aculiize Abasadukaayo abatiire ibumbakanwa, baayesorooza hamu. 35Omu hali bo, akaba ali looya, yamukaguza naamutega ati: 36“Mwegesa, kiragiro ki ekikuru omu Biragiro?” 37#Bir 6:5.Yesu yamugarukamu ati: “Ogonzeege MUKAMA Ruhanga waawe n'omutima gwawe gwona, n'omwoyo gwawe gwona, n'amagezi gaawe goona. 38Eki nikyo kiragiro ekikuru ekirukubanza. 39#Lev 19:18.Kandi ekya kabiri ekirukusisana n'eki, nikyo kinu: Ogonzeege mutaahi waawe nkooku oyegonza wenka. 40#Luk 10:25-28.Omu biragiro binu ebibiri, ebindi byona n'eby'abarangi numwo bisigikira.”

Kristo omwijukuru wa Daudi kandi Mukama we

(Mar 12:35-37; Luk 20:41-44)

41Abafalisaayo obu bakaba beesoroize hamu, Yesu yabakaguza ati: 42“Kristo nimumuteekerezaaho muta? Mwijukuru w'oha?” Baamugarukamu bati: “Mwijukuru wa Daudi.” 43Yesu yagaruka yabakaguza ati: “Daudi, obu yagambisiibwe Mwoyo Ahikiriire, habwaki yamwesire MUKAMA we ati:

44 # Zab 110:1. ‘MUKAMA akagambira MUKAMA wange ati:

Ikarra ha mukono gwange ogw'obulyo

okuhika obu ndifoora abanyazigwa baawe

akatebe k'ebigere byawe’?

45Daudi obu araaba yayesire Kristo MUKAMA we, kandi obu, aba ata mwijukuru we?” 46Busaho n'omu ayasoboire kumugarukamu; kandi okuruga ha kiro eki, hatabeho n'omu ayalengereho kumukaguza ebikaguzo ebindi.

Currently Selected:

Mat 22: BRR2008

Highlight

Copy