Mat 25

Oruganikyo rw'abaisiki ikumi

1 # Luk 12:35. “Omu kasumi ako, obukama bw'omwiguru bulirengesanizibwa n'abaisiki ikumi abatwaire etaara zaabo baagenda kutangirra omuswezi. 2Abataano bakaba bali badoma, kandi bataano b'amagezi. 3Habwokuba abadoma obu baatwaire etaara zaabo, batatwale magita ag'okwerinza; 4baitu ab'amagezi bakatwara amagita omu cupa n'omu taara zaabu. 5Omuswezi obu yakeererirwe okwija, boona baatandika kuhungira, baagwijagira.

6“Baitu ekiro omu itumbi bakahurra etoko ngu: ‘Dara kigabura aizire! Muturuke aheeru mumutangirre.’ 7Abaisiki bali boona nubwo baimukire, baasemeza etaara zaabo. 8Abadoma baasaba ab'amagezi bati: ‘Mutuheho amagita, habwokuba etaara zaitu zaagya kuraara.’ 9Baitu ab'amagezi baabagarukamu bati: ‘Tigarukwija kutumara itwena; haakire inywe mugende hali abasuubuzi mwegurreyo.’ 10Obu bakaba bagenzire kugura amagita, omuswazi yaija; abo abakaba beeteekaniize baataaha nawe omu nju ey'obugenyi, n'orwigi rwakingwaho. 11#Luk 13:25.Hanyuma abaisiki abandi nabo baija nibagamba bati: ‘Waitu, waitu, tukingurreho!’ 12Baitu omuswezi yagarukamu ati: ‘Mazimakwo nimbagambira nti: Timbamanyire.’ 13Nahabweki mwikalege nimurora, habwokuba timurukumanya kiro noobwekuba saaha.”

Orufumo rw'abaheereza abaasiigirwe sente

(Luk 19:11-27)

14 # Luk 19:11-27. “Obukama bw'omwiguru bulisisana nk'omuntu ow'akaba naija kwimukya orugendo; akeeta abaheereza be yabakwasa ebintu bye. 15Akaha buli omu narorra ha bwekambi bwe. Omu akamuha siringi omutwaro, gumu, ondi yamuha enkumi itaano, n'ondi yamuha rukumi rumu, hanyuma yagenda. 16Ogu ayatungire siringi omutwaro gumu, ahonaaho yagenda yaisuubuza; yatunga amagoba omutwaro gumu ogundi. 17N'ayatungire siringi enkumi itaano, nawe yagobamu siringi enkumi itaano zindi. 18Baitu ogu ayatungire siringi rukumi rumu, akagenda yalima ekiina omu itaka, yaserekayo sente za mukama we.

19“Obu haahingwireho omwanya mukooto, mukama w'abaheereza abo yagaruka, yabara nabo ebi yabasigiire. 20Ogu ayahairwe siringi omutwaro gumu yaija, yaleeta siringi omutwaro gumu ogundi naagamba ati: ‘Mukama wange okansigira siringi omutwaro gumu, na nyowe nkagobamu omutwaro gumu ogundi.’ 21Mukama we yamugambira ati: ‘Webale omuheereza murungi kandi omwesigwa; oyesigirwe omu bike, ninyija kukukwasa bingi; ija osemererwe na mukama waawe.’ 22N'oli ayatungire siringi enkumi itaano yaija, naagamba ati: ‘Mukama wange, okansigira siringi enkumi itaano, hati ngoberemu enkumi itaano ezindi.’ 23Mukama we yamugambira ati: ‘Webale omuheereza murungi kandi omwesigwa; oyesigirwe omu bike, ninyija kukukwasa bingi; ija osemererwe na mukama waawe.’ 24N'oli ayatungire siringi orukumi rumu yaija naagamba ati: ‘Waitu, nkakumanya nkooku oli muntu ngumangani. Ogesa ebi otarasigire, ohunika ebi otarasigire; 25nahabweki nkatiina, naagenda naasereka siringi zaawe omu itaka. Darazo, ozitwale.’ 26Baitu mukama we yamugarukamu ati: ‘Muheereza iwe omubi kandi omugara! Okamanya nkooku ngesa ebi ntarasasigire, kandi mpunika ebi ntarasigire. 27Siringi zange waakubaire ozitaire omu banka, obu naakugarukire naakuzitungire n'amagoba gaazo. 28Nahabweki mumwiheho siringi zange, muzihe ogu anyakwina omutwaro gumu. 29#Mat 13:12; Mar 4:25; Luk 8:18.Habwokuba weena anyakwina alyongerwaho ebindi bingi; baitu anyakwina ebike, n'ebi ainabyo birimwihwaho. 30#Mat 8:12; 22:13; Luk 13:28.Omuheereza ataina mugaso ogu, mumunage aheeru omu mwirima. Oku nuho abantu baliririrra, kandi banene ensaya.’”

Okucwerwa omusango okwa ha mpero

31 # Mat 16:27; Mat 19:28. “Omwana w'omuntu obu aliizira omu kitiinisa kye aina n'abamalaika be boona, alisinga ha kitebe kye eky'ekitiinisa. 32Amahanga goona galyesorooleza omumaiso ge, alibabaganizaamu nk'omuliisa okw'asoroora entaama omu mbuzi. 33Entaama alizita ha mukono gwe ogw'obulyo, baitu embuzi alizita ha gw'emoso. 34Nubwo Mukama aligambira aba ha mukono gw'obulyo ati: ‘Mwije inywe Isenyowe aba yahaire omugisa, mugwetwe obukama obwabateekaniriziibwe okuruga ha kuhangwa kw'ensi; 35#Sir 7:32-36.habwokuba obu nkaba nindumwa enjara, mukampa ebyokulya; obu nkaba nyina iroho, mukampa ekyokunywa; obu naizire ndi mugenyi mukankunira; 36nkaba ndi busa, mukanjweka; obu nkaba ndwaire, mukaija mwandora; nkaba ndi omu nkomo, mukaija mwansuura.’ 37Nubwo abahikiriire balimugarukamu bati: ‘MUKAMA waitu, tukakurora di norumwa enjara, twakuha ebyokulya; rundi oina iroho, twakuha ekyokunywa? 38Kandi tukakurora di oli mugenyi twakukunira; rundi oli busa, twakujweka? 39Tukakurora di orwaire, rundi oli mu nkomo, twaija kukusuura?’ 40Mukama alibagarukamu ati: ‘Mazima nimbagambira nti: Eki mwakoliire omu hali abo abarukukira obuto omu bagenzi bange banu, buli mukakikorra nyowe.’

41“Nubwo aligambira abo abaliba bali ha mukono ogw'emoso ati: ‘Mundugeho inywe abakyenwa, mugende omu murro ogutaraara ogwateekaniriziibwe Sitaani n'abamalaika be; 42habwokuba nkaba nindumwa enjara, timwampa byokulya; nkaba nyina iroho, timwampa kyokunywa; 43obunaizire ndi mugenyi, timwankunira; nkaba ndi busa, timwanjweka; nkaba ndwaire, ndi n'omu nkomo, timwaija kunsuura.’ 44Nabo balimugarukamu bati: ‘MUKAMA waitu, tukakurora di norumwa enjara, rundi oina iroho, rundi oli mugenyi, rundi oli busa, rundi orwaire, rundi oli omu nkomo, twayanga kukukoonyera?’ 45Nubwo alibagarukamu ati: ‘Mazimakwo nimbagambira nti: Nkooku mutarakikoliire omu hali abo abarukukira obuto, buli mutakikorre nyowe.’ 46#Dan 12:2.Abo baligenda omu kubonabonesibwa okutalihwaho, baitu abahikiriire balitaaha omu bwomeezi obutalihwaho.”

Currently Selected:

Mat 25: BRR2008

Highlight

Copy