Mat. 6

Akitatamet ŋina ka akiŋaranakin

1“Tocoito nyitiyaete ŋiticisyo ŋulu ke edin alokiŋaren ŋituŋa, icamito atemar ikianyuwasi ikes iyes, anerae ani kitiyata iyes ikoŋina, nyiryamunete edioropit aneni a Papa kus a ŋolo eyai nakuj.

2“Ani iinakini iyoŋ akiŋarakinet neni a ituŋanan a ŋini a ŋican, nyejok akidelar alotuŋa ikwaŋina itiyaata ŋikaŋisoswae alosinagogae ka alorotin. Itiyaete ikes ŋun, ikotere kipuro ŋituŋa ikes. Akalimokini ayoŋ iyes kire atemar, adaut ikes aryamun eropit kec. 3Ani ilemikini iyoŋ ituŋanan ŋini a ŋican akiŋarakinet kon, nyiteyenu tari idiotuŋanan; 4ikotere akonikiŋarakinet eruwor ŋina imunono, ido Papa kon ŋolo ite ŋuna nyetakanete iŋes ikiropi iyoŋ.

Epite ŋolokilipet

5“Ani ilipete iyes, nyikokis ŋikaŋisoswae, anerae eminasi ikes akilip ewuasi alosinagogae ka alorotin; ikotere eanyuwaryata ŋituŋa ikes. Akalimokini ayoŋ iyes kire atemar, adaut ikes aryamun eropit kec. 6Nai ani ilipi iyoŋ, itemokino toloma nagule kon, togolok ekek, tosodi kilip neni a Papa kon a ŋolo nyetakani. Ido Papa kon ŋolo ite ŋuna itiyae iyoŋ anakimunono, iŋes ikiropi iyoŋ.

7“Ŋolopite ilipya iyoŋ, nyiyat ŋakiro ŋuna alalak ŋuna emam apolou, ikwa ŋituŋa ŋulu nyeyenete Akuj, ŋulu ebasi kori epedoryo akiirar ikes aŋuna a ŋakiro kec a ŋuna alalak. 8Nyikote ikes; anerae eyeni Papa kus ŋuna iitanito iyes eriŋa nyilipa.

Akilip ŋina ke Ekapolon

(Luk. 11:2-4)

9“Itemokino kilipeneneete ikona:

‘Papa kosi ŋolo iyai nakuj;

Ekonikiro tokeritetei,

10Akonipukan bu.

Kitiyae acamit kon alokwap,

ikwaŋina itiyaere anakuj.

11Inakinae isua nakoloŋit na

akosikimuj ŋina a jwi jwi;

12Kisyoni isua ŋasecisya kosi,

ikwaŋina ikisyoniyo isua daŋ ŋulu eseceneneete aneni kosi.

13Nyikiya isua nakitemyet,

nai toiunae isua aneni aronon.

[Anerae apukan ka apedor ka apolou

erae ŋuna kon,

ŋikaru ka ŋikaru. Amen.]’

14“Anerae ani kisyonioto iyes ŋulu eseceneneete neni kus, Papa kus daŋ ŋolo anakuj, ikisyoni iyes. 15Nai ani pa kisyonioto iyes ŋuluce, nyikisyoni Papa kus daŋ iyes.

Akiredakin akikany

16“Ani ikanyi iyoŋ, nyitasyono ikwa itasyonotor ŋikaŋisoswae. Elosete ikes esecec ŋireetin, ikotere eanyuniata ŋituŋa atemar ikanyete ikes. Akalimokini ayoŋ iyes kire atemar, adaut ikes aryamun eropit kec. 17Nai ani ikanyi iyoŋ, kilota ereet kon kikyera tari ŋitim; 18ikotere nyeanyuniata ŋituŋa atemar ikanyi iyoŋ, mati Papa kon ŋolo nyetakani; ido Papa kon ŋolo ite ŋuna anakimunono iŋes ikiropi iyoŋ.

Ebari ŋolo anakuj

(Luk. 12:33-34)

19“Nyituk aŋuna kus ebari nakwap na, neni epedorya esipiran ka eroiroi akinyasun ka neni epedoryata ŋikokolak akituwokin, tolemasi. 20Nai totuko aŋuna kus ebari nakuj, neni nyepedorya esipiran ka eroiroi akinyasun ka neni nyepedoryata ŋikokolak akituwokin, tolemasi. 21Anerae neni eyai ebari kon, iŋes eyai etau kon daŋ.

Akica ŋina ka akuwan

(Luk. 11:34-36)

22“Erae akoŋu etaa ŋolo ka akuwan. Ani nai kejok akoŋu kon, eyai akuwan kon daadaŋ nakica; 23nai ani kerono akoŋu kon, eyai akuwan kon daadaŋ nakiryonut. Ani nai kerae akica alotooma kon akiryonut, okoe etya akiryonut ŋin ai!

Akuj ka ebari

(Luk. 16:13, 12:22-31)

24“Emam ituŋanan ŋini epedori akitiya ŋiticisyo ŋulu a ŋikapolok a ŋiarei, eŋeri epei tosodi tominak ŋoloce, kori imiidikin neni ke epei tosodi tojamuwa ŋoloce. Nyipedorete iyes akitiyanakin Akuj ka ebari.

25“Aŋun, akalimokini ayoŋ iyes atemar, nyiyaloloŋete aŋuna ka akiyar kus; aŋuna a ibore a ŋini nyamat kori a ŋini matat. Nyiyaloloŋete tari aŋuna a ŋilowi a ŋulu napan. Meere mono akiyar iloit akimuj ka akuwan iloit ŋilowi a? 26Kiŋolikisi ŋikyeny: nyitaete, nyelemete ka nyetukete natukito, nai Papa kus ŋolo eyai nakuj iŋes itani ikes. Nyiloito nai iyes ŋikyeny a? 27Ŋae alokidiŋ kus alotooma akiyaloloŋ epedori akitooya akiyar keŋ? 28Nabo, nyo iyaloloŋioto iyes aŋuna a ŋilowi? Kiŋolikisi iyes epite ŋolo epolooto ŋatur ŋuna ka ariet; nyitiyaete kori nyedonyete ŋilowi. 29Nai akalimokini ayoŋ iyes atemar, tari Solomon ŋolo asirit nooi, amamukar ŋilowi ŋulu ebusak ŋulu ikote ŋatur ŋun. 30Akuj iŋes itanapi ŋinya ŋulu ka ariet --ŋinya ŋulu elibito tokona, nai ani moi kicunyae. Etya ekitanape ŋolo ikitanapya iŋes iyes ai? Okoe iyes ŋituŋa ŋulu edit anupit! 31Aŋun, nyiyaloloŋete ibasi, ‘Okoe nyo ikimuji, nyo ikimasi’ kori ‘Nyo ikinapi?’ 32(Erae ŋituŋa ŋulu nyenupito, ikes iwarito ŋiboro ŋul.) Eyeni Papa kus ŋolo anakuj atemar iitanito iyes ŋiboro lu daadaŋ. 33Nai kiwara mono Apukan ŋina anakuj ka akiyookino ŋina ka Akuj, toruworos nai ŋiboro ŋul daadaŋ ŋulu kus. 34Nyiyaloloŋete aŋuna a moi taparacu, anerae moi taparacu daŋ eyakar ŋuna keŋ. Kimyekisi ŋinakoloŋit kitemokin ŋican keŋ.

Currently Selected:

Mat. 6: NIB2008

Highlight

Copy