Mat. 18
18
Ŋae epol nooi a Napukan a ŋina anakuj?
(Mar. 9:33-37; Luk. 9:46-48)
1Apaki ŋin potu ŋikasyomak a Yesu neni keŋ kiŋita iŋes temasi, “Ŋae epol nooi a Napukan a ŋina anakuj?”
2Tonyarau Yesu ikoku, kitowuo alokidiŋ kec, 3tolimok ikes tema, “Akalimokini ayoŋ iyes kire atemar, mati kibelekinosi iyes kikokis ŋidwe ŋulu cicik, nyilomarete Napukan ŋina anakuj. 4Aŋun, ituŋanan ŋini itiditeun ikwa ikoku en, iŋes epol nooi a Napukan a ŋina anakuj. 5Ituŋanan ŋini ijauni ikoku ŋini cici ŋini ikoni en alokiro kaŋ, ekejau iŋes ayoŋ.
Aronis ŋina ka asecit
(Mar. 9:42-48; Luk. 17:1-2)
6“Nai ituŋanan ŋini iteseci ipei a ŋulu cicik a lu, a ŋulu akanupito ayoŋ, kitemokino iŋes toenikinae amoru ŋinakiryeet lomosiriŋ keŋ, kimasakinae nanam. 7Ekaŋ iyes ŋituŋa ŋulu itesecete ŋuluce! Anerae itemokino ŋakitemyet ŋun toyakaun, nai ekaŋ iŋes ŋini eyauni ikes!
8“Ani kikitesec iyoŋ akonikan kori akonikeju totubo tocaka. Ejok iyoŋ alomar nakiyar iŋwalit kori icodo, akilo ayakau ka ŋakan ŋaarei kori ŋakejen ŋaarei, ido itocakakin nakim ŋina nyeduŋe. 9Ani kikitesec iyoŋ akoŋu kon, togoro tocaka. Ejok iyoŋ alomar nakiyar emam apeikoŋu akilo ayakau ŋakonyen daadaŋ, ido itocakakin nakim ŋina nyeduŋe.
Akitadapet ŋina ka amesek a ŋina aolit
(Luk. 15:3-7)
10“Tocoito ijamuwarete tari ipei a ŋulu cicik a lu, anerae akalimokini ayoŋ iyes atemar, erukito ŋimalaikan kec jwi jwi ka Papa kaŋ ŋolo eyai nakuj. [ 11Anerae abuni Lokoku a Ituŋanan aiun ŋulu eolito.]
12“Nyaanu ŋuna itamete iyes? Ani keyakar ituŋanan ŋamesekin amiat, ido tooli apei, nyeesikini mono iŋes ŋuna tomononikanikaomwon ka ŋakanikaomwon anadakar, tosodi tolot akiwarit ŋina eolit a? 13Ani ŋina eryamunia iŋes amesek ŋin, akalimokini ayoŋ iyes kire atemar, elakar iŋes nooi aŋuna atakanunia amesek ŋin akilo ŋuna tomonikanikaomwon ka ŋakanikaomwon ŋuna pa aolito. 14Ikwaŋinapei ikoŋin, nyecamit Papa kus ŋolo anakuj atemar tooliyo ipei a ŋulu cicik a lu.
Akitatam lokaato kon ŋolo esecit
15“Ani kesec lokaato kon neni kon, tolot neni keŋ kiteyenik iŋes adyakaret keŋ aneni kus make. Ani kiira iŋes ŋuna ilimok iyoŋ, iŋes atemar inyaku iyoŋ lokaato kon. 16Nai ani pa kiira iŋes, ya ituŋanan ipei kori ŋiarei, ikotere kisuudata ŋituŋa ŋuluarei kori ŋuluuni ŋakiro daadaŋ ŋuna esecit iŋes. 17Ani erae kewou akiirar ikes, tolimok atukot a Ŋikristo. Ani nabo keŋer akiirar tari ŋuna elimokini atukot ŋin, kimyek iŋes kikok aneni kon ituŋanan ŋini nyenupit ŋakiro ŋuna ka Akuj kori kikok ekeriran ocur.
Akiŋer ka acamun
18“Akalimokini ayoŋ iyes daadaŋ kire atemar, ŋuna daadaŋ nyicamakinete iyes anakwap, nyecamakinio anakuj. Nai ŋuna icamunete iyes anakwap, ecamunio anakuj.
19“Nabo akalimokini ayoŋ iyes atemar, ani kecamunosi ŋiarei alokidiŋ kus anakwap, aŋuna a ibore a ŋini ilipasi ikes, itiyakini Papa kaŋ ŋolo anakuj neni kec. 20Anerae neni ecunakin ŋiarei kori ŋiuni alokiro kaŋ, ayakaun ayoŋ kidiŋ kec.”
Akitadapet ŋina ke eketiyan a ŋolo awouni akisyon ŋoloce
21Bu Petero neni ayai Yesu kiŋit iŋes tema, “Ekapolon, ŋarwa ŋayai itemokino ayoŋ esyoniyo lokaato kaŋ kesec neni kaŋ? Ŋarwa ŋakanikaarei a?”
22Toboŋok Yesu iŋes tema, “Nyabala ayoŋ ŋarwa ŋakanikaarei, nai ŋatomonikanikaarei ŋarwa ŋakanikaarei. 23Anerae ikoni Apukan ŋina anakuj ne, ayai erwosit ŋolo acamit aanyun ŋamicae keŋ ŋuna ayakatar ŋiketiyak keŋ. 24Ani isyakini iŋes etic ŋol, yaunae epei ŋolo edenit ŋitalantae ŋalipyo ŋatomon. 25Aŋuna pa apedorya eketiyan ŋol akitac eden, abu ekapolon tolimu atemar togyelarae iŋes, akeeberu, ŋikeedwe ka ŋinibore ayakar iŋes daadaŋ, totacere eden. 26Toryedik eketiyan alokiŋaren ekapolon todyek iŋes tema, ‘Ekapolon, inakinae kare ca adiopaki! Ataci ayoŋ eden daadaŋ.’ 27Tosodi ekapolon kisyoni eketiyan ŋol, kikisa tari eden, tolacak iŋes tolot.
28“Nai ŋolopite alosyo eketiyan ŋolopei ŋol kiŋa, kiryamunos ka epei ŋolo edeniyorit ŋidinari ŋulu akudyoko. Kikam tomyed tema, ‘Totac eden kaŋ!’ 29Toryedik eketiyan ŋol alokiŋaren keŋ todyek iŋes tema, ‘Inakinae kare ca adiopaki! Ataci ayoŋ eden daadaŋ.’
30“Nai abu iŋes towou, tolot kipotok iŋes mabus toenae akitodol neni etaca eden keŋ. 31Ani eanyuwarete ŋiketiyak ŋuluce ŋakiro ŋun, tobul nooi toloto tolimokis ekecekapolon ŋuna daadaŋ apotu totakanut. 32Tonyarau nai ekapolon eketiyan ŋol, tolimok tema, ‘Iyoŋ eketiyan ŋolo aronon, abu ayoŋ ekisa eden aŋuna ibunio iyoŋ ikidyek ayoŋ. 33Pa kitemokino iyoŋ daŋ akisyon eketiyan ŋoloce ikwaŋina abunio ayoŋ ekesyon iyoŋ a?’ 34Toŋo ekapolon nooi, kipotok iŋes mabus toenae akitodol neni etaca eden daadaŋ.”
35Toŋetak Yesu ebala, “Itiyakini Papa kaŋ ŋolo anakuj ikwaŋinapei neni kus erae pa kisyon ŋinituŋanan lokaato keŋ alotau.”
Currently Selected:
Mat. 18: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
