Mat. 19
19
Kitatam Yesu ŋuna ka akilak aberu
(Mar. 10:1-12)
1Ani kedau Yesu erwor ŋakiro ŋun, torotok alo Galileya todoka ekekwaye aŋolol Yorodan tari nakwap a Yudaya.
2Kiwuapito iŋes ŋasepico a ŋituŋa ŋuna alalak, kitaŋaleu iŋes ikes aina. 3Potu Ŋiparisayon ecamito akikatakin iŋes temasi, “Ecamakinito mono Ŋikisila yok ekile akilak akeeberu a ŋakiro a daadaŋ a ŋuna ecamit iŋes a?”
4Toboŋok Yesu tema, “Nyesyoma iyes Akigiret ŋina ebala, ‘Anakisyakinet abu Akuj tosub ekile ka aberu’ ka nabo, 5‘Aŋakiro a ŋun, eesikini ekile papa keŋ ka toto keŋ, kimorikinos ka akeeberu. Toruworos ŋuluarei ŋul apeikuwan’ a? 6Aŋun, nyeriŋa ikes erae ŋiarei, nai aruworosi apeikuwan. Aŋun, ŋulu emorik Akuj, nyitemokino idiotuŋanan etyaki.”
7Kiŋita Ŋiparisayon iŋes temasi, “Nyo bo acamakinitor Moses ekile ainakin aberu abaruwa ŋina ke elakit ido kirit iŋes?”
8Toboŋok Yesu ikes tema, “Aŋuna ka agogoŋu a ŋakyes kus, abu Moses itocamak iyes akilak ŋaberu kus. Nai amam ŋakiro ŋuna ekote ŋun anakisyakinet. 9Akalimokini ayoŋ iyes atemar, ŋinituŋanan elaki akeeberu tomam nyelomit aberu keŋ, tosodi kiit ace, eruwor ekaloman.”
10Tolimokis ŋikasyomak Yesu temasi, “Ani kikote ŋakiro ke ekile ka aberu nen, nyitemokino akiitar.”
11Toboŋok Yesu ikes tema, “Nyikamunito ŋakiro ŋun ŋituŋa daadaŋ mati ŋulu einakinit Akuj bon. 12Anerae egelegelya ŋakiro ŋuna nyepedoryata ŋituŋa akiitanar, ŋicetuŋa idounitoe ekolupaka, ŋice itokolupanete ŋituŋa ŋuluce; ŋice nyiitanarete aŋuna ka Apukan a ŋina anakuj. Iŋes ŋini epedori acamun akitatamet na, tocamu.”
Kiterereŋ Yesu ŋidwe ŋulu cicik
(Mar. 10:13-16; Luk. 18:15-17)
13Yaut ŋituŋa ŋice ŋidwe neni a Yesu, ecamito iŋes kidokok ŋakan keŋ nakyes kec kilipak, nai kiŋenyakis ŋikasyomak ŋituŋa. 14Nai tolimok Yesu ikes tema, “Kimyekisi ŋidwe potu neni kaŋ. Nyiretakis ikes, anerae erae Apukan ŋina anakuj ŋina a ŋulu ikote lu.” 15Kidokok nai iŋes ŋakan keŋ nakyes a ŋidwe. Ani kiterereŋ iŋes ikes, torotok a nen.
Ekile ŋolo abarit
(Mar. 10:17-22; Luk. 18:18-23)
16Bu epeikile neni a Yesu kiŋit iŋes tema, “Eketataman, nyo ibore ŋini ajokan ŋini itemokino ayoŋ etiya oryamunia akiyar ŋina nyedaun?”
17Toboŋok Yesu iŋes tema, “Nyo ikiŋisitor iyoŋ ayoŋ ibore ŋini ajokan? Eyai epei bon ŋolo ejok. Ani kicamit iyoŋ alomar nakiyar, kiric Ŋakiciketa.”
18Kiŋit iŋes Yesu tema, “Anukiciketa?” Toboŋok Yesu iŋes tema, “Nyiar, nyilom, nyikoko, nyisudi ŋakiro! 19Tokerite papa kon ka toto kon, ka tomina ekidunyet kon ikwaŋina iminar iyoŋ akonikuwan.”
20Toboŋok esorokit ŋol tema, “Ericakinit ayoŋ Ŋakiciketa ŋun daadaŋ; nyo nai eriŋa akabucit ayoŋ?”
21Tolimok Yesu iŋes tema, “Ani kicamit iyoŋ aruwor ituŋanan ŋini ajokan nooi, tolot togyela ŋiboro ŋulu iyakar iyoŋ daadaŋ tokorak lokulyak, ibu nai ikiwuapak ayoŋ. Iryamuni iyoŋ ebari kon anakuj.”
22Ani iirari esorokit ŋol ŋakiro ŋun, torotok esiliyorit, anerae abarit iŋes nooi.
Etyono ekabaran alomar nakuj
(Mar. 10:23-31; Luk. 18:24-30)
23Tolimok Yesu ŋikeekasyomak tema, “Akalimokini ayoŋ iyes kire atemar, etyonior nooi ekabaran alomar Napukan ŋina anakuj. 24Nabo akalimokini ayoŋ iyes atemar, epatana ekaal alomar anapedot a ŋina ke esindan akilo ekabaran alomar Napukan ŋina ka Akuj.”
25Ani iirarete ŋikasyomak a Yesu ŋakiro ŋun, toumokis nooi temasi, “Ŋae bo nai eiun?”
26Kitek Yesu ikes tema, “Alotuŋa nyepedorosi, nai aneni ka Akuj epedorosi ŋiboro daadaŋ.”
27Tema nai Petero eboŋokini, “Kiŋolik iyoŋ, ikiesik isua ŋiboro daadaŋ ikiwuapak iyoŋ. Nyo ikiryamuni isua?”
28Tolimok Yesu ikes tema, “Kire akalimokini ayoŋ iyes atemar, anakwap a ŋina kitete apaki ŋina iboikinor Lokoku a Ituŋanan lokicoloŋ ŋolo ka apolou keŋ anakuj, iboikinosi iyes daŋ ŋulu ikiwuapakis ayoŋ lokicoloŋo ŋulutomon ka ŋiarei, atubonokin ŋatekerin ŋunatomon ka ŋaarei ŋuna a Isirael. 29Nabo ituŋanan daadaŋ ŋini aesiki ekeere kori ŋikaitotoi keŋ, papa keŋ, toto keŋ, aberu keŋ, ŋidwe keŋ, kori ŋamanat keŋ aŋuna kaŋ, einakinio eropit ŋolo erae amiat ŋarwa amiat, ka eryamuni akiyar ŋina nyedaun. 30Nai ŋulu alalak ŋulu iŋarenete tokona, isidiyoryo; nabo ŋulu isidiyoro tokona, isiŋarenio.”
Currently Selected:
Mat. 19: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
