Mat. 20
20
Akitadapet ŋina a ŋiketiyak lomanikor
1“Ikoni Apukan ŋina anakuj ekapolon ŋolo abu kisyokak taparacu anyaraun ŋituŋa ŋulutacan akitiya lomanikor keŋ ŋolo ke epiini. 2Ani kecamunosi iŋes ka ŋiketiyak eropit ŋolo ka apeikoloŋit a ŋinituŋanan, kiyakiya iŋes ikes lomanikor keŋ. 3Ani edoli ŋisaae ŋiuni, tolot iŋes lomaket, toanyuwa ŋituŋa ŋice ewuasi emam ibore itiyaete. 4Tolimok ikes daŋ tema, ‘Apesi iyes daŋ etic lomanikor, abuni ayoŋ akitac iyes eropit ŋolo itemokino.’ Toloto nai ikes. 5Ani edoli ŋisaae ŋikanikapei ka ŋikanikaomwon, toboŋo iŋes nabo kitiya ikwaŋinapei. 6Ani edoli ŋisaae ŋitomon ka epei, toboŋo nabo toryamu ŋituŋa ŋice ewuasi. Kiŋit iŋes ikes, tema, ‘Kaanukiro iwuatar iyes a ne apaaran daadaŋ emam etic itiyaete?’ 7Toboŋokis ikes iŋes temasi, ‘Emam ro ituŋanan ikinyaraiya isua lotic.’ Tolimok iŋes ikes tema, ‘Toloto iyes daŋ etic lomanikor kaŋ ŋolo ke epiini.’
8“Ani edoli eboŋ, tolimok elope ŋolo ke emanikor eketiyan keŋ ŋolo apolokinit ŋuluce tema, ‘Tonyarau ŋiketiyak totac ikes eropit kec, kisyak mono akitac ŋulu apote ekaku, totac nai ŋulu esyaunete aponare.’ 9Ani epote ŋiketiyak ŋulu adolunete lotic ŋisaae ŋitomon ka epei, totacae ŋinituŋanan eropit ŋolo ka apeikoloŋit. 10Potu ŋituŋa ŋulu esyaunete lotic, etamete atemar kori ikitacio ikes ka eropit a ŋolo alalan; nai totacae ikes daŋ eropit ŋolo ka apeikoloŋit. 11Ani eryamunete ikes eropit, togeut akiŋuruŋura neni ke elope emanikor. 12Tolimokis temasi, ‘Apotu ŋituŋa lu ŋulu apote ekaku kitiyata epeisaa bon, nai etiyae isua apaaran daadaŋ erirae akoloŋ. Nyo bo itiriyania iyoŋ eropit kec ka ŋolo kosi?’
13“Nai toboŋok elope emanikor epeiketiyan tema, ‘Topupok ekone, nyakamodikinit ayoŋ iyoŋ, icamunit tete iyoŋ etic ŋolo ke eropit a ŋolo ka apeikoloŋit. 14Kijaa eropit kon tolot. Acamit ayoŋ ainakin ekile ŋolo abuni lomanikor ekaku eropit ŋolopei etya ŋolo kon. 15Amamukar mono ayoŋ apedori ŋinakisitiyaet ŋiboro kaŋ ikwaŋina acamitor a? Kori eyai iyoŋ arakao aŋuna ka arimaanut kaŋ?’”
16Kirikak Yesu erwor ebala, “Ŋituŋa ŋulu esidyok, eruworosi ŋulu eŋarenok ka ŋulu eŋarenok, eruworosi ŋulu esidyok.”
Kirwor Yesu akirworet ŋina a ŋauni ŋakiro ŋuna ka atwanare keŋ
(Mar. 10:32-34; Luk. 18:31-34)
17Ani itipe Yesu elosi Yerusalem, ya ŋikasyomak keŋ ŋulutomon ka ŋiarei nawae tolimok tema, 18“Kiirasi! Ikidokari tokona iwon Yerusalem neni ipotokinere Lokoku a Ituŋanan losacaradotin ŋulu apolok ka loketatamak a Ŋikisila. Etubokinete ikes iŋes atwanare. 19Ipotokinete ikes iŋes neni a ŋibukui a ŋulu nyerae Ŋiyudayan, kisoloto, kibuŋata ka kibubukis lomusalaba. Nai kelunyar ŋirwa ŋiuni, iteyarunio iŋes alokatwak.”
Akilipa ŋina a toto a Yoana ka Yakobo
(Mar. 10:35-45)
20Bu aberu a Sebedeo ka ŋidwe keŋ ŋuluarei neni a Yesu, toryedik alokiŋaren keŋ, kiŋit ŋuna acamit iŋes. 21Kiŋit Yesu iŋes tema, “Nyo icamit iyoŋ?” Toboŋok iŋes tema, “Kiikinae kare ca ayoŋ aŋuna a ŋisapa kaŋ a ŋuluarei a lu, atemar, kiboikin epei teten kon ka ŋoloce kedyany kon.” 22Toboŋok Yesu ikes tema, “Nyiyenete iyes ŋuna iŋitasi. Ipedorete iyes akimat ekopo ŋolo a ŋican ŋolo alosi ayoŋ akimat a?” Toboŋokis ikes temasi, “Ikipedori.”
23Tolimok Yesu ikes tema, “Kire imasete ekopo kaŋ, nai ŋuna ka akiboikin teten ka kedyany kaŋ, nyerae apedor kaŋ ainakin. Erae ŋakiboisyo ŋun ŋuna a ŋulu eseunit Papa kaŋ.”
24Ani iirarete ŋikasyomak ŋuluce ŋulutomon ŋakiro ŋun, toŋoikis ŋikaitotoi ŋuluarei ŋul. 25Tonyarau nai Yesu ŋikeekasyomak daadaŋ tolimok ikes tema, “Iyenete iyes atemar ŋikepukak a ŋakwapin ipukato ŋakwapin ka adedeŋu, ka ŋulu epolokinito ikes daŋ, ipukato ka apedor. 26Nai nyitemokino ŋun totakanut aneni kus; ani ŋini ecamit apolou alokidiŋ kus, itemokino toruwor eketiyan kus. 27Nabo ŋini ecamit akiŋarenikin ŋuluce alokidiŋ kus, itemokino iŋes toruwor epito kus. 28Ikwaŋinapei, pa abunit Lokoku a Ituŋanan akitiyanakino, nai abunit akitiyanakin ka akijal akeekiyar tolakunere ŋulu alalak.”
Kitaŋaleu Yesu ŋimudukanotin ŋiarei
(Mar. 10:46-52; Luk. 18:35-43)
29Ani erotokinete Yesu ka ŋikasyomak keŋ alo Yeriko, totupak asepic a ŋituŋa ŋina alalan iŋes. 30Eboiyete ŋimudukanotin ŋiarei anawae erot. Ani iirarete ikes atemar itorunit Yesu nen, kiworout temasi, “Lokoku a Daudi, kisyoni isua!”
31Kiyayakis ŋituŋa ikes akililiŋ, nai toreboros ikes kiworout nooi temasi, “Ekapolon, Lokoku a Daudi, kisyoni isua!”
32Towo Yesu, tonyara ikes kiŋit tema, “Nyo icamito iyes etiyak ayoŋ neni kus?”
33Toboŋokis ikes temasi, “Ekapolon, kitekienyu ŋakosikonyen.”
34Kisyoni Yesu ikes totap ŋakonyen kec, tokienyut ikes atipei, kiwuapakis iŋes.
Currently Selected:
Mat. 20: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
