Mat. 21
21
Toloma Yesu Yerusalem
(Mar. 11:1-11; Luk. 19:28-40; Yoa. 12:12-19)
1Ani eapiyarete Yesu ka ŋikeekasyomak Yerusalem, todolo Betepage, diyete emoru a ŋikito a ŋulu enyaritae Olipa. Kiyakiya Yesu ŋikasyomak keŋ ŋiarei kiŋaren, 2tolimok ikes tema, “Toloto lore ŋolo eyai kiŋaren kus, iryamunete asigirya eenitae ka ikeetaok. Tolacut ikes torikut neni kaŋ. 3Ani kikiŋit iyes idiotuŋanan ŋakiro ŋadi, tolimokis iŋes atemar, ‘Ekapolon iŋes iitanit ikes.’ Ecamunia iŋes ikes atipei.”
4Apotu ŋakiro ŋun kitiyakin, ikotere kiyookinotor ŋuna koloŋ adwarit ekadwaran ebala,
5“Tolimokisi ŋituŋa a Sion atemar,
kiŋolikisi, ebunit Erwosit neni kus!
Itiditeuna iŋes ka edokit isigirya,
itaok ŋini ka asigirya.”
6Toloto nai ŋikasyomak kitiyata ikwaŋina alimokinitor Yesu ikes. 7Yaut ikes asigirya ka itaok keŋ neni keŋ, topetakis ŋilowi kec kidiama ŋisigirya, todoka nai Yesu kiboikin. 8Topetanakis ŋituŋa ŋulu alalak ŋikecelowi lorot, kitelut ŋice ŋaten alokito topetakis lorot. 9Tocalut ŋasepico a ŋituŋa ŋuna ayakasi kiŋaren Yesu ka ŋulu ewuapito iŋes ebasi, “Osanna Lokoku a Daudi! Erereŋ ŋolo ebunit alokiro ke Ekapolon! Osanna toyai kidiama nooi!”
10Ani elomari Yesu Yerusalem, kiguryakinos ŋituŋa daadaŋ alotaun temasi, “Ŋae en?”
11Toboŋokis ŋasepico a ŋituŋa temasi, “Erae ŋol ekadwaran, Yesu ŋolo a Nasaret anakwap a ŋina a Galileya.”
Toloma Yesu Kai ka Akuj
(Mar. 11:15-19; Luk. 19:45-48; Yoa. 2:13-22)
12Toloma Yesu Kai ka Akuj, kirita ŋituŋa ŋulu agyelanarete ka ŋulu agyelete ŋiboro alo Kai ka Akuj. Tobuburiyana ŋimesae a ŋulu esyecete ŋisiliŋa ka ŋikicoloŋo a ŋulu agyelanarete ŋakuryo; 13tolimok ikes tema, “Igiritae Nakigireta atemar, ebala Akuj, ‘Enyarao Akai kaŋ Akai ŋinakilipet.’ Nai tokona ituruwosi iyes iŋes Akai ŋina eŋopitotor ŋikokolak.”
14Potu ŋimudukanotin ka ŋikaŋwalak neni keŋ alo Kai ka Akuj, kitaŋaleu iŋes ikes.
15Nai toŋoa ŋisacaradotin ŋulu apolok ka ŋiketatamak a Ŋikisila, iŋolikinete ŋakiro ŋuna ka aumokin ŋuna etiyae Yesu; ka daŋ ŋakiro ŋuna acalatar ŋidwe alo Kai ka Akuj ebasi, “Osanna Lokoku a Daudi!” 16Kiŋita ikes Yesu temasi, “Ipupi iyoŋ ŋakiro ŋuna irworosi ikes a?”
Toboŋok Yesu ikes tema, “Apupi. Nyesyoma iyes ŋuna igiritae Nakigireta atemar, ‘Itaanyu iyoŋ ŋidwe ŋulu cicik ka ŋulu enakete akipuro ejok!’ ”
17Toesik nai Yesu ikes, toloma kiŋa etaun, tolot tari Betania, toper inaa.
Kicen Yesu ebobore
(Mar. 11:12-14, 20-24)
18Ani taparacu eboŋori Yesu lotaun, tonyam akoro iŋes. 19Ani iŋolikini iŋes ebobore anawae, tolot neni keŋ, nai nyeryamu idiobore, mati ŋakwii bon. Tolimok iŋes ekitoe tema, “Nyiraii nabo iyoŋ jik.” Toono ebobore atipei.
20Ani iŋolikinete ŋikasyomak ŋakiro ŋuna apotu kitiyakin lokitoe, toumokis temasi, “Ekokini ebobore lo eoni atipei ai?”
21Toboŋok Yesu ikes tema, “Akalimokini ayoŋ iyes kire atemar, ani iyakatar iyes anupit ka nyiŋayaŋayato, itiyaete iyes ŋuna etiyak ayoŋ lobobore. Meere ŋuna bon, ilimokinete tari emoru lo atemar ‘Kiyoto a ne, kimasar nanam,’ itiyakinio. 22Ŋuna daadaŋ iŋitasi iyes anakilip iryamunete, erae kiyakatar iyes anupit.”
Kiŋitae Yesu temarae, “Anipedor iyakar iyoŋ?”
(Mar. 11:27-33; Luk. 20:1-8)
23Ani elomari Yesu Kai ka Akuj, potu ŋisacaradotin ŋulu apolok ka ŋikatukok neni keŋ apaki ŋina etatamya iŋes, kiŋita temasi, “Anipedor iyakar iyoŋ, ŋina itiyaa ŋakiro nu? Ŋae ikiinakinit iyoŋ apedor na?”
24Toboŋok Yesu ikes tema, “Ekeŋisi ayoŋ daŋ iyes apeikiŋiset; ani kikiboŋokis iyes ayoŋ, akalimokini ayoŋ daŋ iyes neni ebunitor apedor ŋina etiyaa ayoŋ ŋakiro nu. 25Ai abunitor akibatis a Yoana, nakuj kori lotuŋa?”
Kiŋitanaros ikes make ebasi, “Ani kikitema abunit aneni ka Akuj, etemari iŋes, ‘Nyo bo pa inupitotor iyes iŋes?’ 26Nai kikitema abunit alotuŋa, itemokino iwon ocoito ŋituŋa, anerae enupito ikes daadaŋ atemar arae Yoana ekadwaran.” 27Toboŋokis ikes temasi, “Nyikiyeni isua.”
Toboŋok Yesu daŋ ikes tema, “Ayoŋ daŋ nyakalimokini iyes neni ebunitor apedor ŋina etiyaa ayoŋ ŋakiro nu.”
Akitadapet ŋina a ŋisapa a ŋiarei
28“Nyo itamete iyes? Ayai koloŋ ekile ŋolo ayakar ŋisapa ŋiarei. Tolot iŋes neni a ŋolo apolon tema, ‘Lokoku, ape kitiya lomanikor ŋolo ke epiini nakoloŋit na.’ 29Toboŋok edya tema, ‘Nyalosi ayoŋ.’ Nai ekaku apotu toronikis ŋuna abu iŋes tolimu, ido tolot. 30Tolot ekile nabo neni a ŋolo cici, tolimok ŋakiro ŋunapei ŋun. Tocamu iŋes tema, ‘Ee papa, alosi.’ Nai abu nyelot. 31Ali alosapa a ŋuluarei a ŋul abu kitiya ŋuna acamit papa keŋ?” Toboŋokis ŋituŋa temasi, “Ŋolo apolon.” Tolimok Yesu ikes tema, “Akalimokini ayoŋ iyes kire atemar, elomarete ŋikerirak ocur ka ŋamalaae Napukan ka Akuj eriŋa iyes. 32Anerae abu Yoana Ekebatisan bu neni kus akitoodikin iyes erot ŋolo itemokino iyes kiwuapa, ipotu iyes nyinupa ŋakiro keŋ. Nai apotu ŋikerirak ocur ka ŋamalaae tonupa ŋakiro keŋ. Tari kidaut iyes aanyuwar ŋakiro ŋun, ipotu nyikiwa alotai kus tonupa iŋes.
Akitadapet ŋina a ŋiketeok emanikor
(Mar. 12:1-12; Luk. 20:9-19)
33“Kiirasi akitadapet ace. Ayai ekapolon ŋolo abu kita emanikor ŋolo a ŋikito a ŋulu ecuyo epiini, towuak awuas kiryam, tobokak akipany ŋina cuet epiini ka todukok epemu; ido kicikak neni a ŋiketeok emanikor, tolot nai iŋes nakwap ace. 34Ani edoli apaki ŋina lemet, kiyakiya iŋes ŋiketiyak keŋ neni a ŋiketeok emanikor akijaun ŋaraito. 35Kikamut ŋiketeok emanikor ŋipi, kibuŋata epei, toara ŋoloce ka kimasamasata ŋoloce a ŋamoru. 36Kiyakiya nabo elope emanikor ŋipi ŋice ŋulu alalak ŋulu eloito ŋulu sek eyakiyarit iŋes ekiŋaren; kitiyata neni kec daŋ ikwaŋinapei. 37Ekaku aŋun, kiyakiya iŋes lokoku keŋ neni a ŋiketeok emanikor ebala, ‘Ekerete ikes lokoku kaŋ.’ 38Nai ani iŋolikinete ŋiketeok emanikor lokoku ke elope emanikor, kirworiut make temasi, ‘Lokoku keŋ ŋol. Potu oara iŋes eruma iwon emanikor ŋolo ke epiini!’ 39Kikamut ŋiketeok emanikor iŋes kijukujukaasi kiŋa awuas, toarakis nen. 40Nyo nai ebuni elope emanikor akitiyakin neni kec eboŋuni?”
41Toboŋokis ikes temasi, “Ebuni iŋes akiar ŋituŋa ŋulu aronok ŋul, kijokok emanikor neni a ŋiketeok a ŋice a ŋulu einakinete iŋes ŋaraito.”
42Tolimok Yesu ikes tema, “Nyesyoma iyes ŋuna igiritae Nakigireta atemar,
‘Amoru ŋina koloŋ aŋerete ŋikadukok,
iŋes tokona itogogoŋit akai alokoona a?
Ekapolon elope etiyae nu,
erae ŋakiro nu ŋuna etalakarak ŋuna ikite iwon!’
43“Aŋun, akalimokini ayoŋ iyes atemar, elemaryo Apukan ka Akuj aneni kus, inakinae neni a ŋituŋa a ŋulu iraete ŋaraito. [ 44Ituŋanan daadaŋ ŋini eramakin namoru ŋin, enyilinyilaar, anikecakakin amoru ŋin kidiama ice, inyaadiyari iŋes.]”
45Ani iirarete ŋisacaradotin ŋulu apolok ka Ŋiparisayon ŋakitadapeta ŋun, toyenut atemar arae ikes erworor Yesu. 46Nai ani ikatakinete ikes akikamun Yesu, tokuryaketa aŋuna a ŋasepico a ŋituŋa a ŋuna atamete atemar erae Yesu ekadwaran.
Currently Selected:
Mat. 21: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
