Mat. 17
17
Kilocokin akuwan a Yesu
(Mar. 9:2-13; Luk. 9:28-36)
1Kelunyar ŋirwa ŋikanikapei, ya Yesu Petero, Yakobo, ka Yoana lokaato keŋ a Yakobo, todokasi ikes make kidiama emoru ŋolo aoyan. 2Kilocokin akuwan keŋ alokiŋaren kec, tocau ereet keŋ ikwa akoloŋ ka tokwaŋiata ŋilowi keŋ ikwa akica. 3Apaki ŋin, toanyuwasi ikes Moses ka Eliya irworosi ka Yesu. 4Tolimok Petero Yesu tema, “Ekapolon, ejok nooi iwon akiboi a nege. Ani kikijoikinit iyoŋ, adukokini ayoŋ ŋitogoi ŋiuni ne, epei ŋolo kon, epei ŋolo a Moses ka epei ŋolo ke Eliya.”
5Ani eriŋa Petero irworo, bu edou ŋolo akwaŋan kya, torapuwa ikes aribo kirworik etoil alodou ebala, “Erae lo Lokoku kaŋ ŋolo minat, ŋolo alelyania ayoŋ, topupo iŋes!”
6Ani iirarete ŋikasyomak ŋakiro ŋun, toramakinos kwap kijuuroto ebulit. 7Nai bu Yesu totap ikes tema, “Tonyoutu, nyikibul!” 8Ani ikeunete ikes ŋireetin, kiŋolikis Yesu bon emam ituŋanan ice.
9Ŋolopite adokuniata ikes alomoru, kicik Yesu ikes tema, “Nyilimokis idiotuŋanan atakanikinet ŋin akitodol apaki ŋina iteyarunere Lokoku a Ituŋanan alokatwak.”
10Kiŋita ŋikasyomak Yesu temasi, “Kaanukiro nai abaakatar ŋiketatamak a Ŋikisila itemokino kisyau mono Eliya abunore?”
11Toboŋok iŋes ikes tema, “Kire ebuni mono Eliya kitemonok ŋakiro daadaŋ. 12Nai akalimokini ayoŋ iyes atemar, aberakin Eliya abunore, nai pa ayenete ŋituŋa iŋes, apotu kitiyata neni keŋ ŋuna acamito ikes. Ikwaŋinapei, Lokoku a Ituŋanan daŋ iteryamunete ikes ŋican.”
13Toyenut nai ŋikasyomak atemar erworo iŋes ŋuna a Yoana ke Ekebatisan.
Kitaŋaleu Yesu edya ŋolo ekamunit ekipye
(Mar. 9:14-29; Luk. 9:37-43a)
14Ani epote Yesu ka ŋikasyomak keŋ nasepic a ŋituŋa, bu ekile ece neni a Yesu, toryedik alokiŋaren keŋ tema, 15“Ekapolon, kisyoni lokoku kaŋ, anerae ikamunit ekipye iŋes ka isicanit nooi, imasanakin nakim ka nakipi daŋ. 16Abu ayoŋ oyau iŋes lokasyomak kon, nai apotu nyepedosi akitaŋaleun.”
17Toboŋok Yesu tema, “Iyes ŋituŋa ŋulu nyinupito ka ŋulu ioliyorito! Ikiruki mono ayoŋ ka iyes tari ori? Akadaŋi ayoŋ iyes tari ori? Yautu edya neni kaŋ.” 18Kiŋenyak Yesu ekipye alodya, tolomu, toŋaleu edya atipei. 19Potu nai ŋikasyomak neni a Yesu, kiŋita iŋes aneni kec make temasi, “Nyo bo pa ikipedorya isua akiritar ekipye ŋol?”
20Toboŋok Yesu ikes tema, “Anerae edit anupit kus. Akalimokini ayoŋ iyes kire atemar, ani iyakatar iyes anupit ŋina edit ikwa icokit ŋini ikoni ŋini ke ebobore, ilimokinete tari emoru lo atemar, ‘Kiyoto a ne, tolot ama,’ iyotori; ka emam ibore ŋini ikipiyori iyes akitiyakin. [ 21Nai nyenyouni ŋolo ikoni ŋol, mati kiritar ka akilip ka akikany.]”
Kirwor Yesu nabo ŋuna ka akeetwanare
(Mar. 9:30-32; Luk. 9:43b-45)
22Ani ecunakinosi ŋikasyomak a Yesu daadaŋ Galileya, tolimok Yesu ikes tema, “Aapuu apaki ŋina ipotokinere Lokoku a Ituŋanan nakan a ŋituŋa, 23a ŋulu earete iŋes. Nai kelunyar ŋirwa ŋiuni, iteyarunio iŋes.”
Aŋun, kiyaloloŋo ŋikeekasyomak nooi.
Akitac ocur ŋolo ka Akai ka Akuj
24Ani epote Yesu ka ŋikeekasyomak Kaperenaum, toloto ŋikerirak ocur ŋolo ka Akai ka Akuj neni a Petero kiŋita iŋes temasi, “Etacenene mono eketataman kus ocur ŋolo ka Akai ka Akuj a?”
25Toboŋok Petero tema, “Ee ca!” Ani elomuni Petero kai, kisyau Yesu akiŋit iŋes tema, “Anu itami iyoŋ Simoni? Neni ataŋae iriraata ŋirwosi ŋulu ka akwap ocur, neni a ŋituŋa a ŋulu ka akwap kec kori lotuŋa ŋulu erae ŋigelae?”
26Toboŋok Petero tema, “Neni a ŋituŋa a ŋulu gelae.” Toboŋok Yesu iŋes tema, “Iŋes atemar nyitemokino ŋilopeyek akwap etacete ocur. 27Nai aŋuna nyikicamitor ikes ikiŋoikis iwon, tolot nanam tocakak ekodocet, tolemu ekolya ŋolo isyauni akirum. Toŋaa akeekituk, iryamuni iyoŋ ŋisiliŋa ŋulu itemokino otacata ocur kaŋ ka ŋolo kon.”
Currently Selected:
Mat. 17: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
