Mat. 16

Kiitana ŋikarikok ŋulu ke edin ŋice adiokujuwuanut aneni a Yesu

(Mar. 8:11-13; Luk. 12:54-56)

1Potu Ŋiparisayon ka Ŋisadukayon neni a Yesu, kiŋita iŋes akitiyakin adiokujuwuanut ŋina ebunit anakuj. 2Toboŋok Yesu ikes tema, “Apaki ŋina edoiyorya akoloŋ itemarete iyes, ‘Ejokyar moi akwap, anerae ereŋ adis.’ 3Ani ereŋ adis taparacu, itemarete iyes, ‘Elosi akiru akilim, anerae ereŋ adis ka idisit neni ikitubuli.’ Iyenete iyes apolou ke epite ŋolo eyakar adis, nai ikipiyorit ayenun apolou a ŋakiro a ŋuna itiyasi ŋirwa lu! 4Eroko nooi ŋituŋa a ŋirwa a lu nyekerito tari ŋina erae Akuj! Iwarito akitoodikinet ŋina ailiilon! Nai emam akitoodikinet ace ŋina ailiilon ŋina itoodikinio ikes mati ŋina ke ekadwaran a Yona.” Torotok nai Yesu toesik ikes.

Tocoito ekitatame ŋolo a Ŋiparisayon ka ŋolo a Ŋisadukayon

(Mar. 8:14-21)

5Ani edolete ŋikasyomak a Yesu ekekwaye anam, totamut atemar kimuryak ikes ayaun ŋamugati. 6Tolimok Yesu ikes tema, “Tocoikinito ŋakinyalet ŋuna a Ŋiparisayon ka a Ŋisadukayon.” 7Kirworikis ikes make temasi, “Irworo iŋes ŋun, anerae nyeyaunitae iwon ŋamugati.” 8Nai aŋuna ayenia Yesu ŋuna erworosi ikes, tolimok ikes tema, “Iraakasi iyes ŋituŋa ŋulu edit anupit, kaanukiro irworotor iyes make ibasi imamukatar ŋamugati? 9Ikwa eriŋa iyes nyeyenuna a? Nyitamunito iyes ŋina anyilinyilia ayoŋ ŋamugati ŋunakan ŋuna apotu ŋikilyok ŋalipyo ŋakan kimuja a? Ŋaditae ŋayai ipotu iyes kilelebikis akimuj ŋina apiyanun? 10Ani bo ŋamugati ŋunakanikaarei ŋuna emujete ŋikilyok ŋalipyo ŋaomwon, ŋaditae ŋayai ipotu iyes kilelebikis akimuj ŋina apiyanun? 11Ikokinete nai iyes pa iyenete atemar pa erworo ayoŋ neni kus aŋuna a ŋamugati ai? Nai tocoikinito ŋakinyalet ŋuna a Ŋiparisayon ka ŋuna a Ŋisadukayon.” 12Toyenut nai ŋikasyomak atemar meere ŋakiro a ŋamugati aŋuna emam ŋasip kec erworo Yesu, nai ŋakiro ŋuna itatamete Ŋiparisayon ka Ŋisadukayon.

Toboŋok Petero Yesu tema, “Irae iyoŋ Kristo”

(Mar. 8:27-30; Luk. 9:18-21)

13Ani elosi Yesu nakwap ŋina anyaritae Kaisaria Pilipi, kiŋit iŋes ŋikeekasyomak tema, “Ebasi mono ŋituŋa ŋae ayoŋ ŋolo abala arae Lokoku a Ituŋanan?” 14Temasi ikes eboŋokinete, “Ebasi ŋice Yoana Ekebatisan, ebasi ŋice Eliya, ka ebasi ŋice Yeremiya, kori epei alokadwarak.” 15Kiŋit Yesu ikes tema, “Ani bo iyes ibasi ŋae ayoŋ?” 16Toboŋok Simoni Petero tema, “Irae iyoŋ Kristo, Lokoku ka Akuj a ŋina eyari.” 17Tolimok Yesu Petero tema, “Irereŋ iyoŋ Simoni lokoku a Yona, anerae meere ituŋanan ikisileerek iyoŋ ŋakiro ŋun, nai erae Papa kaŋ ŋolo eyai nakuj. 18Akalimokini ayoŋ iyoŋ atemar, irae iyoŋ Petero, (apolou keŋ atemar ataaba.) Nataaba ŋin iŋes adukokini ayoŋ akai kaŋ ka nyepedori atwanare akiloun iŋes. 19Akainakini ayoŋ iyoŋ ŋikipuŋguwoi ŋulu ka Apukan a ŋina anakuj; ŋuna nyicamakini iyoŋ anakwap nyecamakinio tari anakuj; ka ŋuna icamakini iyoŋ anakwap ecamakinio anakuj.” 20Kicik nai iŋes ŋikeekasyomak nyelimokis ituŋanan ice atemar erae iŋes Kristo.

Kirwor Yesu ŋuna ka atwanare ka ayarun keŋ

(Mar. 8:31-33; Luk. 9:22)

21Ameun apaki ŋinapei ŋin, togeu Yesu akisileerekin ŋikasyomak keŋ tema, “Itemokino ayoŋ olot Yerusalem ekesicani nooi alokatukok, alosacaradotin a ŋulu apolok, aloketatamak a Ŋikisila ka okaari. Nai kelunyar ŋirwa ŋiuni, ayaruni.” 22Tonyaraiya Petero Yesu nawae togeu akisibura iŋes ebala, “Meere ikoŋina Ekapolon! Nyiryamasi ca ka ŋuna!” 23Toboboŋ Yesu tolimok Petero tema, “Tolot aneni kaŋ Satan! Irae iyoŋ ŋolo ikiretakinit ayoŋ, anerae ŋatameta kon nyeponito aneni ka Akuj, nai eponito alotuŋa.”

Alimokinet ŋina ka aŋero bon

(Mar. 8:34-38, 9:1; Luk. 9:23-27)

24Tolimok nai Yesu ŋikeekasyomak tema, “Ŋinituŋanan ecamit akiwuapakin ayoŋ, itemokino toŋero bon, toryoŋ emusalaba keŋ, ekewuapak ayoŋ. 25Anerae ituŋanan daadaŋ ŋini iwarit akiricun akiyar keŋ, itotwaniyari, nai ŋini ejali akiyar keŋ aŋuna kaŋ eyari. 26Alipoida eryamuni ituŋanan erae keŋata iŋes akwap daadaŋ, nai totwania akiyar keŋ? Mam jik! Kori nyo epedorya ituŋanan akisyecia akiyar keŋ? 27Anerae ebuni Lokoku a Ituŋanan ka apedor a ŋina a Papa keŋ erukito ka ŋimalaikan, torop ŋinituŋanan ikwaŋina itiyator. 28Akalimokini ayoŋ iyes kire atemar, eya nege ŋice ŋulu nyetwakete nyeanyuwara Lokoku a Ituŋanan ebuni anapolou keŋ.”

Currently Selected:

Mat. 16: NIB2008

Highlight

Copy