Mat. 15

Akitatam ŋina atapapaa

(Mar. 7:1-13)

1Potu Ŋiparisayon ka ŋiketatamak a Ŋikisila alo Yerusalem neni a Yesu kiŋita iŋes temasi, 2“Nyo nyiwuapitotor ŋikasyomak kon ŋitalyo ŋulu atapapaa yok? Anerae nyilotanarete ikes ŋakan kec eriŋa nyimuja!” 3Toboŋok Yesu ikes tema, “Kaanukiro bo ibilitotor iyes daŋ ŋakiciketa ŋuna ka Akuj, aŋuna ka akiwuapya ŋulu kus? 4Anerae ikicikakinit Akuj atemar, ‘Tokerite papa kon ka toto kon ka ituŋanan ŋini iceni papa keŋ kori toto keŋ, itemokino totwan jik.’ 5Nai ibasi iyes, Ani ketema ituŋanan isirwori papa keŋ kori toto keŋ, ebe, ‘Ŋini adikino iyoŋ iryamuni aneni kaŋ, erae ŋini einakinitae Akuj,’ 6nyitemokino iŋes ainakin papa keŋ ibore ŋin. Iŋes nai atemar ijamakis iyes akirot ka Akuj aŋuna a ŋitalyo kus. 7Iyes ŋikaŋisoswae! Eyookinit kire koloŋ Isaya edwari aŋuna kus ebala,

8‘Eketopoloorito ayoŋ ŋituŋa lu alorwor kec,

nai elwaka ŋikecetai aneni kaŋ.

9Nabo ilipete ikes neni kaŋ koŋin,

anerae itatamete ikes ŋitalyo a ŋituŋa esibit ŋulu ka Akuj!’ ”

Ibore ŋini itoroniyari ituŋanan

(Mar. 7:14-23)

10Tonyarau nai iŋes ŋituŋa neni keŋ tolimok tema, “Topupokisi ikotere iyenunete! 11Meere ibore ŋini elomari nituŋanan epedori akitoroniyar iŋes; nai ŋini elomuni anituŋanan iŋes itoroniyari iŋes.” 12Potu nai ŋikasyomak neni keŋ tolimokis iŋes temasi, “Iyeni iyoŋ atemar abu takadak Ŋiparisayon, iirarete ŋakiro ŋuna ilimuni iyoŋ a?” 13Toboŋok Yesu ikes tema, “Ekitoe daadaŋ ŋolo nyerae papa kaŋ ŋolo anakuj edupakinit, erutoryo. 14Kimyekisi ikes make. Erae ikes ŋikarikok ŋulu emudukaka alokidiŋ ŋimudukanotin ŋuluce. Ani kerik ituŋanan ŋini emudukana emudukanot, imasakinosi ikes daadaŋ nauwuat.”

15Nai kiŋit Petero Yesu tema, “Tolimokinae isua apolou ŋina ka akitadapet a ŋin.”

16Tolimok Yesu ikes tema, “Ibaŋaaka iyes daŋ ikote ŋuluce. 17Nyiyenete iyes atemar ibore daadaŋ ŋini itori nakituk a ituŋanan elosi tooma nakook, ani ekaku tolunyar toloma kiŋa a? 18Nai ŋakiro ŋuna itorunete nakituk a ituŋanan eponito alotau, ido tomunaasi ituŋanan; 19anerae lotau elomununiata ŋakiro ŋuna aronok, ikwa: akiar, elomi, amalao, akoko, alyokonu ka akiyany. 20Ŋun ikes itoroniyarete ituŋanan, nai meere akimuj nyilotara ŋakan itoroniyari ituŋanan.”

Anupit ŋina ka aberu a ŋina pa arae Ayudayat

(Mar. 7:24-30)

21Torotok Yesu a nen, tolot nakwap ŋina alodiye Tiro ka Sidon. 22Bu aberu ŋina arae Akananait ŋina ayai nakwap ŋin, kimaima Yesu tema, “Ekapolon, Lokoku a Daudi! Kisyoni ayoŋ! Edyaka nakoku kaŋ, ikamunit ekipye iŋes!” 23Nai nyelimok Yesu iŋes adiokirot. Ani epote ŋikasyomak keŋ kimaimaa iŋes temasi, “Kirita aberu na tolot! Anerae ikicalanakini iŋes iwon!” 24Toboŋok Yesu ikes tema, “Ekeyakuunitae ayoŋ neni a ŋituŋa a Isirael make, a ŋulu eoliyorito ikwa ŋameseekin.” 25Nai abu aberu ŋin toryedik alokiŋaren keŋ tema, “Ekapolon, kiŋarakinae!” 26Toboŋok Yesu iŋes tema, “Nyejok akimuj a ŋidwe einakinio ŋiŋokwo.” 27Tema aberu elimokini Yesu, “Ee, Ekapolon, nai ŋiŋokwo daŋ idepete ŋarare ŋuna ka akimuj ŋuna ecakunun alomesae a ŋikecekapolok.” 28Tosodi Yesu toboŋok iŋes tema, “Aberu, epol akoninupit, kitiyakin neni kon ikwaŋina icamitor iyoŋ.” Toŋaleu nakoku keŋ apaki ŋinapei ŋin.

Kitaŋaleu Yesu ŋituŋa ŋulu alalak

29Torotok Yesu a nen kitor diye anam ŋina alo Galileya, todoka lomukura kiboikin. 30Potu ŋasepico a ŋituŋa ŋuna alalak neni keŋ eyaunito ŋikadyakak, ŋikaŋwalak, ŋimudukanotin, ŋikecodok ka ŋituŋa ŋulu pa erworosi ta ŋice daŋ ŋulu alalak. Kiwuakis ikes nakejen a Yesu, kitaŋaleu Yesu ikes. 31Aŋun, toumokis ŋasepico a ŋituŋa eanyuwarete ŋituŋa ŋulu sek pa erworosi, irworosi, ŋikaŋwalak eŋaleunete ka ŋulu ecodok ejokunete ta ŋimudukanotin ekienyunete. Tosodo ŋituŋa ŋul daadaŋ kipuro Akuj ŋina a Isirael.

Kisimuj Yesu ŋituŋa ŋalipyo ŋaomwon

(Mar. 8:1-10)

32Tonyarau Yesu ŋikeekasyomak tema, “Ekesyon ayoŋ asepic a ŋituŋa, anerae ikiruk ayoŋ ka ikes ŋirwa ŋiuni emam ibore ŋini emuja ikes. Nyaesikini ayoŋ ikes elosete pa imujito, ikotere nyileleny ikes alorot aŋuna enyamitor akoro.” 33Kiŋita ŋikasyomak iŋes temasi, “Ai nai ikiryamunia iwon akimuj ŋina itemokin ŋituŋa ŋulu etya lu analoŋisat a na?” 34Toboŋok Yesu ikes tema, “Ŋamugati ŋayai iyakatar iyes?” Temasi ikes, “Ŋakanikaarei ka ŋikolya ŋidikudyo.” 35Tolimok Yesu asepic a ŋituŋa akiboikin. 36Tolemu ŋamugati ŋunakanikaarei ka ŋikolya, kilipak. Ani kedau akilipakin tonyilinyili, inak ŋikasyomak tokorakis lotuŋa. 37Kimuja ŋituŋa daadaŋ kimwoko, kilelebun akimuj ŋina apiyanunete ikes ŋaditae ŋakanikaarei. 38Arae ekimar a ŋikilyok a ŋulu emujete ŋalipyo ŋaomwon, pa imarakinitae ŋaberu ka ŋidwe. 39Ani kitolot Yesu ŋituŋa, todoka iŋes nataker tolot nakwap a Magadan.

Currently Selected:

Mat. 15: NIB2008

Highlight

Copy