Mat. 14
14
Atwanare a Yoana ke Ekebatisan
(Mar. 6:14-29; Luk. 9:7-9)
1Apaki ŋin, topup erwosit Erode ŋakiro ŋuna epuritotor ŋituŋa Yesu. 2Tolimok Erode ŋiketiyak keŋ tema, “Erae lo Yoana Ekebatisan, kiteyarun iŋes alokatwak, iŋes nai eyakatar ŋiticisyo ŋulu ka apedor tooma keŋ.”
3Aris Erode kikama Yoana toen ya mabus, aŋuna ke Erodiya a ŋina arae aberu a Pilipo a lokaato ke Erode. 4Alimokinit sek Yoana Ekebatisan Erode atemar, “Italeo iyoŋ akituruwor aberu a lokaato kon ŋina kon!” 5Acamit Erode akiar Yoana, nai tokuryanar aŋuna a ŋituŋa a ŋulu anupito atemar erae Yoana ekadwaran.
6Nai akoloŋit ŋina eitunitere akidouno ke Erode, abu nakoku ke Erodiya kidoŋa alokiŋaren ŋituŋa ejok nooi, kitalaka Erode. 7Kikoŋ Erode tema, “Ainakini ikoku en ŋinibore daadaŋ ekeŋisi iŋes ayoŋ!”
8Aŋuna alimokinia toto keŋ iŋes ibore ŋini kiŋita, abu kiŋit tema, “Inakinae ayoŋ akou a Yoana ke Ekebatisan iwuakinitae natuba!”
9Tobul Erode, nai aŋuna sek ekoŋitor iŋes ka aŋuna a ŋipeyok keŋ, abu tolimu tema, “Inakisi.” 10Abu kiyakiya ŋasigarya alosit atubun akou a Yoana ke Ekebatisan a ŋolo ayai apaki ŋin mabus. 11Kiwuakinae akou keŋ natuba, inakinae apese, ina toto keŋ. 12Apotu nai ŋikasyomak a Yoana yaa akuwan keŋ, tonuka. Ani irikakin, toloto tolimokis Yesu.
Kisimuj Yesu ŋituŋa ŋalipyo ŋakan
(Mar. 6:30-44; Luk. 9:10-17; Yoa. 6:1-14)
13Ŋolopite eirarya Yesu ŋakiro ŋuna a Yoana, tonyou anakwap a ŋin, todoka nataker tolot neni keŋ bon, neni asilon. Ani nai iirarete ŋituŋa ŋun, potu alotaunio kec kiwuapasi Yesu. 14Ani eriŋa Yesu edoki anataker, kiŋolik asepic ŋina alalan, kisyonioto ikes iŋes, tosodi kitaŋaleu ŋulu adyakasi.
15Ani edoli eboŋ, potu ŋikasyomak neni keŋ tolimokis iŋes temasi, “Erae nege ariet ka elosi akwap akiwar; kitoboŋo ŋituŋa, ikotere toloto lorerya togyelut idiobore ŋini nyamat.”
16Nai tolimok Yesu ikes tema, “Nyitemokino ikes toloto, inakisi iyes ikes adiokimuj.”
17Tolimokis ikes iŋes temasi, “ Emam ibore ikiyakar isua, mati ŋamugati ŋakan ka ŋikolya ŋiarei make.”
18Tolimok iŋes ikes tema, “Yautu ikes neni kaŋ.” 19Kisiboik nai Yesu ŋasepico a ŋituŋa lonya. Tolemu nai iŋes ŋamugati ŋunakan ka ŋikolya ŋuluarei, kireo kidiama nakuj, kilipak, tosodi tonyilinyili ŋamugati inak ŋikasyomak tokorakis ikes nasepico. 20Kimuja daadaŋ kimwoko, ido tocunut ŋikasyomak ŋapiyanunet ŋuna apotu kilelebun naditae ŋatomon ka ŋaarei. 21Adolit ekimar a ŋikilyok a ŋulu emujete ŋalipyo ŋakan, pa imarakinitae ŋaberu ka ŋidwe.
Torotok Yesu alokidiama nakipi
(Mar. 6:45-52; Yoa. 6:15-21)
22Kitodoku Yesu ŋikasyomak keŋ anataker kisiŋaren ikes, toloto ekekwaye anam, kidoŋ iŋes akitolot ŋasepico. 23Kedau iŋes ŋun, todoka iŋes bon lomukura akilip, todoiyo akoloŋ eriŋa iŋes bon eyai nen. 24Nai apaki ŋin aris ataker keeka alokipetot. Kibapabapaete ŋikaguragurae a ŋakipi ataker, anerae akutunit ekuwuam anakan a ŋina alosete ikes. 25Ani ebai akuwar, bu Yesu neni a ŋikasyomak elosi alokidiama nakipi. 26Nai ani eanyuwarete ŋikasyomak keŋ iŋes elosi alokidiama nakipi toryaŋakinos ikes temasi, “Erae ekipye.” Kiworout aŋuna ke ekabule.
27Nai kirworik Yesu neni kec atipei tema, “Totitinyikisi! Erae ayoŋ. Nyikibul!”
28Tolimok Petero iŋes tema, “Ekapolon, ani kerae iyoŋ, tolimokinae ayoŋ daŋ obu neni kon alosi alokidiama nakipi.”
29Tolimok nai Yesu iŋes tema, “Bua!” Todoku Petero anataker, torotok alokidiama nakipi, tolot neni ayai Yesu. 30Nai ani iŋolikini iŋes ekuwuam ekutunit, tobul, kisyak asipor, kiworou tema, “Ekapolon, toiunae!”
31Kiopeiyo Yesu atipei akan keŋ, kikam iŋes tema, “Okoe edit anupit kon! Kaanukiro ibunio iyoŋ toŋayaŋaya?”
32Ani edokarete ikes nataker, todipakin ekuwuam. 33Apotu ŋikasyomak ŋulu ayakasi nataker toryediko alokiŋaren Yesu kilipa temasi, “Kire, irae iyoŋ Lokoku ka Akuj!”
Kitaŋaleu Yesu ŋikadyakak alo Genesaret
(Mar. 6:53-56)
34Ketuborosi ikes ekekwaye anam, todolut nakwap ŋina anyaritae Genesaret. 35Ani eyenete ŋituŋa ŋulu ka akwap a ŋin Yesu, kielasi akirot nakwap yaunae ŋikadyakak daadaŋ neni keŋ. 36Kimaimaa ŋikadyakak Yesu acamakin ikes akitap abilet bon ŋina ke elou keŋ. Ŋulu daadaŋ apotu totapa apotu toŋaleut.
Currently Selected:
Mat. 14: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
