Markos 6

1Unkan hetanhan iyoopta iyaye c̣a iye tamakoce kin ekta ki; qa waonapewicakiye cin hena opapi.

2Unkan wanna anpetu wakan hehan omniciye tipi kin ohna waonspewicakiya. Qa wicota naḣonpi qehan yuśinyayapi qa heyapi; Tokiyatanhan dena yuha he; qa taku woksape qupi he; qa token iye nape on wicoḣan tanka dececa econpi he.

3Cankajipe cin, Mary cinhintku, qa Jakob, qa Joses, qa Judas, qa Simon cincu kin he dee śni he; qa tawinoḣtin kin hena owasin den unkicipi unpi śni he. Unkan he on canniyeyapi.

4Tuka Jesus hewicakiya; Wicaśta wokcan iye tamakoce en, qa iye takuwicaye cin ehna, qa iye ti kin ohna, ecedan yuonihanpi śni ece.

5Unkan heciya wicoḣan tanka takudan econ okihi śni; tuka wayazankapi tonana nape on awicaputake c̣a asniwicaya.

6Unkan wicadapi śni kin heon yuśinyaya. Qa otonwe ihdukśan wanke cin ektakta waonspewicakiya iyaya.

7Unkan akenonpapi kin wicakico, qa nom nom yewicaśi; qa woniya śapa on wowaśake wicaqu;

8Qa wahokonwicakiya, icimani yapi kte cin on takudan icupi kte śni, cansagye ecedan; wojuha, qa waneya, qa mazaśa opiye ohna hduhapi kte śni.

9Tuka hanpokihanpi kta; qa onḣdoḣda nom kic̣unpi kte śni.

10Unkan hewicakiya; Tukten tipi wanji mahen yaipi kinhan, tohanyan hetanhan iyoopta dapi śni, hehanyau hen yukan po.

11Qa tona iyowinniciyapi śni qa ananigoptanpi śni kinhan, tohan hetanhan dapi kinhan, owicadakapi kta e heon watuśekśeca siha etanhan yahdatatapi kta. Awicakehan heciciyapi; Woyaco anpetu kin en, otonwe kin he kakije kte cin Sodom qa Gomorrah ahecece kta.

12Unkan iyayapi, qa wicaśta ihduecetupi kta e woyakapi.

13Qa taku wakan śica ota napewicayapi, qa wayazankapi kin ota wihdi on sdawicayapi qa asniwicayapi.

14Unkan Herod wicaśtayatapi kin hena naḣon; caje kin tankaya oyakapi nakaeś; hehan heya; Johannes baptem wicaqu qon he ṭapi kin etanhan kini, heon etanhan wicoḣan tanka econ ece.

15Tuka toktokeca heyapi; Elias hee. Qa toktokeca iś; He wicaśta wokcan, qa iś wicaśta wokcan wanji iyececa ce, eyapi.

16Tuka Herod naḣon qehan heya; Johannes pa bawakse ciqon hee, wiconṭe etanhan kini ce.

17Herod atayedan yewicaśi, qa Johannes yuze c̣a haśka hnaka, Herodias iye sunkaku Philip tawicu qon heon etanhan; he yuza nakaeś.

18Unkan Johannes; Nisunka tawicu duze cin he hecetu śni ce, Herod eciya.

19Heon etanhan Herodias canniyekiye c̣a kte kta cin tuka okihi śni.

20Herod Johannes kokipa, wicaśta owotanna qa waśte sdonya, heon itonpa; qa oie naḣon eca taku ota ecen econ, qa iyuśkinyan naḣon ece.

21Tuka anpetu iyehantu qehan, Herod anpetu en tonpi qon he ehan, wicaśta itancanpi wicayuhe c̣a, akicita tan can tankapi, qa Galile en wicaśta tokaheya kin hena, ḣtayetu wotapi wan wicakicaga.

22Unkan Herodias cunwintku kin en hi, qa waci, qa Herod tona om un kin hena koya iyokipiwicaya, hehan wicaśtayatapi kin heciya; Taku yacin kinhan makida wo, hecen cic̣u kta.

23Nakun taku wakan cajeyan heciya; Taku mayakida kinhan cic̣u kta, mitokiconze hanke hehanyan.

24Unkan tankan iyaye c̣a hunku heciya; Taku wakida kta he. Unkan iś, Johannes baptem wicaqu ece pa kin, eya.

25Hehan ecahankeya inaḣniyan wicaśtayatapi ekta tin hiyu qa heya kida; Johannes baptem wicaqu pa kin, wakśica ohna kohanna mayaqu kta wacin ce, eya.

26Unkan wicaśtayatapi kin nina iyokiśica, tuka taku wakan cajeyan heye cin heon, qa tona om wota iyotanke cin hena on, he ipida kta tawaṭenye śni.

27Unkan hecehnana wicaśtayatapi kin wicakte wan ekta yeśi, qa pa kin aku śi: Unkan he ekta iyaye c̣a, wicakaśka tipi kin ohna pa baksa;

28Qa wakśica wan ohna pa kin ahdi, qa wikośka kin qu; unkan wikośka kin iś iyoopta hunku kin qu.

29Unkan iye waonspewicakiye cin hena, he naḣonpi qehan, en hipi qa tancan ehdakupi, qa ohna hnakapi wan en hnakapi.

30Unkan tona yewicaśi qon hena Jesus en hdipi, qa taku owasin okiyakapi, taku econpi qa taku oyakapi ko.

31Hehan hewicakiya; Niye ito icunonpa ḣewotahedan ekta u po, qa cistiyedan oziic̣iya po. Wicota upi qa hdapi ece, qa hecen wotapi kta hee kaeś okihipi śni.

32Unkan heon ḣewoskan makoce wan ekta iśnana watom iyayapi.

33Tuka yapi kin wicaśta ota wanyakapi, qa he iye iyekiyapi: qa otonwe owasin etanhan ekta inyang iyayapi, qa kawicapapi, qa en i kte cin hen mniciyapi.

34Unkan Jesus ekta ihunni, hehan wicota wanwicayaka, qa onśiwicakida, taḣinca wanunyanpi tuwedan wicayuhe śni kin iyececapi heon, qa hecen taku ota onspewicakiya.

35Unkan wanna wi kucedan hehan, waonspewicakiye cin en hipi qa heciyapi; De ḣewotahedan makoce qa anpetu kin wanna owihanke:

36Hde wicaśi wo, hecen makoce ihdukśan, qa otonwe kin ektakta yapi, qa woyute opeic̣itonpi kta; taku yutapi takudan yuhapi śni.

37Tuka iye waayupte c̣a hewicakiya; Niś ito wo wicaqu po. Unkan heciyapi; Unyanpi qa kaśpapi opawinge nonpa aguyapi iyopeunyanpi, qa wo wicunqupi kta he.

38Aguyapi śpanyanpi kin tona duhapi he; ito wanyaka po, ewicakiya. Unkan sdonyapi hehan; Zaptan qa hogan nonpa, eyapi.

39Unkan owasin wato kin akan optayetonton iyotangkiye wicaśi.

40Unkan optayeton iyotankapi, opawingege qa wikcemna zaptanptan.

41Unkan aguyapi zaptan qa hogan nonpa hena icu, hehan maḣpiya ekta etonwe c̣a yawaśte, qa aguyapi yuśpaśpa, qa waonspewicakiye cin wicaqu, oyate kin wicaqupi kta heon; nakun hogan nonpa kin hena owasin wicakipamni.

42Unkan iyuḣpa wotapi qa imnanpi.

43Qa oyaptapi kin etanhan makanopiye akenonpa ojudan pahipi, nakun hogan kin etanhan.

44Unkan aguyapi yutapi kin hena kektopawinge zaptan ecetu.

45Hehan ecahankeya waonspewicakiye cin wata kin en okipe wicaśi, qa tokaheya akasanpa Bethseda ekta yapi kta, kewicakiya; icunhan iye wicota kin hde wicaśi kta.

46Unkan hena hde wicaśi, hehan paha wan ekta wocekiye eya iyaya.

47Wanna ḣtayetu hehan, wata kin mde kin cokaya un, qa iye iśnana maka akan un.

48Unkan watopapi iyotanhan iyekiyapi wanwicayaka; tatohekiya yapi nakaeś. Unkan hanyetu en awanyakapi itopa hehan, mini amani ekta wicaya.

49Tuka mde kin amani wanyakapi qehan, he wanagi kecinpi, qa śicahowayapi.

50Owasin wanyakapi qa yuśinyayapi. Unkan hecehnana owicakiye ca hewicakiya; Cante waśte po, he miye, kokipapi śni po.

51Unkan ekta wicaya, wata kin en; hehan tate kin ayuśtan. Hecen nina yuśinyayapi qa iḣniyanyanpi.

52Aguyapi econ qon he awacinpi śni; cantepi kin aotpasyapi nakaeś

53Unkan akasanpatanhan ipi, hehan Gennesaret makoce kin en yapi, qa hutata ihunnipi.

54Unkan wata kin etanhan inanpapi, hehan hecehnana iyekiyapi;

55Qa makoce kin he owancaya inyang yapi, qa tukten un naḣonpi kinhan, wicaśta wayazankapi kin owinja akan wicayuhapi, qa en awicayapi.

56Unkan otonwe ciqadan, qa otonwe tanka, qa ihdukśan makoce wanke cin, tukte en ya eca, canku ohna wayazankapi kin ahiwicahnakapi qa cekiyapi; tawokoyake opapun hee kaeś yutanpi kta; unkan tona yutanpi kin hena asnipi ece.

Currently Selected:

Markos 6: DAKOTANT

Highlight

Copy