Markos 7
7
1Hehan Pharisee qa wowapi kagapi wanjikji, Jerusalem etanhan upi qa en ahimniciya;
2Qa iye waonspewicakiye cin wanjikji nape śapa, nape hdujajapi śni he kapi, aguyapi yutapi wanyakapi qehan wicabapi.
3Pharisee kin Juda wicaśta ko owasin tanyan nape hdujajapi śni kinhan wotapi śni ece, qa wicaḣincapi tawoahope kin opapi.
4Qa mazopiye etanhan hiyupi eca ihdujajapi śni ehantanhan wotapi śni. Unkan taku hececa ota opapi kta icupi, miniyatke, qa can koka, qa cega, ohehdepi ko yujajapi ece.
5Hehan Pharisee kin wowapi kagapi ko wiwangapi; Tokeca waonspewicayakiye cin wicaḣincapi tawoahope kin ahopapi śni he, tuka nape hdujaja śni aguyapi yutapi ece.
6Unkan waayupte c̣a hewicakiya; Wananic̣iḣmanpi, niyepi on Isaya tanyan woyake ciqon, hecen wowapi en kagapi; Oyate kin de ihapi kin on mayaonihanpi, tuka cantepi kin mitehanyan un ece.
7Tuka wicaśta akantu tawoahope kin hena woonspe eekiyapi, qa oyakapi ece kin heon ohomadapi kin he taku śni.
8Wakantanka tawoahope kin eḣpeyayapi, qa wicaśta akantu toope kin duhapi, cega qa wakśica yujajapi kin; qa taku hececa ota ecanonpi ece.
9Unkan hewicakiya; Wicaśta akantu toope duhapi kta e heon Wakantanka tawoahope kin eḣpeyayapi, he tanyan ecanonpi he.
10Moses hecen eya; Niyate nihun kici wicahduonihan wo. Nakun; Tuwe atkuku, qa iś hunku kin hdaśice cinhan, he wiconṭe on ṭe kta ce.
11Tuka niye hehapi; Wicaśta wan atkuku, qa iś hunku; He wohduze, tokan wicaqupi he kapi, hecen on ociciye kte śni, eciye cinhan he hecetu ce.
12Hecen atkuku qa hunku taku sanpa owicakiye kta iyoyakipi śni;
13Qa niye woope yakagapi qa wicayaqupi kin on Wakantanka tawoahope kin dutakunipi śni: qa taku hececa ota ecanonpi ece.
14Unkan oyate kin owasin wicakico, hehan hewicakiya; Owasin anamagoptan po, qa okaḣniga po.
15Wicaśta tankan tanhan taku mahen iyaye cin takudan yuśica okihi śni; tuka tona mahen tanhan hinape cin wicaśta yuśice cin hena ee.
16Tuwe noge winaḣon yukan hecinhan he naḣon kta.
17Unkan wicota wicehna tanhan ti mahen iyaye c̣ehan, waonspewicakiye cin wiyacinpi kin he on wiwangapi.
18Unkan hewicakiya; Niś eya oyakaḣnigapi śni he. Taku kaśta tankan tanhan wicaśta mahen iyaye cin he yuśape kta okihi śni e idukcanpi śni he.
19Hena cante kin en i śni, tuka tezi mahen, qa hehan tankan eḣpeyapi, hecen woyute owasin yuecetupi.
20Unkan heya; Taku wicaśta kin etanhan hinanpe cin he wicaśta kin yuśapa ece.
21Mahentanhan, wicacante kin etanhan wicotawacin śica hiyu; wawiciḣaḣapi, wiinaḣmanpi, tinwicaktepi,
22Wamanonpi, waicucupikte, wośice, wohnaye, wowiḣaḣa, iśtaśica, wayaśicapi, wahanicidapi, witkotkokapi;
23Dena taku śice cin owasin mahentanhan hiyu, qa wicaśta yuśape cin hena ee.
24Unkan hetanhan najin hiyaye c̣a, Turos qa Sidon makoce opapun kin en i, qa tipi wanji timahen iyaya; unkan tuwedan sdonye kte śni cin, tuka anaḣmanpi kta okihipi śni.
25Winoḣinca wan cunwintku cistinna woniya śapa yuhe cin he naḣon qehan, en hi qa siha kin en makata eḣpeiciya.
26He Hellenes winoḣinca kin heca, Surophenikiya oyate kin etanhan; unkan taku wakan śica cunwintku kin etanhan hinanpe śi kta e icekiya.
27Tuka Jesus heciya; Wicacinca kin hena tokaheya wotapi kta; wicacinca aguyapi tawapi kin icupi, qa śunka wicaqupi kta he hecetu śni.
28Unkan iye waayupte c̣a heciya; Han, Itancan; tuka wahna wotapi kin ihukuya hokśiyopa yuśnapi kin śunka yutapi ece.
29Unkan heciya; Wicoie kin de on ekta hda wo, taku wakan śica nicunkśi etanhan hinanpa ce.
30Unkan iye ti kin ekta ki, hehan taku wakan śica tankan iyaye c̣a, cunwintku ohehdepi kin akan wanka e wanhdaka.
31Unkan ake Turos makoce kin eḣpeye c̣a, Sidon opta, Dekapolis makoce kin cokaya omani, qa Galile mde kin ekta ki.
32Unkan wicaśta wan noge tpa qa ia okitpani he en ahipi, qa nape ahnake kta icekiyapi.
33Unkan wicota etanhan iśnana icunonpa aya, qa nape noge ohna iyeye c̣a, tagośa qa on ceji yutan:
34Hehan maḣpiya ekta etonwe c̣a comnihdazi qa heciya; Ephatha, yuḣdokapi nunwe, eyapi kin he kapi.
35Unkan ecahankeya noge yuḣdokapi, qa ceji ikan kin yukcapi, qa hdaheya ia.
36Hehan he tuwedan okiyake śni wicaśi; tuka taku ewicakiye cin on etanhan sanpa nina oyakapi ece.
37Qa nina yuśinyayapi qa heyapi; Taku owasin tanyan econ ece; noge tpapi kin winaḣonwicakiye c̣a, nakun ia okitpani iewicakiya ece.
Currently Selected:
Markos 7: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
