Markos 8

1Unkan anpetu kin hena en nina wicota ḣinca, qa takudan yutapi śni, hehan waonspewicakiye cin wicakico qa hewicakiya

2Wicota kin onśiwicawakida, wanna yamni can mici unpi, qa taku yutapi takudan yuhapi śni.

3Qa wote śni hde wicawaśi kinhan, okinni tahepi iḣpayapi kta; hunḣ tehan tanhan hipi nakaeś.

4Unkan waonspewicakiye cin ayuptapi; Makoce ḣewotahedan kin den, tokiya tanhan dena aguyapi imnahan yute wicakiyapi kta he.

5Unkan, Aguyapi kagapi tona duhapi he, eya iwicawanga. Unkan iś, Śakowin, eyapi.

6Unkan oyate kin maka akan iyotanke wicaśi; qa hehan aguyapi śakowin qon icu, yawaśte qa yuśpaśpa qa waonspewicakiye cin wicaqu, iyoopta wicaqupi kta; unkan iś oyate kin wicakipamnipi.

7Nakun hogan tonana yuhapi; hena yawaśte qa wicaqupi kta, keya.

8Hecen wotapi qa imnanpi; unkan aguyapi oyaptapi kin etanhan makanopiye śakowin pahipi.

9Tona wotapi kin hena kektopawinge topa ecetu; hehan hde wicaśi.

10Hehan ecahankeya wata wan en opa, waonspewicakiye cin om, qa Dalmanutha makoce kin ekta i.

11Unkan Pharisee kin en hipi, qa iyutanyan wiwangapi, qa maḣpiya eciyatanhan wowapetokeca kida.

12Unkan iye cante ekta comnihdazi qa heya; Tokeca wicoicage kin de wowapetokeca akita he. Awicakehan heciciyapi; Wicoicage kin de wowapetokeca takudan qupi kte śni.

13Hehan eḣpewicaye c̣a wata kin en okipe c̣a akasanpa hda.

14Unkan aguyapi icupi kta akiktonjapi, qa wata ohna aguyapi wanjidan sanpa yuhapi śni.

15Hehan wahokonwicakiye ca heya; Wahyaka po, qa on napoḣyapi Pharisee tawapi qa Herod tawa kin he kokipa po.

16Hecen iye iyakitedan hdokinicapi qa heyapi; Aguyapi unhapi śni, heon etanhan heya ce.

17Jesus he sdonya hehan hewicakiya; Tokeca aguyapi duhapi śni on ayakinicapi he. Hinaḣin oyakaḣnigapi śni qa widukcanpi śni he. Hinaḣin cante aotpasniyanpi he.

18Iśta niyukanpi wandakapi śni, qa noge niyukanpi eśta nayaḣonpi śni, qa yeksuyapi śni he.

19Aguyapi zaptan wicaśta kektopawinge zaptan wicawakipamni, hehan oyaptapi kin makanopiye ohnaka tona yapahipi he. Akenonpa, eyapi.

20Hehan śakowin qa kektopawinge topa, hehan oyaptapi makanopiye ohnaka tona iyacupi he. Unkan, Śakowin, eyapi.

21Hehan hewicakiya; Tokeca oyakaḣnigapi śni he.

22Unkan Bethseda en hi. Hehan iśtagonga wan en ahipi, qa yutan kta e icekiyapi.

23Unkan iśtagonge cin napata yuze c̣a otonwe kin tankan aya; qa iśta kin en atagośa hehan nape kin akan ehnaka, qa taku wanyaka hecinhan he iwanga.

24Unkan wankan etonwe c̣a heya; Wicaśta wanwicamdaka, mani unpi, can kin iyececa.

25Hehan ake nape kin iśta akan ehnaka, qa ake wankan etonwekiya; unkan hehan yuecetupi, qa taku owasin tanyan wanyaka.

26Hehan iye ti ekta hde śi, qa heya; Otonwe kin en ye śni wo, qa otonwe kin en tuwedan okiyake śni wo.

27Unkan Jesus hetanhan Kesareya Philippi otonwe kin hena ekta iyaya, waonspewicakiye cin om. Unkan tahepi waonspewicakiye cin heya iwicawanga; Matuwe, wicaśta keyapi he.

28Unkan ayuptapi; Johannes baptem wicaqu kin; qa wanjikji; Elias; qa wanjikji; Wicaśta wokcan wanji he niye, eyapi.

29Unkan hewicakiya; Qa niye matuwe kehapi he. Unkan Inyan waayupte c̣a heciya; Messiya he niye.

30Unkan he tuwedan okiyake śni wicaśi.

31Hehan wowicakiyaka, Wicaśta Cinhintku kin taku ota kakije kta; wicaḣincapi qa wośnapi kagapi, wowapi kagapi ko ḣeyata iyeyapi kta, qa ktepi kta; qa anpetu yamni iyohakam kini kta.

32Unkan hena taninyan ohdaka. Hehan Inyan icu qa iyokiśni.

33Tuka ihduhomni qa waonspewicakiye cin awicatonwan, hehan Inyan iyopeye c̣a heya; Satan miḣeyata ya wo; taku Wakantanka tawa kin awacanni śni, tuka wicaśta akantu taku tawa kin.

34Unkan oyate kin waonspewicakiye cin om wicakico qehan, hewicakiya; Tuwe kaśta omape kta hecinhan, waipiic̣ida kta, qa cansusbeca kic̣in kta, qa mihakam u kta.

35Tuwe wiconi tawa teḣinda kinhan he toki eḣpekiye kta; tuka tuwe miye on qa wotanin waśte kin on wiconi toki eḣpekiye cinhan, he qe wiconi hduhe kta.

36Qa wicaśta wan maka kin de ocowasin ohiya eśta, qa iye nagi kin toki eḣpekiye cinhan, taku on iwaśte kta he.

37Qa taku e wicaśta nagi kin tokiyopekiye kta he.

38Heon etanhan tuwe, wicoicage wiinaḣman qa waḣtani sa kin de en, miye qa mioie kin on iśtece cinhan, tohan Wicaśta Cinhintku kin iye Atkuku towitan hduha, ohnihde wakan kin om u kinhan, wicaśta kin he on iśtece kta ce.

Currently Selected:

Markos 8: DAKOTANT

Highlight

Copy