Markos 5
5
1Unkan mde kin akasanpa ihunnipi, hehan Gadarene makoce kin en ipi.
2Unkan wata kin etanhan inanpa, hehan ecahankeya wicaśta wan woniya śica yuha wicahnakapi etanhan itkokim hiyu:
3He wicahnakapi kin en un ece; qa tuwedan kaska okihi śni, mazaicicaḣiḣa hee kaeś on.
4Wanna ota kaśkapi, siha on wicakaśkapi mazaicicaḣiḣa ko on; tuka mazaicicaḣiḣa kin hena yuweḣwega ece, qa siha on wicakaśkapi kin yuksaksa ece; qa tuwedan waḣbadan kaga okihi śni.
5Ohinniyan, hanyetu anpetu koya, wicahnakapi kin ehna, qa ḣe kin ekta śicahowaya un, qa inyan on kiihdaksa ece.
6Tuka Jesus tehan tanhan wanyaka, hehan ekta inyang ye c̣a ohoda.
7Qa hotankakiya hotanin qa heya; Jesus Wakantanka Tehanwankantu Cinhintku kin, taku e unkiyotahedan un he; Taku Wakan cajeyan ceciciya, kakiśmayaye kte śni.
8Wanna, Woniya śapa, wicaśta kin etanhan hinanpa wo, eciya nakaeś.
9Unkan, Token eniciyapi he, eya iwanga. Unkan heciya; Wicota, emakiyapi ce, wiuncotapi nakaeś.
10Unkan makoce kin he etanhan hde wicaśi kte śni, nina cekiya.
11Imnija ḣe kin hen ikiyedan kukuśe optaye wan tanka wo wicaqupi.
12Hecen wakan sicapi kin cekiyapi qa heyapi; Kukuśe kin ekta ye unśi po, mahen wicunyanpi kta ce.
13Unkan hecehnana Jesus iyowinwicakiya. Hecen woniya śapapi kin tankan hinanpapi qa kukuśe kin mahen iwicayayapi. Unkan optaye kin ecehna maya ḣince cin en naśdog eyaye c̣a minin iyayapi; owancaya kektopawinge nonpa ecetu, qa minin ṭapi.
14Unkan tona kukuśe wo wicaqupi qon hena najicapi, qa otonwe kin en makoce ihdukśan koya he oyakapi. Unkan taku econpi kin he wanyag ipi.
15Qa Jesus en hipi, qa wicaśta wakan śica yuhnaśkinyan, qa wicota yuhe ciqon, wanna ogekiton qa tawacin ecetu iyotankehan yanka he wanyakapi; unkan yuśinyayapi.
16Unkan tona wanyakapi qon hena, wicaśta wakan śica yuhnaśkinyanpi, kukuśe kin hena ko token ecawicakiconpi qon hena owicakiyakapi.
17Hehan makoce tawapi kin etanhan hde kta e icekiyapi.
18Unkan wata kin en okipa hehan tuwe wakan śica yuhe ciqon he cekiya, kici un kta heon.
19Tuka Jeans iyowinkiye śni, qa heciya; Takuwicayaye cin ekta hda wo, qa taku tona Itancan kin ecanicon qa onśinida, hena owicakiyaka wo.
20Hecen kihde c̣a Dekapolis en taku tona Jesus ecakicon kin he ohdaka ece. Unkan owasin yuśinyayapi.
21Unkan Jesus ake watom akasanpa ki qehan, oyate ota en mniciyapi; qa mde kin ikiyedan un.
22Hehan iho, omniciye tipi itancanpi wanji, Jairus eciyapi, he en hi; qa wanyaka hehan siha kin en makata eḣpeic̣iya,
23Qa nina cekiye c̣a heya; Micunkśi cistinna wanna ṭe kta wanka; en u qa nape on aputake c̣a asniya ye; hecen ni kta ce.
24Unkan kici iyaya; qa wicaśta ota ihakam yapi qa aoṭinsyapi.
25Unkan winoḣinca wan waniyetu ake nom hehanyan we ece iheya;
26Qa pejihutawicaśta ota on teḣiya kuwapi, qa taku owasin on hdusota, qa etanhan waśte icage śni, tuka sanpa śica aya;
27He Jesus oyakapi naḣon qehan, ḣeyata tanhan wicota ehna hiyu, qa tawokoyake yutan.
28Tawokoyake hee kaeś mdutan kinhan, amasni kta ce, eye ciqon.
29Unkan hecehnana we iheye ciqon anapta; qa tancan mahen he wayazan kin on wanna akisni sdonkiya.
30Unkan hecehnana woasni etanhan hiyu kin Jesus atayedan sdonkiya, wicota ehna ihduhomni qa heya; Mitawokoyake tuwe yutan he.
31Unkan waonspewicakiye cin heciyapi; Wicaśta ota aoṭinsniyanpi he wandaka, qa, Tuwe mayutan he, eha he.
32Unkan tuwe hecon kin he wanyake kta e ohomni awica tonwan.
33Tuka winoḣinca kin taku ecakiconpi kin sdonkiya, hecen kokipeyahan cancanyan en hi, qa itokam makata eḣpeic̣iye c̣a owasin awicakehan okiyaka.
34Unkan heciya; Cunś, wacinyaye cin he asniniyan; wookiye hda wo, qa waniyazan qon okizi un wo.
35Unkan iahan icunhan omniciye tipi itancan ti kin eciyatanhan upi qa heyapi; Nicunkśi wanna ṭa; tokeca sanpa Waonspekiye cin nagiyeyaya he.
36Tuka Jesus taku eyapi naḣon qehan, hecehnana omniciye tipi itancan kin heciya; Kokipe śni wo, wicada wo ecedan.
37Unkan tuwedan kici ye kta iyowinkiye śni, Inyan, qa Jakob, qa Johannes Jakob sunkaku, henananpidan.
38Unkan omniciye tipi itancan ti kin he en hi, qa owodutaton kin he wanyaka, tona ceyapi qa nihinciyapi kin hena koya.
39Unkan en i qehan hewicakiya; Tokeca owodutaton yakagapi qa yaceyapi he; wicinyanna kin ṭe śni, tuka iśtinma ce.
40Unkan nina iḣapi. Tuka owasin tankan iyewicaya, hehan wicinyanna atkuku qa hunku, qa tona om un kin hena iwicacu, qa wicinyanna wanke cin en i;
41Qa wicinyanna kin nape yuze c̣a heciya; Talitha kumi, Wicinyanna najin wo, eciciya, eyapi kin he kapi.
42Unkan ecahankeya wicinyanna kin najin qa mani; wanna waniyetu akenonpa. Unkan nina ḣin yuiśinyayapi.
43Hehan nina oyake śni wicaśi; qa taku yutapi qupi kta, kewicakiya.
Currently Selected:
Markos 5: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
