Markos 12

1Hehan wiyacinpi on wowicakiyaka; Wicaśta wan hastanhanka iyuwi wojupi wan oju, qa ohomni natake c̣a, miniśa iyuśkice wan en qe c̣a, cowahe tehan wankantu wan kaga; qa kicanyanpi kte cin owicaqu, qa makoce wan tokeca ekta icimani iyaya.

2Qa wanna iyehantu qehan taokiye wan kicanyanpi kin ekta ye śi, kicanyanpi kin etanhan hastanhanka ojupi kin waskuyeca icu kte cin heon etanhan.

3Unkan he yuzapi, qa apapi, qa cokadan hde śipi.

4Unkan ake taokiye wanji tokeca ekta ye śi; tuka e qe inyan on kininpi, qa pa kaḣdecapi, qa teḣiya kuwapi hde śipi.

5Unkan ake wanji tokeca ekta ye śi; qa he qe ktepi: unkan nakun wicota, hunḣ awicapapi qa hunḣ wicaktepi.

6Hehan cinhintku wanjidan waśtekidake cin he hinaḣin hduha; unkan he ehake ekta ye śi, qa; Micinkśi yuonihanpi kta ce, eya.

7Tuka kicanyanpi kin hekiciyapi; Tawa kte cin he dee; iho po, unktepi kta; hecen he unkitawapi kta ce.

8Unkan hecen yuzapi qa ktepi, qa wojupi kin etanhan tankan eḣpeyapi.

9Heon hastanhanka ojupi yuhe cin he taku econ kta he. En hi qa kicanyanpi kin hena ihangwicaye kta, qa hastanhanka ojupi kin wicaśta tokeca owicaqu kta.

10Wowapi kin de dawapi śni he; Ticagapi inyan wan eḣpeyapi qon he oise en pa icaga ce.

11He Itancan kin econ, qa unkiśtapi kin en taku wowinihan.

12Hehan yuze wacinpi, tuka oyate kin kowicakipapi; wiyacinpi kin de iye wicaka e heya sdonyapi. Unkan eḣpeya kihdapi.

13Hehan Pharisee qa Herodian etanhan wanjikji ekta ye wicaśipi; taku eye cin on yuzapi kta.

14Unkan hena en hipi qehan heciyapi; Waonspekiye, iewicayaka qa tuwedan koyakipe śin sdonunyanpi; wicasta tancan ekta eyatonwe śni ece, tuka awicakehan Wakantanka tacanku kin odaka ece; Kesar wamnayanpi qupi kta iyececa he.

15Unqupi kta, qa iś unqupi kte śni he. Tuka iye wohnaye hduhapi sdonye c̣a hewicakiya; Tokeca iyutanmayayapi he. Kaśpapidan wanji makau po, wanmdake kta ce.

16Unkan kahipi. Hehan hewicakiya; Wicite qa wowapi kin de tuwe tawa he. Unkan, Kesar tawa ce, eciyapi.

17Hehan Jesus waayupte c̣a; Kesar taku tawa kin kicu po; qa Wakantanka taku tawa kin kicu po, ewicakiya. Unkan heon inihanpi.

18Hehan Saddukee kin, piya iwicacage kte cin wanica keyapi, hena etanhan en hipi; qa wiwangapi qa heyapi;

19Waonspekiye, Moses wowapi unkicagapi, wicaśta wan tawicu eḣpeya ṭe c̣a, cinca nice cinhan, sunkaku winoḣinca kin he hduze kta, qa cincu qon cinca kicage kta ce.

20Hunkawanjinkiciyapi śakowin; unkan tokapa kin winoḣinca wan yuze c̣a, cinca codan ṭa.

21Hehan iyokihe kin he hduze c̣a nakun ṭa, qa cinca nica; unkan iyamni kin iś nakun.

22Unkan ecen śakowinpi kin hduzapi, qa cinca nicapi: ehake winoḣinca kin iś eya ṭa.

23Hecen piya iwicacage cin en inajinpi kinhan, wanji tukte tawicuyapi kta he: śakowin hduzapi tuka.

24Unkan Jesus waayupte c̣a hewicakiya; Wowapi wakan kin sdonyayapi śni, qa nakun Wakantanka towaśake kin, heon yanunipi.

25Wiconṭe etanhan piya wicoicage kinhan tawicu tonpi śni qa hihnaku yuhapi śni; tuka maḣpiya ekta ohnihde unpi kin iyececapi.

26Unkan tona ṭapi kin hena piya icagapi kta, on Moses tawowapi kin en dawapi śni he; can opamna etanhan Wakantanka okiye c̣a heya; Abraham Wakantanka tawa, qa Isaak Wakantanka tawa, qa Jakob Wakantanka tawa kin he miye ce.

27Wicaśta ṭapi kin Wakantanka tawapi śni, tuka ni unpi kin Wakantanka tawapi: heon etanhan śogya yanunipi.

28Hehan wowapi kagapi wanji en hi, qa akinicapi kin naḣon, qa tanyan awicayupta iyukcan heon etanhan, Woahope tokaheya kin tukte e he, eya iwanga.

29Unkan Jesus ayupta; Israel naḣon po, Jehowa Wakantanka unkitawapi kin he Itancan wanjidan, woahope owasin tokapa kin hee ce.

30Unkan Jehowa Wakantanka nitawa kin he nicante ocowasin on, qa ninagi ocowasin on, qa nitawacin ocowasin on, qa nitowaśake ocowasin on, waśteyakidake kta ce; woahope tokaheya kin hee.

31Qa inonpa kin he he iyececa; Nikiyedan un kin he niye inihdacin waśteyadake kta. Woahope dena isanpa tanka wanica.

32Unkan wowapi kage cin he heciya; Han, Waonspekiya, wowicake ecen eha, Taku wakan wanjidan, qa icunonpa tanhan wanica.

33Qa wicacante ocowasin on, qa wicotawacin ocowasin on, qa wicanagi ocowasin on, qa wicowaśake ocowasin on waśtedakapi, qa wicikiyedan unpi kin wiciye ihdacin waśtewicadapi kin, peta on wośnapi qa ikce wośnapi owasin, he isanpa tanka ece.

34Unkan he wacinksamya ayupta Jesus wanyaka, hehan heciya; Wakantanka tokiconze kin itehan yaun śni. Unkan hetanhan tuwedan sanpa wiwanga tawaṭenye śni.

35Hehan Jesus tipi wakan kin ohna wowicakiyaka icunhan waayupte c̣a heya; Wowapi kagapi kin Messiya he Dawid Cinhintku ce, tokeca heyapi he.

36Dawid iye qe Woniya Wakan on heya; Itancan kin Itancan mitawa heciya; Mietapa ekta iyotanka wo, tona tokaniyanpi kin hena siha oahe nitawa kin wakage kta hehanyan.

37Heon etanhan Dawid iye qe Itancan eciya; hecen token cincaya he. Unkan oyate ikceka kin wiyuśkinyan naḣonpi.

38Unkan wowicakiyaka icunhan hewicakiya; Wowapi kagapi kin kowicakipa po, hena wokoyake hanskaska kic̣un waśtedakapi, qa wopeton tipi kin ohna owicakiyapi kta nakun:

39Qa omniciye tipi kin en oiyotanke tokapapi, qa wotapi kin en oyanke waśteśte kin:

40Hena e wiwazica tipi kin temyapi, qa ihdutaninpi on wocekiye hanska eyapi ece: hena woyaco iyotan tanka yuhapi kta.

41Unkan Jesus mazaska opiye kin iyotakons iyotanka, qa token oyate kin mazaska opiye kin en, mazaska eḣpeyapi kin he wanyaka. Unkan wicota wijicapi kin hena odota en eḣpeyapi.

42Unkan wiwazica waḣpanica wan en hi, qa mazaśa onśpadan nom en eḣpeya, he mazaśa wanjidan yawapi.

43Unkan waonspewicakiye cin hena wicakico qa hewicakiya Dena owasin mazaska opiye kin en eḣpeyapi, tuka wiwazica waḣpanica kin de owasin isanpa en eḣpeya, awicakehan eciciyapi.

44Dena owasin taku ota tonpi kin eciyatanhan en eḣpeyapi ece; tuka iye qe nice cin etanhan taku yuhe cin ocowasin en ehpeya, on ni kte cin ocowasin.

Currently Selected:

Markos 12: DAKOTANT

Highlight

Copy