Markos 11

1Unkan wanna Jerusalem ikiyedan hipi, Bethphage qa Bethani hetu, Oliwe Paha kin en, hehan waonspewicakiye cin nom ye wicaśi;

2Qa hewicakiya; Otonwe iyotakons yanke cin en ya po; unkan wanna en yaipi kinhan, hehan śukcinca wan, tohinni wicaśta akan iyotanke śni, he iyeyayapi kta; yukcapi qa aku po.

3Qa tuwe, Taku on hecanonpi he, eniciyapi kinhan, Itancan kin cin ce, eya po. Unkan hecehnana au niśipi kta.

4Unkan ekta iyayapi, qa canku nonpa ipaweḣ wanka, tiyopa wan en śukcinca kin kaśka najin iyeyapi; hecen kiyukcapi.

5Unkan hen najinpi kin wanjikji, Tokeca śukcinca kin dukcapi he, ewicakiyapi.

6Unkan Jesus econ wicaśi qon he ohna ewicakiyapi: hecen iyowinwicakiyapi.

7Hehan śukcinca kin Jesus kahipi; qa tawokoyake akan ehnakapi; unkan iye akan iyotanka.

8Unkan wicota canku ohna tawokoyake kin owinśyapi; qa apa can kin etanhan adetka kaksapi, qa canku ohna eḣpeyapi.

9Unkan tona tokaheyapi qa tona ihakam upi kin hena hotaninpi qa heyapi; Osanna, tuwe Itancan caje on u kinhan, he yawaśtepi ce.

10Dawid ateunyanpi tokiconze Itancan caje kin on u kin he yawaśtepi: Osanna iyotan tehan wankantu.

11Unkan Jesus Jerusalem en ye c̣a, tipi wakan kin en iyaya; qa wanna taku owasin ekta etonwe c̣a, ḣtayetu aya, hehan akenonpapi kin om Bethani ekta kihda.

12Unkan ihunḣanna Bethani etanhan kupi, hehan wotektehda.

13Qa itehan suken can wan ape yuke cin he wanyaka, he en hi, okinni en waskuyeca iyeye kta; tuka en hi qehan takudan iyeye śni, ape ecedan; suken icage kta hinaḣinke śni.

14Unkan Jesus waayupte c̣a heciya; Detanhan tuwedan waskuyeca enitanhan yute kte śni, owihanke wanic̣a. Unkan waonspewicakiye cin he naḣonpi.

15Hehan Jerusalem en hipi; unkan Jesus tipi wakan kin en i, qa tona tipi wakan kin ohna wiyopeyapi qa wopetonpi kin hena tankan iyewicaya, qa mazaska tokiyopeyapi ahna econpi kin ahdapśinyan eḣpeya, qa wakiyedan iyopeyapi can akan iyotankapi hena koya:

16Qa tipi wakan kin ohna tuwe cega yuhe kta iyowinwicakiye śni.

17Unkan wowicakiyake c̣a hewicakiya; Wati kin ne oyate owasin on wocekiye tipi eciyapi kta ce, eya wowapi en kagapi śni he; tuka niye wamanon sa otipi kin yakagapi ce.

18Wośnapi kagapi qa wowapi kagapi kin he naḣonpi, unkan token ihangyapi kta akitapi; kokipapi, wicaśta owasin tawoonspe kin on yuśinyayapi nakaeś.

19Unkan wanna ḣtayetu hehan otonwe kin etanhan tankan iyaya.

20Unkan ihanḣanna en hiyayapi hehan suken can kin wanna hute hehanyan śnija e wanyakapi.

21Unkan Inyan he kiksuye c̣a heciya; Itancan, wanyaka wo, suken can daśice ciqon he wanna śnija.

22Unkan Jesus waayupte c̣a hewicakiya; Wakantanka wacinyanpi Kin he yuha po.

23Awicakehan heciciyapi; Tuwe paha kin de, Tokan iyaye c̣a miniwanca kin en iyohpaya wo, eciye c̣a, cante kin en ceṭunhda śni, qa taku tona eye cin hena hecetu kta e wicada kinhan; he taku eye cin hena ecen yuhe kta.

24Heon etanhan heciciyapi; Ceyakiyapi eca taku tona yacinpi kin hena iyacupi e wicada po, kinhan hena duhapi kta.

25Unkan cekiya nayajinpi kinhan, tuwe taku on yeksuyapi kinhan kicicajuju po; hecen Ateyayapi maḣpiya ekta yanke cin he wayaḣtanipi kin nicicajujupi kta.

26Qa niś wayecicajujupi śni kinhan, nakun Ateyayapi maḣpiya ekta yanke cin wayaḣtanipi kin nicicajujupi kte śni.

27Unkan ake Jerusalem en hdipi; qa tipi wakan kin ohna mani un qehan, wośnapi kagapi wowapi kagapi wicaḣincapi koya en hipi;

28Qa heciyapi; Taku wowaśake on dena taku kin ecanon he; qa tuwe dena econ niśi, qa hecen ecanon he.

29Unkan Jesus waayupte c̣a hewicakiya; Miś eya taku wanji iciwangapi kta, amayupta po, kinhan wowaśake tukte e on dena ecamon kin ociciyakapi kta.

30Johannes baptem wicaqu qon wicoḣan kin he maḣpiya eciyatanhan, qa iś wicaśta eciyatanhan, unma tukte he; amayupta po.

31Unkan hdokinicapi qa hekiciyapi; He maḣpiya eciyatanhan, unkeyapi kinhan, hehan; Tokeca wicayadapi śni he, eye kta.

32Tuka, He wicaśta akantu eciyatanhan, unkeyapi kinhan, oyate kin kowicunkipapi; wicaśta owasin Johannes wicaśta wokcan kin heca kecinpi.

33Unkan waayuptapi qa Jesus heciyapi; Sdonunyanpi śni. Unkan Jesus waayupte c̣a hewicakiya; Miś eya wowaśake tukte e on dena ecamon kin he nakun ociciyakapi kte śni.

Currently Selected:

Markos 11: DAKOTANT

Highlight

Copy