Markos 13
13
1Unkan tipi wakan kin etanhan kinanpa hehan waonspewicakiye cin wanji heciya; Waonspekiya, inyan tankinyanyan kin dena, qa tipi kagapi kin dena wanyaka wo.
2Unkan Jesus waayupte c̣a heciya; Tipi tankinyanyan kin dena owasin wandaka he. Inyan wanji inyan itakihna wanke kte śni, owasin jujuwahe kta.
3Unkan Oliwe Paha kin akan iyotanka, tipi wakan kin iyotakons, hehan Inyan qa Jakob qa Johannes qa Andrew naḣmana wiwangapi;
4tohan hena hecetu kta he, qa dena owasin iyecetu kta e wowapetokeca tukte e hecinhan, unkokiyaka po.
5Unkan Jesus waayupte c̣a hewicakiya; Iwanihdaka po, okinni tuwe nihnayanpi kta.
6Wicota micaje on hipi qa; He miye ce, eyapi kta, qa wicaśta ota wicahnayanpi kta.
7Unkan tohan wicokicize qa kicizapi kta oyakapi kin nayaḣonpi kinhan, nihinciyapi śni po: hena hecetu kta, tuka owihanke kin hinaḣinke śni.
8Oyate wan oyate tokeca on najin kta, qa wokiconze wan wokiconze tokeca on; qa tuktekten maka śkanśkan yuke kta, qa wicaakiḣan qa wicokicize yuke kta. Dena wicoiyokiśice tokaheya kin ee.
9Tuka iwanihdaka po; omniciye tanka kin en aniyanpi kta; qa omniciye tipi kin ohna nicaśtakapi kta; qa miye on wicaśta itancanpi wicaśtayatapi ko en aniipi kta, owicayakapi kta heon.
10Tuka tokaheya wotanin waśte kin he oyate owasin owicakiyakapi kta.
11Tuka tohan aniyanpi qa wicanic̣upi kinhan, itokam taku ehapi kta awacinpi śni po, qa on cante śicapi śni po; tuka wihiyayedan oape kin he en taku nic̣upi kin he ohna eya po; eye kte cin he niyepi śni, tuka Woniya Wakan kin hee kta.
12Hunkawanjinkiciyapi wiconṭe en kicic̣upi kta, qa wicaśta wan iye cinca nakun; qa wicacinca inajinpi kta qa hunkakewicayapi kin ṭewicayapi kta.
13Unkan miye on owasin śicenidapi kta; tuka tuwe owihanke kin hehanyan ope cinhan he ni kta.
14Tuka tohan wośice woihangye, Daniel wicaśta wokcan cajeyate ciqon, tukten najin kta iyecece śni, hen wandakapi, kinhan, tuwe yawa kinhan okaḣnige kta, hehan tona Juda makoce kin en unpi kin ḣe kin ekta najicapi kta:
15Qa tuwe tipi akan yanke cin he kun ku, qa timahen tanhan takudan ehdaku kte śni:
16Qa nakun tuwe magata un kinhan, wokoyake ehdaku kta on hdicu kte śni.
17Tuka anpetu kin hena en tona ihduśakapi qa hokśiyoqopa azinwicakiyapi kin hena teḣiya unpi kta.
18Unkan waniyetu icunhan nayapapi kte śni e icekiya po.
19Anpetu kin hena en wicokakije yuke kta, tokaheya Wakantanka taku kage cin ehantanhan, qa dehanyan takudan iyecece śni, qa nakun tokata ekta iyecece kte śni.
20Unkan Itancan kin anpetu kin hena yuptecedan śni kinhan, wicaceḣpi takudan ni kte śni; tuka wicakaḣnigapi tona wicakaḣnige cin hena on anpetu kin hena yuptecedan.
21Unkan hehan tuwe; Iho, Messiya hen yanka ce, qa iś; Kan yanka ce, eniciyapi eśta, wicadapi śni po.
22Messiya itonpiśni qa wicaśta wokcan itonpiśni kin heca icagapi kta, qa wowapetokeca taku wowinihan ko econpi kta, okihipica unkanś wicakaḣnigapi kin hena eepi kaeś wicahnayanpi kta tuka.
23Tuka iwanihdaka po; iho, itokam hena ociciyakapi.
24Tuka anpetu kin hena en, wicokakije kin iyohakam, anpetu wi kin aotpasyapi kta, qa hanyetu wi kin iyoyanpa kte śni;
25Qa maḣpiya wicanḣpi kin hinḣpaye kta, qa maḣpiya ekta wowaśake kin yuhuhuzapi kta.
26Unkan hehan Wicaśta Cinhintku kin wowaśake tanka wowitan ko hduha maḣpiya śapa akan u wandakapi kta.
27Unkan hehan ohnihdewicaye cin hena ye wicaśi kta, qa tate ouye topa kin etanhan, maka ihanke kin etanhan qa maḣpiya ihanke kin hehanyan, wicakahnige ciqon hena witaya wicakpahi kta.
28Suken can kin etanhan wiyacinpi kin de okaḣniga po: Can intpa kin hinaḣin wankadan, qa etanhan ape icage cinhan, hehan mdoketu wanna ikiyedan sdonyayapi ece.
29He iyececa, niś tohan dena owasin iyecetu wandakapi kinhan, wanna ikiyedan, tiyopa kin etu, e sdonya po.
30Awicakehan heciciyapi, wicoicage kin de tokan iyaye śni, ecen dena owasin econpi kta.
31Maḣpiya maka ko tokan iyaye kta, tuka mioie kin hena tokan iyaye kte śni.
32Tuka anpetu kin he, qa wihiyayedan oape kin he tuwedan sdonye śni, maḣpiya ohnihde kin heepi kaeś, qa nakun Cinhintkuyapi kin; tuka Ateyapi kin ecedan sdonya.
33Iwanihdaka po, wakta unpi qa cekiya po; tohan iyehantu kte cin sdonyayapi śni nakaeś.
34Wicaśta wan icimani ye kte cin, tipi eḣpeye c̣a taokiyewicaye cin taku econ wicaśi, otoiyohi wicoḣan wicaqu, qa tiawanyake cin he awanyake śi, he iyececa.
35Heon etanhan waktaya un po; tipi ohna itancan kin tohan hdi kta sdonyayapi śni, ḣtayetu, qa hanye cokaya, qa anpaohotonna hoton, qa iś hanḣanna kinhan.
36Okinni ihnuhanna hdi kinhan niśtinmapi iyeniyanpi kta.
37Unkan taku eciciyapi kin he owasin ewicawakiya ece, Waktaya un po.
Currently Selected:
Markos 13: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
