Markos 14

1Anpetu nonpa iyohakam hehan woacakśin qa aguyapi napoḣyapi śni: Unkan wośnapi kagapi wowapi kagapi ko token hnayan yuzapi kta akitapi, ktepi kta e heon.

2Tuka heyapi; Wośnapi anpetu kin hehantu kte śni; okinni oyate kin owodutaton kta.

3Unkan Bethani etu, Simon lepros ececa qon he ti kin en wota iyotanka, hehan winoḣinca wan inyan opiye wan wihdi waśtemna teḣike ḣinca he yuha hi, qa opiye kin yuḣdoke c̣a iye pa kin akaśtan.

4Unkan hen wanjikji cante mahen iyokipipi śni qa heyapi; Tokeca wihdi waśtemna kin hecen yutakunipi śni he.

5Wihdi waśtemna kin de kaśpapi opawinge yamni sanpa iyopeyapi qa waḣpanica wicaqupi kta tuka. Hecen winoḣinca qon icaptapi.

6Unkan Jesus heya; Ayuśtan po; tokeca nagiyeyayapi he. Wicoḣan waśte wan ecamicon.

7Waḣpanicapi kin ohinniyan wicayahduhapi, qa tohan yacinpi kinhan tanyan ecawicayeconpi kta oyakihipi; tuka miye ohinniyan mayaduhapi śni.

8Taku okihi kin ecen econ; mitancan ḣapi kte cin on itokam sdaye kta on hi.

9Awicakehan heciciyapi; Maka kin owancaya tukten wotanin waśte kin de oyakapi kinhan, winoḣinca kin de nakaha taku econ kin he oyakapi kta, wokiksuye kta e heon.

10Unkan Judas Iskariot, akenonpapi kin wanji ee, wośnapi kagapi kin ekta ya, he hnayan wicaqu kta heon.

11Unkan he naḣonpi qehan wiyuśkinpi, qa mazaska qupi kta keciyapi. Unkan token tanyan hnayan wicaqu kta he akita.

12Unkan aguyapi napoḣye śni anpetu tokaheya en wośna ktepi ece kin hehantu, waonspewicakiye cin heciyapi; Tukten woacakśin wośnapi yate kta wiyeya eunhnakapi kta yacin he.

13Unkan waonspewicakiye cin nom ye wicaśi, qa hewicakiya; Otonwe kin en ya po, kinhan wicaśta wan mini ohna wakiśkotpa wan qin itkonicipapi kta, he ihakam ya po.

14Qa tukte en tin kihde cinhan, tipi tawa kin heciya po; Waonspekiye cin heya ce; Wankan tipi kin tukten waonspewicawakiye cin om wośnapi kin wate kta tukte e he.

15Unkan wankan tipi wan tanka, tanyan yuśtanpi qa wiyeya yanka, nicipazopi kta; hen wiyeya eunkicihnaka po.

16Unkan waonspewicakiye cin iyayapi, qa otonwe kin en ipi, qa token ewicakiye cin hecen iyeyapi; unkan wośnapi kin wiyeya ehnakapi.

17Unkan wanna ḣtayetu hehan akenonpapi kin om en hi.

18Unkan wota iyotankapi icunhan Jesus heya; Awicakehan heciciyapi; Mici wayatapi kin wanji wiyopemayayapi kta.

19Hehan iyokiśica hinhdapi, qa otoiyohi heciyapi; He miye he; qa ake wanji, He miye he, eyapi.

20Unkan hewicakiya; Akenonpapi kin etanhan wanji wakśica ohna mici oputkan kin hee ce.

21Wicaśta Cinhintku kin awicakehan token wowapi en kagapi qon he iyecen iyoopta ya, tuka wicaśta kin tuwe Wicaśta Cinhintku kin wiyopeye cinhan, he woteḣi yuhe kta; wicaśta kin he tohinni tonpi śni unkanś waśte kta tuka.

22Unkan wotapi icunhan Jesus aguyapi icu, yawaśte, qa kiyuśpa, qa wicaqu, qa heya; Icupi qa yuta po; mitancan kin he dee.

23Nakun wiyatke kin icu; qa yawaśte hehan wicaqu. Unkan owasin etanhan yatkanpi.

24Unkan hewicakiya; Wicotakuye teca kin en, mawe kin he dee, wicota on papsonpi.

25Awicakehan heciciyapi; Detanhan wiyuwi waskuyeca etanhan icimana mdatke kte śni, anpetu wan en Waknntanka tokiconze kin en teca mdatke kte cin hehanyan.

26Unkan odowan wan ahiyayapi hehan Oliwe Paha kin ekta iyayapi.

27Hehan Jesus hewicakiya; Hanyetu kin de miye on iyuḣpa niḣicahanpi kta; kaken wowapi en kagapi qon, Waawanhdake kin he awape kta, hecen taḣinca wanunyanpi kin mdecahanpi kta ce.

28Tuka ake wakini iyohakam, Galile ekta nitokam imdamde kta.

29Tuka Inyan heciya; Owasin ḣicahanpi eśta, miye qe ecamon kte śni.

30Unkan Jesus heciya; Awicakehan heciciya; Anpetu kin de, hanyetu kin de en, anpaohotonna nonpa hoton śni, ecen yamni akihde anamayakiḣbe kta.

31Hehan iyotan nina kitan ḣinca; Oicimaṭa eśta anaciciḣbe kte śni, Iyuḣpa nakun iyecen eyapi.

32Unkan wojupi wan en ipi, Gethsemane eciyapi; hehan waonspewicakiye cin hewicakiya; Den iyotanka po, icunhan cewakiye kta.

33Unkan Inyan qa Jakob qa Johannes hena iwicacu, hehan inihan qa nina iyokiśica hinhda;

34Qa hewicakiya; Minagi nina iyokiśice ḣinca, maṭe kta iyececa; den yukanpi qa waktaya un po.

35Unkan hetanhan kitan ecinyan iyoopta ye c̣a, makata iḣpaye c̣a cekiya, okihipica kinhan, wihiyayedan cape kin he tokan iyaye kta.

36Unkan heya; Abba, Ate, niye ekta taku owasin okihipica; wiyatke kin de emiciyaku wo; tuka miś taku wacin kin hee kte śni, taku yacin kin he hecetu kta.

37Hehan en hdi, qa iśtinmapi iyewicaya, unkan Inyan heciya; Simon niśtinma he; wihiyayedan oape wanjidan kiktahan yaun kta oyakihi śni he.

38Kiktahan unpi qa cekiya po; okinni taku wawiyutanyan un kin en yaipi nun ce; wicanagi kin he awicakehan wicada, tuka wicaceḣpi kin waśake śni.

39Unkan ake iyaye c̣a cekiya, qa wicoie un qon hena ake ecen eya.

40Unkan ake en hdi qehan, ake iśtinmapi iyewicaya, iśta ḣbapi hinca, unkan token ayuptapi nun tanin śni.

41Unkan iciyamni en hdi, qa hewicakiya; Iśtinma po qa oziic̣iya po; wanna henakec̣a, wihiyayedan oape kin wanna iyehantu; wanyaka po, Wicaśta Cinhintku kin waḣtanipi sa napepi kin en hnayan wicaqupi.

42Najin po, unyanpi kta; iho, tuwe mahnaye cin he wanna kiyedan u ce.

43Unkan ecahankeya, iahan icunhan, Judas hi, akenonpapi kin wanji ee, qa kici wicota hinca, mazasagye can oṭoza ko yuhapi, wośnapi kagapi, wowapi kagapi, qa wicaḣincapi kin etanhan upi.

44Unkan tuwe hnayan wicaqu kte cin he iwaktawicaye c̣a; Tuwe i iwaputake cinhan hee kta; yuzapi qa tanyan akiyahda po, eya.

45Unkan en hi qehan, ecahankeya en ye c̣a, Itancan, Itancan, eciye c̣a, i itputaka.

46Hehan nape ahnakapi qa yuzapi.

47Unkan wanji en najinpi kin mazasagye ehdaku, qa wośnapi kagapi itancan taokiye wanji ape c̣a noge baśpa.

48Unkan Jesus waayupte c̣a hewicakiya; Wamanon sa takpe hipi iyececa, mazasagye can oṭoza ko yuha mayaduzapi kta on yahipi he.

49Anpetu eca tipi wakan kin ohna ocipapi qa waonspekiya waun, tuka mayaduzapi śni; tuka wowapi wakan kin yuecetupi kta.

50Hehan owasin eḣpeya najicapi.

51Unkan kośka wan ihakam ya, tancodan un tuka miniḣuha ska tancan iyakipemni. Unkan kośkapi kin hena yuzapi:

52Hehan miniḣuha ska kin he eḣpeya, qa tancodan kihda.

53Unkan Jesus wośna kagapi itancan kin ekta ayapi; qa hen wośnapi kagapi, wicaḣincapi, wowapi kagapi ko owasin mniciyapi.

54Unkan Inyan itehan ihakam u, qa wośna kagapi itancan ti kin en hi; qa ookiyewicayapi kin om iyotanke c̣a peta kin en cosic̣iya.

55Unkan wośnapi kagapi qa omniciye ocowasin tuwe Jesus on taku oyakapi kta odepi, ktepi kta e heon, tuka takudan iyeyapi śni.

56Wicota itonśniyan woyakapi, tuka taku oyakapi kin ocitkonze śni.

57Hehan wanjikji inajinpi, qa itonśniyan taku iyaonpapi, qa heyapi;

58Unkiye, Tipi wakan nape on kagapi kin de ihangwaye kta, qa anpetu yamni hehan wanji tokeca nape codan kagapi kin he wakage kta ce, eya naunḣonpi ce.

59Tuka iś eya taku oyakapi kin ocitkonze śni.

60Hehan wośna kagapi itancan kin wicacokaya inajin, qa Jesus iwange c̣a; Dena taku iyanionpapi kin takudan adupte śni he, eya.

61Tuka iye inina un qa takudan ayupte śni. Ake wośna kagapi itancan kin wiwange c̣a heciya; Messiya, Iyotan Waśte Cinhintku kin he niye he.

62Unkan Jesus heya; He miye; qa Wicaśta Cinhintku kin wowaśake etapa eciyatanhan iyotanke c̣a, maḣpiya śapa akan u wandakapi kta ce.

63Hehan wośna kagapi itancan kin wokoyake hdupote c̣a heya; Taku on woyakapi sanpa uncinpi kta he.

64Wayaśice cin he niye nayaḣonpi: token idukcanpi he. Unkan owasin, ṭe kta iyececa, yacopi.

65Hehan wanjikji atagośapi qa ite ogekicitonpi, qa apapi qa; Wokcan wo, eciyapi. Unkan ookiye unpi kin iś eya nape on apapi.

66Unkan Inyan ihukuya tipi kin ohna yanka; hehan wośna kagapi itancan winyan wowidagwicaye cin wanji en hi;

67Qa Inyan petiśkan yanka wanyake c̣ehan en etonwe c̣a heya; Qa niś eya Jesus Nazareth kici yaun qon.

68Tuka anakiḣbe c̣a heya; Taku ehe cin he sdonwaye śni, qa nakun owakaḣnige śni ce. Hehan tankan ohanzi hdepi kin ekta iyaya; unkan anpaohotonna wan hoton.

69Unkan ake wikośka wan wanyake c̣a, tona en najinpi kin hewicakiya; De iś nakun hetanhan.

70Unkan iś ake anakiḣman. Hehan kitan ecinyan iyohakam tona en najinpi kin ake Inyan heciyapi; Awicakehan niś henitanhan; Galiie wicaśta henica; qa iyae cin he iyececa ce.

71Tuka iye wayaśice c̣a taku wakan cajeyata; Wicaśta kin de cajedatapi kin ecaca sdonwaye śni ce, eya.

72Hehan inonpa anpaohotonna kin hoton. Unkan hehan Inyan Jesus taku eciye ciqon; Anpaohotonna nonpa hoton śni, yamni akihde anamayakiḣbe kta ce, wicoie kin he kiksuya. Unkan he awakicin hehan ceya.

Currently Selected:

Markos 14: DAKOTANT

Highlight

Copy