Markos 15

1Unkan wanna anpao, hehan wośnapi kagapi qa wicaḣincapi, wowapi kagapi ko omniciye ocowasin om he aiapi, qa Jesus kaśkapi, qa ekta ayapi qa Pilate qupi.

2Unkan Pilate wiwanga; Juda oyate Wicaśtayatapi kin he niye he. Unkan Jesus ayupte c̣a, Niye ecen eha ce, eya.

3Unkan wośnapi kagapi kin taku ota iyaonpapi; tuka takudan ayupte śni.

4Unkan Pilate ake wiwange c̣a; Takudan adupte śni he; iho, taku ota iyanionpapi ce, eya.

5Tuka Jesus takudan ayupte śni; hecen Pilate yuśinyaya.

6Wośnapi kin de ekta wicakaśkapi wanji wicakiciyukca ece, wanji tukte cinpi kinhan.

7Unkan wanji Barabbas eciyapi, he tona om inajin qon kaśkapi yanka, he inajinpi qehan nakun tinwicakte.

8Unkan oyate kin, token econ ece qon he iyecen ecawicakicon kta, panyehan keciyapi.

9Tuka Pilate awicayupte c̣a; Juda Wicaśtayatapi kin he ciciyukcapi kta yacinpi he.

10Wosnapi kagapi kin winawizipi on kahipi e sdonya.

11Tuka wośnapi kagapi kin oyate kin wahokonwicakiyapi, Barabbas he wicakiyukca kta e heon.

12Unkan Pilate ake awicayupte c̣a; Hehan tuwe Juda Wicaśtśyatapi eyakiyapi kin he token ecamon kta yacinpi he, ewicakiya.

13Unkan ake panyehan heyapi; Icipaweḣ okatan wo.

14Hehan Pilate hewicakiya; Tokec̣a, taku śica econ kin tukte e he. Unkan hehan iyotan nina; Icipaweḣ okatan wo, panyehan eyapi.

15Unkan Pilate oyate kin iyokipiwicaye kta cin, heon Barabbas wicakiciyukca, qa Jesus kapsinpsinta hehan icipaweḣ okatanpi kta wicaqu.

16Unkan akicita kin tipi wan tanka, Pretorium eciyapi, he ekta ayapi; qa wicobe ocowasin wicakicopi.

17Unkan śina duta wan inkiyapi, qa wapaha wan wapepeka on kazontapi qa unkiyapi.

18Qa hehan okiyapi, Iho, Juda Wicaśtayatapi kin.

19Qa cedi tanka wan on pa kin en apapi, qa atagośapi, qa canpeśka makehde inajinpi, qa ohodapi.

20Unkan hecen iḣaḣapi, hehan śina duta kin ikicicupi, qa iye tawokoyake qon ake kic̣unkiyapi. Hehan icipaweḣ okatanpi kta e ekta ayapi.

21Unkan Simon, Kurene wicaśta, en hiyaya, he Alexander qa Ruphus atkuku kin, makoce kin etanhan u kin he can susbeca tawa kin kicicinkiyapi.

22Unkan. Golgotha owanka kin en ahipi, he, Wicapahu makoce, eyapi kin he kapi.

23Unkan miniśa pejihuta icahiyapi kin he yatke kta e qupi; tuka wicada śni.

24Unkan wanna icipaweḣ okatanpi, hehan tawokoyake qon kicipamnipi, qa on oeconna econpi, wicaśta otoiyohi taku icupi kta.

25Unkan wanna wihiyayedan oape yamni, hehan icipaweḣ okatanpi.

26Unkan taku iyaonpapi wowapi iwankam owapi kin, JUDA WICAŚTAYATAPI KIN, hee.

27Unkan kici wamanon sa nom icipaweḣ owicakatanpi, wanji etapa eciyatanhan, qa unma catka eciyatanhan.

28Hecen wowapi kagapi qon yuecetupi; Qa waḣtanipi sa om yawapi ce, eya.

29Unkan tona en hiyayapi kin hena yaśicapi, poptanptanpi qa heyapi; Iho, tipi wakan kin ihangyaye kta, qa anpetu yamni ake piya yakage kta:

30Ito, niic̣iya wo, qa cansusbeca kin etanhan kun ku wo.

31Nakun wośnapi kagapi kin iḣaḣapi, qa wowapi kagapi om iye iyakitedan hekiciyapi; Wicaśta tokeca niwicaya ece, tuka iye atayedan niic̣iye kta okihi śni.

32Messiya Israel Wicaśtayatapi kin, ito cansusbeca kin etanhan kun hdicu kta, hecen wanunyakapi qa wicaundapi kta. Unkan tona kici icipaweḣ owicakatanpi qon iś eya iḣaḣapi.

33Unkan wihiyayedan oape iśakpe, hehan maka kin owancaya otpaza, oape inapcinwanka hehanyan.

34Qa wihiyayedan oape inapcinwanka, hehan Jesus hotankakiya panyehan; Eloi, Eloi, lama sabakthani, eya: Wakantanka mitawa, Wakantanka mitawa, tokeca eḣpemayaya he, eyapi kin he kapi.

35Unkan en najinpi wanjikji he naḣonpi qehan heyapi; Iho, Elias kipan.

36Unkan wanji inyang ye c̣a, mini iyuḣepe wan miniskuya en oputkan, qa can icam yatkekiye kta, qa heya; Hinnakahan po, Elias kun eyaku kta on hi kinhan wanunyakapi kta.

37Unkan Jesus hotankakiya hotanin, qa taniya hiyuya.

38Unkan tipi wakan cokaya ozanpi qon he owangya okinaḣdece c̣a, wankan tanhan qa kun ihanke kin aiyahdeya.

39Unkan akicita opawinge wicayuhe cin iyotakons najin, he hecen pan qa taniya hiyuya wanyaka, hehan heya; Awicakehan wicaśta kin de Wakantanka Cinhintku kin hee.

40Nakun winoḣinca itehan tanhan wanyag yukanpi; Mary Magdalene, qa Mary, Jakob cistinna qa Joses hunku kin, qa Salome, hena opapi.

41Galile en un qon he ehan ihakam unpi qa okiyapi ece kin hena eepi, qa nakun winoḣinca toktokeca kici Jerusalem en hipi qon.

42Unkan wanna ḣtayetu, Ihduwiyeyapi kta anpetu, anpetu wakan kin itokam anpetu kin hee, heon,

43Joseph, Arimathea etanhan, woope aiekiyapi owotanna, qa nakun Wakantanka tokiconze kin ohinniyan ape un kin he u, a waditagya Pilate en ye c̣a, Jesus tancan kin kida.

44Unkan wanna ṭa hecinhan Pilate yuśinyaya; heon akicita opawinge wicayuhe cin he kico, qa wanna wanakaja tanhan ṭa hecinhan he iwanga.

45Unkan akicita opawinge wicayuhe cin he ecen okiyaka, hehan tancan kin Joseph qu.

46Unkan he miniḣuha ska waśte opeton, qa tancan kin kun eyaku, qa miniḣuha ska kin iyapemni, qa wicaḣapi oḣdoka wan imnija en kagapi, he en ohnaka, qa inyan tanka wan wicaḣapi oḣdoka i kin en eonpa.

47Unkan Mary Magdalene qa Mary Joses hunku kin hena tukten hnakapi kin he wanyakapi.

Currently Selected:

Markos 15: DAKOTANT

Highlight

Copy