Luka 17
17
Wîvia
(Mat 18.6-7,21-22; Mar 9.42)
1Jesû nîwerire arutwa ake atîrî, “Maûndû marîa matûmaga andû mevie, nwa nginya moneke. Nwatî kaî mûndû ûrîa ûtûmaga maûndû mau moneke arî na thîna-î! 2Wana nî kava mûndû ûcio overerwe îthiga rîa kîthîi ngingorî yake akînaikua îriarî, gûkîra kûmûrekereria avîtithie kamwe ga twana tûtû tûnini. 3#Mat 18.15 Kwoguo menyagîrîrani ciîko cienyu!
“Mûrwanyûkwe angîkûvîtîria mûkanie, na angîkûverera mwovere. 4Na angîkûvîtîria maita mûgwanja mûthenya ûmwe, na wa riita rîrîa aakûvîtîria aûke kûrî we na akwîre atîrî, ‘Nie nînavera,’ we nwa nginya ûmwovere.”
Wîtîkio
5Nao atûmwa nîmeerire Mwathani atîrî, “Twongerere wîtîkio!”
6Nake Mwathani nîwamacokerie atîrî, “Angîthîrwa mûrî na wîtîkio wîgana ta mvîndî ya mûtî wa karatarî, nwa mwîre mûkûyû ûyû atîrî, ‘Îîkûûre na wîvande îriarî!’ Naguo nwa ûmwathîkîre.
Wîra wa ndungata
7“Ethîrwa kûrî mûndû gatagatîrî kenyu ûrî na ndungata îrarîma mûgûndarî kana îrarîthia mbûri, yauma mûgûndarî nwa amîre atîrî, ‘Ûka wîkare nthî ûrîe?’ 8Na ma ndangîmîra ûguo! Vandû va ûguo nwa amîrire atîrî, ‘Mvarîrîria irio cia kîvwaî na weterere ndîe na nyue. Navaa nîrîo ûkaarîa na ûnyue.’ 9Ndungata îcokerue ngatho nîûndû wa gwîka ûrîa mwene amîra îke? 10Kwoguo wa namue rîrîa mweka ûndû wa wonthe ûrîa mwerwa mwîke ugagani atîrî, ‘Tue tûrî ndungata itarî mbagîrîru tweka tu ûrîa tûragîrîrwe nî gwîka.’ ”
Jesû nîwavonirie andû îkûmi
11Rîrîa Jesû aathiîte Jerusalemu, nîwavîtûkîrîre mûvakarî wa vûrûri wa Samaria na Galili. 12Rîrîa aatonyaga gîcagirî kîmwe, nîwatûngirwe nî andû îkûmi arîa maarwarîte mûrimû mûcûku wa ngothi. Nao andû acio nîmaarûngamire vandû varaca na 13makiugîrîria atîrî, “Jesû! Mwarimû! Twîguîre ntha!”
14 #
Ala 14.1-32
Rîrîa Jesû oonire andû acio nîwamerire atîrî, “Thiîni mûkeyonanie kûrî athînjîri-Ngai.”
Na marî njîrarî mathiîte, nîmaatherirue. 15Rîrîa mûndû ûmwe gatagatîrî kao oonire atî nîwavonua, nîwacokire vuva agîkumagia Ngai na mûgambo mûnene. 16Nake mûndû ûcio akinya varîa Jesû aarî, nîwegwîthirie nthî magûrûrî ma Jesû na akîmûcokeria ngatho. Mûndû ûcio aarî Mûsamaria. 17Nake Jesû nîwamûûririe atîrî, “Na kinthî nditheririe andû îkûmi? Acio engî kenda-rî, marî kû? 18Anga gûtirî mûndû wîngî wacoka vuva gûcokeria Ngai ngatho tiga mûndû ûyû ûtarî wa gûkû?” 19Nake Jesû nîwacokire akîra mûndû ûcio atîrî, “Rûngama na wîthiîre, gwîtîkia gwaku nîkuo gwatûma ûvone.”
Gûka kwa Ûthamaki wa Ngai
(Mat 24.23-28,37-41)
20Nao Afarisai amwe nîmaaûririe Jesû rîrîa Ûthamaki wa Ngai ûgaaûka. Nake Jesû nîwamacokerie atîrî, “Ûthamaki wa Ngai ndûkaga na njîra îroneka. 21Wana gûtirî mûndû ûkaauga atîrî, ‘Taroriani, ûrî ava!’ kana ‘Ûûrîa vaarîa!’ Nîûndû Ûthamaki wa Ngai ûrî gatagatîrî kenyu.”#17.21 ûrî gatagatîrî kenyu: kana, ‘ûrî ndarî yenyu.’
22Jesû nîwacokire akîra arutwa ake atîrî, “Kûrî vingo îgaakinya mwîrirîrie kwona mûthenya ûmwe wa mîthenya ya Mûrû wa Mûndû nwatî mûtikawona. 23Kûrî na andû amwe makaamwîra atîrî, ‘Taroriani vaarîa!’ kana ‘Taroriani ava!’ Nwatî mûtikaamarûmîrîre. 24Nîûndû wata ûrîa rûveni rûvenagia na rûkamûrîka matu kuuma mwena ûmwe nginya mwena ûrîa wîngî, ûguo nwaguo Mûrû wa Mûndû ageekara mûthenya ûcio wake. 25Nwatî nwa nginya ambe athînîke mûno na aregwe nî andû a rûciaro rûrû. 26#Kîam 6.5-8 Wata ûrîa gwekariî vîndî ya Nuhu, nwaguo gûgeekara mûthenya wa Mûrû wa Mûndû. 27#Kîam 7.6-24 Andû nîmaarîcaga na makanyua, makavikania na makavikua, nginya mûthenya ûrîa Nuhu aatonyire thavinarî na mbura ya kîvovoto îkiura na îkîmaûraga onthe. 28#Kîam 18.20—19.25 Mûthenya ûcio ûgeekara wata ûrîa gwekariî vîndî ya Loti. Vîndî îo andû maatûûraga marîcaga na manyunyaga, magûraga na mendagia indo, na mavandaga na matumaga nyomba. 29Nwatî mûthenya ûrîa Loti aaumire Sodomu, Ngai nîwaurithirie mwaki na ûviriti, na ûkîûraga andû acio onthe. 30Ûguo nwaguo gûgeekara mûthenya ûrîa Mûrû wa Mûndû akoonanua.
31 #
Mat 24.17-18; Mar 13.15-16 “Mûthenya ûcio mûndû ûrîa ûkeethîrwa arî nyomba îgûrû ndakaume athiîte kûruta indo ciake. Wana mûndû ûrîa ûkeethîrwa arî mûgûndarî ndagacoke na mûciî. 32#Kîam 19.26 Taririkanani mûka wa Loti! 33#Mat 10.39; 16.25; Mar 8.35; Luka 9.24; Joh 12.25 Mûndû wa wonthe ûgeragia kûvonokia mwoyo wake nîagaaûta, nake ûrîa ûtecaga mwoyo wake nîakaaûvonokia. 34Nîramwîra na ma atî, ûtukû ûcio andû aîrî nîmakeethîrwa mamamîte ûrîrî ûmwe, na ûmwe wao nîagoocwa nake ûcio wîngî atigwe. 35Nao aka aîrî nîmakeethîrwa marî vamwe magîkia, na ûmwe wao nîagoocwa, nake ûcio wîngî atigwe. [ 36Nao andû aîrî nîmakeethîrwa marî vamwe makîruta wîra mûgûndarî, na ûmwe wao nîagoocwa nake ûcio wîngî atigwe.”]#17.36 Mandîko mamwe matirî mûvari wa 17.36.
37Nao arutwa nîmaaûririe Jesû atîrî, “Mwathani, maûndû mama magaatuîkîkîra kû?”
Nake nîwamacokerie atîrî, “Vandû varîa kimba kîrî nîvo nderi itûnganaga.”
Currently Selected:
Luka 17: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
