Luka 16

Mûroria wa indo ûrîa ûtaarî mwîvokeku

1Jesû nîwerire arutwa ake atîrî, “Vîndî îmwe kwarî na gîtonga Kîamrî na mûndû wa kûmenyerera indo ciakîo. Nakîo gîtonga nîkîerirwe atî mûndû ûcio nîwatûmagîra mbeca ciakîo naaî. 2Kwoguo nîkîamwîtire na gîkîmûûria atîrî, ‘Ûvoro ûcio nîregua ûkwîgiî, nî ûrîkû? Mandîkîra mûtaratara mwaro wa kûmonia wîra ûrîa ûrutîte ta mûmenyereri wa indo ciakwa, nîûndû we ndûgûcoka kûmenyerera indo ciakwa rîngî.’ 3Nayo ndungata îo nîyeîrire na ngoro atîrî, ‘Nie rîu nîmbîka atîa, nîûndû gîtonga gîakwa nîgîkûmvuta? Nie ndirî na vinya mbîganu ya kûvota gûcimba na nwa njonoke mûno ngîvoya ûtethio. 4Rîu nînamenya ûrîa ngwîka, nîguo andû makaangwataga ûgeni mîciîrî yao navutwa wîra.’

5“Kwoguo mûmenyereri ûcio wa indo nîwetire wa mûndû warî na thirî ya gîtonga gîake. Nake nîwaûririe mûndû wa mbere atîrî, ‘We-rî, wîna thirî wîgana atîa wa gîtonga gîakwa?’ 6Nake nîwamûcokerie atîrî, ‘Nie nîrî na thirî wa maguta ndeve îgana rîmwe.’ Nake mûmenyereri ûcio wa indo nîwerire mûndû ûcio warî na thirî atîrî, ‘Ke maarûa îno ya thirî waku, wîkare nthî narua na wandîke atî wîna thirî wa maguta ndeve mîrongo îtano.’ 7Mûmenyereri ûcio wa indo nîwacokire agîta mûndû wîngî warî na thirî ya gîtonga gîake na akîmûria atîrî, ‘Nawe-î, ûrî na thirî wîgana atîa wa gîtonga gîakwa?’ Nake mûndû ûcio nîwamûcokerie atîrî, ‘Nie nîrî na thirî wa ngano ngunia ngiri îmwe.’ Nake mûmenyereri ûcio wa indo nîwamwîrire atîrî, ‘Ke maarûa îno ya thirî waku na wandîke atî ûrî na thirî wa ngano ngunia magana manana.’

8“Nakîo gîtonga kîu nîkîaganire mûmenyereri ûcio wa indo ûtaarî mwîvokeku na ûcio watûmîrîte wara mwîngî, nîûndû andû a gûkû nthî nî aara gûkîra andû arîa methagîrwa marî a ûtheri.”

9Jesû nîwathiîre na mbere kwaria na akiuga atîrî, “Tûmîrani ûtonga wa gûkû nthî mûkîthondeka arata, nîguo rîrîa ûtonga wenyu ûkaathira, Ngai akamûgwata ûgeni mûciîrî wa tene na tene. 10Mûndû wa wonthe mwîvokeku na tûindo tûnini, nîakethîrwa arî na indo nyîngî. Nake mûndû ûrîa ûtarî mwîvokeku na tûindo tûnini, ethagîrwa atarî mwîvokeku na indo nyîngî. 11Kwoguo angîthîrwa ndûrî mwîvokeku na ûtonga wa gûkû nthî, nû ûngîkwîvokera ûtonga wa ma? 12Na angîthîrwa ndûrî mwîvokeku na indo cia mûndû wîngî, nû ûngîkûnengera indo irîa irî ciaku?

13 # Mat 6.24 “Gûtirî ndungata îngîvota gûtuîka ngombo ya athani aîrî. Nîûndû nwa yende ûmwe na îkamena ûcio wîngî, kana yathîkîre ûmwe na iire ûcio wîngî. Ndûngîvota gûtungatîra Ngai na ûtungatîre ûtonga.”

Maûndû mamwe ma marîa Jesû aaririe

(Mat 11.12-13; 5.31-32; Mar 10.11-12)

14Rîrîa Afarisai meegwire maûndû mama monthe, nîmaanyûrûririe Jesû nîûndû maarî akorokeru mbeca mûno. 15Nake Jesû nîwamerire atîrî, “Mue mwendaga gwîtua ûrîa mûrî aro methorî ma andû, nwatî Ngai nîwîcî ngoro cienyu. Nîûndû maûndû marîa monekanaga marî na vata methorî ma andû matirî vata methorî ma Ngai.

16 # Mat 11.12-13 “Maûndû marîa mandîkîtwe Wathorî wa Musa na mavukurî ma arathi nîmaavunjirue nginya vîndî ya Johana Mûvatithania. Kuuma vîndî îo, Ûvoro Mwaro wa Ûthamaki wa Ngai nî ûvunjagua, na mûndû wa wonthe nî ageragia na vinya ûrîa angîtonya kuo. 17#Mat 5.18 Nwatî kûthira kwa îgûrû na nthî nî kûvûthû gûkîra kûthengutia gatiring'o wana kamwe ka Watho.

18 # Mat 5.32; 1Akor 7.10-11 “Mûthuuri wa wonthe ûtecaga mûka na akavikia mûndûmûka wîngî nîatharagia. Nake mûthuuri wa wonthe ûvikagia mûndûmûka ûrîa ûtetwe nî mûthuuriwe, nîatharagia.

Gîtonga na Lazaro

19“Vîndî îmwe kwarî na mûndû warî mûtongu mûno na wekagîra nguo cia goro cia rangi ya njambarawe. Nake mûndû ûcio atûûraga na mîkarîre ya goro mûno mîthenya yonthe. 20Na wa kûu kwarî na mûthîni ûmwe wetagwa Lazaro, ûrîa warî na ironda nyîngî mûno mwîrîrî wake. Nake Lazaro nîwaviragwa mûromorî wa nyomba ya gîtonga kîu, 21arî na mwîrîgîrîro wa kûrîa matigari ma irio irîa ciagwîcaga kuuma metharî ya gîtonga kîu. Nacio ngui nîciathiîcaga kûrî ke na ikamûcûnacûna ironda.

22“Kavinda karîa mûthîni ûcio aakwire, araika nîmaamûkuuire na makîmûvira îgûrû agekaranîre na Iburahimu kîrugorî îgûrû. Nakîo gîtonga kîu nîgîakwire na gîkîthikwa. 23Rîrîa Kîamthînîkaga kîrî îcuarî, nîkîaroririe na îgûrû na gîkîona Iburahimu na Lazaro marî varaca na mekaranîrîte. 24Kwoguo gîtonga kîu nîgîetire Iburahimu na gîkîmwîra atîrî, ‘Vava Iburahimu! Mbîguîra ntha na ûndûmîre Lazaro athiî atovokie mûthiia wa kaara gake ka njara manjîrî nîguo avoravorie rûrîmî rwakwa nîûndû nînîrathînîka mûno mwakirî ûyû!’

25“Nwatî Iburahimu nîwamwîrire atîrî, ‘Mwana wakwa, taririkana atî kavinda karîa warî mwoyo nîwavetwe maûndû monthe maro, nake Lazaro akavewa maûndû monthe macûku. Nwatî rîu Lazaro arî gîkenorî nawe ûrî mathînarî. 26Wana twa ûguo wonga, gatagatîrî getû nawe nîvenje mûtaro mûnene mûno, nîguo ûrigîrîrie andû arîa mangîenda gûkîrania maume na gûkû maûkîte kûrî mue na kûrigîrîria arîa mangîenda gûkîrania maume na kûrîa mûrî maûkîte na kûrî tue.’ 27Nakîo gîtonga kîu nîkîerire Iburahimu atîrî, ‘Vava Iburahimu nakûthaitha vi ûtûme Lazaro gwetû mûciî, 28nîûndû nîrî na aa mûrwaiya atano nîguo athiî akamakanie matigeke ta ûrîa nekaga nîguo wa nao matigaûke gûkû mathînarî mama.’

29“Nake Iburahimu nîwerire gîtonga kîu atîrî, ‘Aa mûrwanyûkwe marî na Musa na Arathi a kûmakania.’ 30Nakîo gîtonga kîu nîgîacokerie Iburahimu atîrî, ‘Vava Iburahimu, ûguo tî mwîganu! Angîthîrwa mûndû nwa ariûke na akathiî kûrî o, o nwa meerire mevia mao.’ 31Nwatî Iburahimu nîwacokerie gîtonga kîu atîrî, ‘Angîthîrwa matingîthikîrîria Musa na Arathi, wana mûndû akariûka matingîmûthikîrîria.’ ”

Currently Selected:

Luka 16: KKB

Highlight

Copy