Luka 18
18
Ngerekano ya mûndûmûka wa ndigwa na mûcirithania
1Jesû nîwacokire akîva arutwa ake ngerekano ya kûmonia atî nîmagîrîrwe nî kûvoya vingo cionthe matagûkua ngoro. 2“Îtûûrarî rîmwe kwarî na mûcirithania ûtetigagîra Ngai kana ava andû gîtîîo. 3Na wa kûu îtûûrarî rîu, kwarî na mûndûmûka wa ndigwa watindaga akîthiî kûrî mûcirithania ûcio na akamûthaithaga athikîrîrie ivooto ciake akîmwîraga atîrî, ‘Nie nîrenda ûndethererie ciirarî îno nthitangîtwe nayo nî nthû yakwa!’ 4Nake mûcirithania ûcio nîwekarire mîthenya mîîngî akîregaga gûtethereria mûndûmûka ûcio, nwatî mûthiiarî akîîra na ngoro yake atîrî, ‘Wana angîthîrwa ndiîtigagîra Ngai kana ngava andû gîtîîo, 5nie nwa nginya ndethererie mûndûmûka ûyû nîguo ndagatindage agîûka kûnogia!’ ”
6Nake Mwathani nîwathiîre na mbere kuga atîrî, “Nîmwegua ûrîa mûcirithania ûcio ûtaarî mûthingu aaugire? 7Na kinthî ûguo twaguo Ngai atethagia andû ake arîa mamûvoyaga ûtukû na mûthenya? Anga Ngai nwa arege kûmatethia na îvenya? 8Nîramwîra atî Ngai nîamatethagia na îvenya. Nwatî vîndî îrîa Mûrû wa Mûndû agaaûka gûkû nthî, nîakeethîrîria andû mamwîtîkîtie?”
Ngerekano ya Mûfarisai na mwîtia wa mbeca cia gooti
9Andû arîa meetucaga atî nîo athingu na magatua atî arîa engî onthe nî evia, nîmaaveerwe nî Jesû ngerekano îno. 10“Vîndî îmwe kwarî na andû aîrî maathiîre hekarûrî kûvoya. Ûmwe aarî Mûfarisai na ûcio wîngî aarî mwîtia wa mbeca cia gooti.
11“Mûfarisai nîwarûngamire vandû arî wenga na akîvoya#18.11 Nîwarûngamire vandû arî wenga na akîvoya: Mandîko mamwe maugaga ‘akîrûngama, akîvoya na mwîîro wa ngoro.’ na ngoro atîrî, ‘Ngai nîragûcokeria ngatho nîûndû nie ndiîkariî ta andû arîa engî methagîrwa marî akoroku, aganu na andû arîa mavûûraga ûmaraa. Nîragûcokeria ngatho nîûndû nie ndiîkariî ta mwîtia ûrîa wa mbeca cia gooti. 12Nîînyerekagia maita maîrî wa kiumia na vingo cionthe ngaruta gîcunjî gîa îkûmi gîa kîrîa kîonthe nathûkûma.’
13“Nwatî mwîtia wa mbeca cia gooti nîwarûngamire vandû varaca na ndangîetîkîrire gûtiira metho make na îgûrû, nwatî ke nwakwa eeriraga akiugaga atîrî, ‘Ûûi Ngai, mbîguîra ntha, nie nîrî mwîvia!’ 14#Mat 23.12; Luka 14.11 Nie nîramwîra na ma atî, mwîtia ûcio wa mbeca cia gooti eenûkire gwake mûciî arî mwagîrîru methorî ma Ngai gûkîra Mûfarisai. Nîûndû mûndû wa wonthe wînenevagia nîakaanyivua nake ûrîa wonthe wînyivagia nîakaanenevua.”
Jesû nîwarathimire twana
(Mat 19.13-15; Mar 10.13-16)
15Andû amwe nîmaavirire twana twao kûrî Jesû nîguo atwigîrîre njara. Na rîrîa arutwa ake moonire ûguo nîmaamakaanirie. 16Nwatî Jesû nîwetire twana tûu akiuga atîrî, “Îtîkîriani twana tûke kûrî nie. Tigani gûtûgiria, nîûndû Ûthamaki wa Ngai nî wa arîa mekariî ta twana tûtû. 17Nîramwîra na ma atî, mûndû wa wonthe ûtamûkagîra Ûthamaki wa Ngai ta kaana ndagaaûtonya.”
Mûndû warî mûtongu
(Mat 19.16-30; Mar 10.17-31)
18Nake mûtongoria ûmwe warî Mûyahudi nîwaûririe Jesû atîrî, “Mwarimû Mwaro, nîngîîka atîa nîguo ngaagaîrwa mwoyo wa tene na tene?”
19Nake Jesû nîwamûririe atîrî, “Ûrambîta mwaro nîkî? Gûtirî mûndû mwaro tiga Ngai wenga. 20#Ntha 20.12-16; Gûco 5.16-20 We nîwîcî maathani maugîte atî: ‘Ndûkanatharie; ndûkanaûragane; Ndûkanaîe; ndûkanaigîrîre mûndû ûrîa wîngî kîng'enyo; na ûtîîe aguo na nyûkwe.’ ”
21Nake mûndû ûcio nîwamûcokerie atîrî, “Nie nîmbathîkîrîte maathani mama kuuma nîrî mûnini.”
22Rîrîa Jesû eegwire ûguo nîwerire mûndû ûcio atîrî, “Varî na ûndû ûmwe tu ûtigarîtie. Thiî ûkendie indo cionthe ciaku na ûve athîni mbeca icio, nawe nîûkwîigîra mûthithû îgûrû kwa Ngai, na ûcoke ûnûmîrîre.” 23Nwatî rîrîa mûndû ûcio eegwire ûguo, nîwanyitirwe nî kîeva kîîngî mûno nîûndû ke aarî mûtongu mûno.
24Rîrîa Jesû oonire mûndû ûcio anyitwa nî kîeva nîwaugire atîrî, “Na kaî nî ûndû mûmû itonga gûtonya Ûthamakirî wa Ngai-î! 25Na nî ûndû mûvûthû ngamîîra gûtonyerera îrimarî rîa cindano, gûkîra gîtonga gûtonya Ûthamakirî wa Ngai?”
26Andû arîa meegwire Jesû akiuga ûguo nîmaamûririe atîrî, “Nî ûrîkû vi ûngîvonoka.”
27Nake Jesû nîwamacokerie atîrî, “Maûndû marîa andû matangîvota gwîka, Ngai nwa avote kûmeka.”
28Nake Petero nîwacokire akiuga atîrî, “Taroria! Tue tûtigîte mîciî yetû na tûgakûrûmîrîra.”
29Nake Jesû nîwamerire atîrî, “Nîramwîra na ma atî mûndû wa wonthe ûtigaga mûciî wake, kana mûka, kana aa mûrwang'ina, kana aa mwarwang'ina, kana aciari ake, wana kana ciana ciake nîguo atungatîre Ûthamaki wa Ngai, 30nîakaagîa na makîria ya kîrîa atigîte kavindarî gaka tûrî na acoke agîe na mwoyo wa tene na tene.”
Jesû nîwaririe riita rîa kathatû ûvoro wîgiî gûkua gwake
(Mat 20.17-19; Mar 10.32-34)
31Jesû nîwocire arutwa ake akîthiî ndundu nao na akîmera atîrî, “Tathikîrîriani! Tûthiîte Jerusalemu kûrîa maûndû monthe marîa arathi maandîkire megiî Mûrû wa Mûndû makaavingîrua. 32Mûrû wa Mûndû nîakaanenganîrwa kûrî andû a ndûrîrî. Nao nîmakaamûnyûrûria, mamwîke maûndû ma ûûra nthoni na mamûtuîre mata. 33Nîmagaacoka mamûvûûre na ivoko na mamûûrage. Na mûthenya wa kathatû nîakaariûka.”
34Nwatî arutwa matiataûkîrwa nî maûndû mau. Maûndû marîa Jesû aaugaga maarî na nthitho, kwoguo matiamenya ûrîa aaugaga.
Jesû nîwavonirie mûtumumu watûûraga avoyaga ûtethio
(Mat 20.29-34; Mar 10.46-52)
35Rîrîa Jesû aakuvîvîrie îtûûra rîa Jeriko, nîwakinyire vandû vaarî na mûtumumu wekarîte nthî rûtererî rwa njîra akîvoyaga ûtethio. 36Rîrîa mûndû ûcio eegwire înegene rîa andû mavîtûkîte, nîwaûririe atîrî, “Nîndûî kîrathiî na mbere?”
37Nao andû nîmaamûcokerie atîrî, “Nî Jesû wa Nazarethi ûvîtûkîte.”
38Nake mûtumumu ûcio nîwaugîrîrie atîrî, “Jesû! Mûrû wa Daudi! Mbîguîra ntha!”
39Nao andû arîa maarî mbere ya Jesû nîmaakaanirie mûtumumu ûcio na makîmwîra akire. Nwatî mûtumumu ûcio nîwaugîrîrie mûno akiugaga atîrî, “Mûrû wa Daudi! Mbîguîra ntha!”
40Nake Jesû nîwarûngamire na akîathana atî mûtumumu ûcio avirwe kûrî ke. Na rîrîa mûtumumu akuvîvîrie, Jesû nîwamûûririe atîrî, 41“Ûrenda ngwîkîre atîa?”
Nake mûtumumu ûcio nîwamûcokerie atîrî, “Mwathani nie nîrenda gûcoka kwona.”
42Nake Jesû nîwamwîrire atîrî, “Coka kwona! Gwîtîkia gwaku nîkuo gwatûma ûvone.”
43Na wa rîmwe mûtumumu ûcio nîwavotire kwona na akiuma Jesû vuva agîkumagia Ngai. Na rîrîa andû onthe moonire ûguo, nîmaakumirie Ngai.
Currently Selected:
Luka 18: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
