Mk 11

Yesũ Ailika Yelũsalemu ta Mũsumbĩ

(Mat 21.1-11; Lk 19.28-40; Yoa 12.12-19)

1Yesũ na amanyĩw'a make me vakuvĩ kũvika Yelũsalemu, nĩmavikie ndũanĩ yĩtawa Mbethivake na ĩngĩ yĩtawa Mbethani, vakuvĩ na Kĩĩma kya Mĩthata. Me vau Yesũ nĩwatũmie amanyĩw'a make elĩ 2amea atĩĩ, “Endai ndũanĩ ĩya yĩ mbee wenyu. Mwavika vo, nĩmũkwĩthĩa ndena ya ĩng'oi ĩtaakua mũndũ yovetwe mũtĩnĩ. Mĩthasyei na mũimĩete vaa. 3Mwakũlw'a nĩ mũndũ, ‘Mwĩmĩthasya yakĩ?’ Mũtavyei, ‘Mwĩai e na vata nayo na nũkũmĩtũnga o mĩtũkĩ.’ ”

4Nĩvo ĩndĩ maendie na meethĩa ndena ya ĩng'oi yovetwe nza, vakuvĩ na mũomo wa nyũmba ũla ũsyaĩtye ngalĩko ya nzĩanĩ nene. Maimĩthasya, 5andũ maũngyĩ vau nĩmamakũlilye atĩĩ, “Mwĩthasya ndena ĩsu ya ĩng'oi yakĩ?”

6Namo ala amanyĩw'a masũngĩa o tondũ Yesũ wamatavĩtye, na andũ asu mamaeka mathi.

7Nĩmaetie ndena ĩsu vala ve Yesũ, na mailĩĩla ngũa syoo mũongo kwayo, na Yesũ atũla ĩũlũ yamũkua. 8#Sav 118.25-26 Andũ nĩmalanilye ngũa syoo nzĩanĩ, na angĩ nĩmatũlaa mbonge sya mĩtĩ makalany'a kũu nzĩanĩ. 9Andũ ala maĩ mbee wake na ala mamumĩte ĩtina nĩmookĩlilye wasya mũnene mayasya atĩĩ, “Hosana! Nĩ mũathime ũla wũkĩte ĩsyĩtwanĩ ya Mwĩai. 10Nĩ mũathime ũsumbĩ ũla wĩũka wa ũmae waitũ Ndeviti! Hosana ĩũlũ ĩtunĩ!”

11Yesũ nĩwalikile Yelũsalemu na athi Ĩkalũnĩ; nĩwasyaisye kĩla kĩndũ kũu kw'onthe, na nũndũ kwaĩ vakuvĩ kũtuka, aumaala athi Mbethani e na ala amanyĩw'a ĩkũmi na elĩ.

Yesũ Ayĩumanĩa Mũkũyũ Ũte na Ũsyao

(Mat 21.18-19)

12Ũnĩ ũsu maumĩte Mbethani, Yesũ nĩweew'aa nzaa. 13E vaasa nĩwoonie mũkũyũ waĩ na matũ mathungu, na athi kũsisya kana wĩ na makũyũ aye. Yĩla wavikie vo, nĩweethĩie ndwĩ na ũsyao ĩndĩ no matũ mathei, nũndũ yĩyaĩ ĩvinda ya mĩkũyũ kwĩthĩwa na ũsyao. 14Yesũ nĩweeie mũkũyũ ũsu atĩĩ, “Ndũkaasyaa ĩngĩ ĩkũyũ o na yĩmwe yĩĩwa nĩ mũndũ!” Amanyĩw'a make nĩmeewie aineena ndeto isu.

Yesũ Ailũngya Andũ Mathooeasya Syĩndũ Ĩkalũnĩ

(Mat 21.12-17; Lk 19.45-48; Yoa 2.13-22)

15Yĩla mavikie Yelũsalemu, Yesũ nĩwalikile Ĩkalũnĩ na ambĩĩa kũlũngya andũ onthe ala mathooasya na ala mathooaa syĩndũ vo. Nĩwang'uthũlangile mesa sya ala mavunzasya mbesa na ivĩla sya ala mathooasya ndumbũ. 16Ndaaĩtĩkĩlya mũndũ o na ũmwe avĩtĩlye kĩndũ vau Ĩkalũnĩ. 17#Ĩsa 56.7; Yel 7.11 Nĩvo ĩndĩ wamanyĩisye andũ amea atĩĩ, “Maandĩkonĩ Matheu Ngai nũneenete akasya, ‘Nyũmba yakwa nĩ nyũmba ya kũvoyeawa nĩ andũ ma mbaĩ syonthe.’ Ĩndĩ mũmĩtw'ĩkĩthĩtye vandũ va kwĩvithaa avutani.”

18Athembi anene na amanyĩsya ma Mĩao nĩmeewie ũvoo ũsu, na mambĩĩa kũmantha nzĩa ya kũmũaa Yesũ nũndũ nĩmamũkĩaa, nĩkwĩthĩwa kĩla mũndũ nĩwaseng'etw'e nĩ momanyĩsyo make. 19Syũa yĩ vakuvĩ kũthũa, Yesũ na amanyĩw'a make nĩmaumie mũsyĩnĩ ũsu wa Yelũsalemu mathi.

Ũmanyĩsyo kuma Mũkũyũnĩ

(Mat 21.20-22)

20Kwakya kĩoko tene Yesũ na amanyĩw'a make maendete na nzĩa, nĩmoonie ũla mũkũyũ wĩ mũmũ, o na kũvikĩa ũkoma mĩi. 21Vetelo nĩwalilikanile ũndũ Yesũ waneenete ĩũlũ wa mũkũyũ ũsu na amwĩa atĩĩ, “Mũmanyĩsya, sisya ũla mũkũyũ ũnaumanĩie nĩwũmie.”

22Yesũ nĩwamasũngĩie amea atĩĩ, “Mũĩkĩĩei Ngai. 23#Mat 17.20; 1Ako 13.2 Nĩmũtavya w'o, o ũla ũkatavya kĩĩma kĩĩ, ‘Kũka vau wĩyĩkye ũkanganĩ,’ na aiĩkĩĩa ate na nzika ngoonĩ yake kana ũu wasya nũkwĩthĩwa, ndeto syake ikeanĩw'a. 24Kwa kĩtumi kĩu, nĩmũtavya kana yĩla mwavoya na mweetya Ngai kĩndũ, ĩkĩĩai kana nĩmwakwata na nũkũmũnenga. 25#Mat 6.14-15 Na yĩla mwaũngama mũvoye, ekeai kĩla mũndũ ũla mwĩ na ũndũ nake, nĩ kana o nake Ĩthe wenyu ũla wĩ ĩtunĩ amũekee naĩ syenyu. [ 26Ĩndĩ mwalea kũekea andũ ala angĩ mavĩtyo moo, o nake ĩthe wenyu ũla wĩ ĩtunĩ ndakamũekea mavĩtyo menyu.”]#11.26 Maandĩko amwe ma tene ma Ndeto ya Ngai nĩmatiĩte mũsoa ũũ

Yesũ Aikũlw'a vala Wumĩtye Ũkũmũ Wake

(Mat 21.23-27; Lk 20.1-8)

27Yesũ na amanyĩw'a make nĩmavikie ĩngĩ Yelũsalemu, na aitembeanga Ĩkalũnĩ, athembi anene na amanyĩsya ma Mĩao na atumĩa nĩmaendie vala ũĩ, 28na mamũkũlya atĩĩ, “Wĩĩka maũndũ aa na ũkũmũ mwaũ, na nũũ ũla ũkũnengete ũkũmũ ũsu wa kũmeka?”

29Yesũ nĩwamasũngĩie amea atĩĩ, “Nĩngũmũkũlya ĩkũlyo o yĩmwe, na mwanzũngĩa nĩngũmũtavya nĩĩka maũndũ aa na ũkũmũ mwaũ. 30Kwa ndavyei, Yoana anengetwe ũkũmũ wa kũvatisa nĩ andũ kana anengetwe nĩ Ngai?”

31Namo mambĩĩa kũoany'a maikũlany'a atĩĩ, “Twĩasya ata? Twasya, ‘Anengetwe nĩ Ngai,’ etũkũlya, ‘Nĩkĩ ĩndĩ mũtaaĩtĩkĩla ũvoo wa Yoana?’ 32Na tũitonya kwasya, ‘Anengetwe nĩ andũ.’ ” (Nĩmakĩaa andũ nũndũ andũ onthe nĩmeesĩ kana Yoana aĩ mwathani). 33Kwoou mamwĩa atĩĩ, “Tũyĩsĩ.”

Nake Yesũ amea, “O nakwa ndimũtavya nĩĩka maũndũ aa na ũkũmũ mwaũ.”

Currently Selected:

Mk 11: KAMBA

Highlight

Copy