Mk 12

Ngelekany'o ya Aĩmi Makomboete Mũũnda

(Mat 21.33-46; Lk 20.9-19)

1 # Ĩsa 5.1-2 Yesũ nĩwaneenie namo na ngelekany'o amea atĩĩ, “Ve mũndũ ũmwe wavandie mũũnda wake wa mĩsavivũ na awiĩĩa kĩthyũlũlũ. Nĩwaseũvisye ĩima ya kũvivĩaa ndivai, na aaka kĩtaa kĩtũlu vo. Nĩwaũkomboethisye kwa aĩmi mawũĩmae na athi kyalo nthĩ ĩngĩ. 2Ĩvinda ya kũketha nzavivũ yavika, nĩwatũmie mũthũkũmi ũmwe wake akanengwe kĩlungu kĩla kyake kya ngetha nĩ aĩmi amũetee. 3Ĩndĩ aĩmi asu nĩmakwatie mũthũkũmi ũsu mamũvũa, na mamũlũngya athi ate na kĩndũ. 4Nĩwatũmie mũthũkũmi ũngĩ, namo aĩmi asu mamũvũa o nake mamũũmĩsya mũtwe na kũmwĩkĩĩthya nthoni. 5Mwene wa mũũnda nĩwatũmie mũthũkũmi o ũngĩ, nake ũsu moaa. Nĩwatũmie angĩ aingĩ; amwe moo nĩmavũiwe na ala angĩ mooawa nĩ aĩmi asu. 6Mwene mũũnda atialile na mwana wake ũla wendete. Mũminũkĩlyonĩ nĩwamũtũmie kũla maĩ asũanĩĩte akasya, ‘Nĩmeũmũnenga mwana wakwa ndaĩa.’ 7Ĩndĩ aĩmi asu nĩmeeanie atĩĩ, ‘Ũũ nĩwe ũkatiĩwa mũũnda ũũ nĩ ĩthe; tũmũae na ũtiĩwa wake ũkatw'ĩka witũ.’ 8Kwoou nĩmamũkwatie mamũaa na mamwĩkya nza wa mũũnda ũsu.”

9Nĩvo ĩndĩ Yesũ wakũlilye andũ atĩĩ, “Mwene wa mũũnda akeeka ata? Akooka oae aĩmi asu na aikomboethya andũ angĩ mũũnda ũsu wake. 10#Sav 118.22-23 Inyw'ĩ nĩmũsomete Maandĩko Matheu ala maĩtye;

‘Ĩvia yĩla yaleilwe nĩ andũ ala makaa myako,

nĩyĩtw'ĩkĩte ĩvia yĩla ya vata mũno mwakonĩ.

11Mwĩai nĩwe wĩkĩte ũndũ ũsu,

na w'o nĩ wa kũseng'ya methonĩ maitũ!’ ”

12Atongoi asu nĩmendie kũmũkwata Yesũ nũndũ nĩmamanyie kana ematavasya ngelekany'o ĩsu aimatina. Ĩndĩ makĩa andũ, na kwoou maekana nake na mathi.

Ĩkũlyo ĩũlũ wa Kũĩva Koti

(Mat 22.15-22; Lk 20.20-26)

13Amwe ma Avalisi na ma nguthu ya Mũsumbĩ Elote nĩmatũmiwe makamũtee Yesũ aneene ũndũ ũtaĩlĩte kwa kũmũkũlya makũlyo. 14Nĩmaendie vala ũĩ na mamwĩa atĩĩ, “Mũmanyĩsya, nĩtwĩsĩ kana ũneenaa ũla w'o ũteũkĩa mũndũ, na ndwĩ mwendeesya wa ala anene, nũndũ we ũtavasya andũ meke kwenda kwa Ngai. Kwa tũtavye, nĩwaĩlu kũĩva mũsumbĩ wa Loma koti? Tũmũĩvae kana tũlee?”

15Yesũ nĩwamanyie ũseleke woo na kwoou amea atĩĩ, “Mwĩndata nĩkĩ? Nengei ndinalĩ ĩmwe nĩmyone.”

16Nĩmamũnengie, amĩsisya na amakũlya atĩĩ, “Visa ũũ na ĩsyĩtwa yĩĩ nĩ syaũ?”

Namo mamwĩa, “Nĩ sya mũsumbĩ wa Loma.” 17Nake amea atĩĩ, “Nengai mũsumbĩ kĩla kya mũsumbĩ, na mũinenga Ngai kĩla kya Ngai.” Nĩmaseng'iw'e mũno nĩ Yesũ.

Ĩkũlyo ĩũlũ wa Kũthayũũka kuma kwa Akw'ũ

(Mat 22.23-33; Lk 20.27-40)

18 # Meko 23.8 Asatũkai, ala maasya kana andũ maikathayũũka kuma kwa akw'ũ, nĩmaendie vala ve Yesũ mayenda kũmũkũlya ĩkũlyo, na kwoou mamwĩa atĩĩ, 19#Kũt 25.5 “Mũmanyĩsya, Mwose nĩwatũandĩkĩie mwĩao ũũ, ‘Ethĩwa mũndũ nĩwakw'a atia mũka ate kana, no nginya mwana-a-inyia ose mũndũ mũka ũsu ndiwa, nĩ kana asyaĩe mwana-a-inyia syana.’ 20Yuĩ, kwaĩ aũme mũonza ma inyia ũmwe. Ũla mũkũũ nĩwatwaanie na akw'a atia mũka ate kana. 21Mũinae nake nĩwoosie mũndũ mũka ũsu ekala nake ta mũka, ĩndĩ o nake akw'a atia vate kana. Ũla ũmũatĩĩe nake eeka o ta ũu. 22Onthe me mũonza nĩmakwie na vai ũmwe woo waatia kana. Ĩtina mũndũ mũka ũsu o nake nĩwakwie. 23Yu kwatũtavye, mũthenya ũla akw'ũ makathayũũka akeethĩwa e mũka wa wĩva, na onthe me mũonza nĩmamũtwaĩte?”

24Yesũ nĩwamasũngĩie amea atĩĩ, “Inyw'ĩ nĩmũvĩtĩtye nũndũ mũyĩsĩ Maandĩko Matheu kana o na vinya wa Ngai. 25Yĩla andũ makathayũũka kuma kwa akw'ũ, kũikethĩwa kũtwaana kana kũtwawa, nũndũ mo makeethĩwa mailyĩ alaĩka ma ĩtunĩ. 26#Kuma 3.6 Naw'o ũndũ wa kũthayũũka kuma kwa akw'ũ, nũndũ inyw'ĩ mũtaasoma ĩvukunĩ ya Mwose vala vawetete ĩũlũ wa kakuthu kakene? Ngai nĩwamwĩie Mwose atĩĩ, ‘Nyie ninyie Ngai wa Avalaamu, na Ngai wa Isaka, na Ngai wa Yakovo.’ 27We ti Ngai wa ala akw'ũ, ĩndĩ nĩ Ngai wa ala me thayũ. Kwoou inyw'ĩ nĩmũvĩtĩtye vyũ.”

Mwĩao ũla Mũnene

(Mat 22.34-40; Lk 10.25-28)

28 # Lk 10.25-28 Mũmanyĩsya ũmwe wa Mĩao nĩwavikie ĩvinda yĩla Yesũ na Asatũkai makananĩaa. Nĩweewie ũsũngĩo wa Yesũ wĩ mũseo na amũkũlya atĩĩ, “Mwĩao ũla mũnene kwĩ ĩla ĩngĩ nĩ wĩva?”

29 # Kũt 6.4-5 Yesũ nĩwamũsũngĩie amwĩa atĩĩ, “Mwĩao ũla mũnene nĩw'o ũũ, ‘Ĩthukĩĩsye we Ĩsilaeli, Mwĩai Ngai waitũ nowe Mwĩai e weka. 30Mwende Ngai waku na ngoo yaku yonthe, na thayũ waku w'onthe, na kĩlĩko kyaku kyonthe na vinya waku w'onthe.’ 31#Ali 19.18 Naw'o wa kelĩ nĩ ũũ, ‘Mwende mũtũi waku o tondũ wĩyendete we mwene.’ Vai mwĩao ũngĩ mũnene kwĩ ĩsu.” 32#Kũt 4.35 Nake mũmanyĩsya ũsu wa Mĩao amwĩa atĩĩ, “Weeka nesa Mũmanyĩsya; waneena w'o kana Ngai no ũmwe na vai ũngĩ eka we. 33#Osea 6.6 O ta ũu, mũndũ kũmwenda Ngai na ngoo yonthe, na ũmanyi w'onthe, na vinya w'onthe, na kũmwenda mũtũi wake o tondũ wĩyendete, nĩkũvĩtũkĩte mũno nthembo syonthe sya kũvĩvw'a na ila ingĩ syumĩaw'a Ngai.”

34Yesũ nĩwoonie asũngĩa na ũmanyi na amwĩa atĩĩ, “We ndwĩ vaasa na ũsumbĩ wa Ngai.” Ĩtina wa ũu vai mũndũ waatata kũmũkũlya Yesũ ũndũ ĩngĩ.

Ĩkũlyo ĩũlũ wa Klĩsto

(Mat 22.41-46; Lk 20.41-44)

35Yesũ akĩmanyĩsya Ĩkalũnĩ nĩwakũlilye atĩĩ, “Amanyĩsya ma Mĩao matonya ata kwasya kana Klĩsto nĩ nzyawa ya Ndeviti? 36#Sav 110.1 Ndeviti mwene aveveewe nĩ Veva Mũtheu nĩwaisye atĩĩ,

‘Ngai nĩwamwĩie Mwĩai wakwa:

Ĩkala nthĩ ngalĩko ya kw'oko kwakwa kwa aũme,#12.36 ngalĩko ya kw'oko kwakwa kwa aũme: Vaa nĩ vandũ va ndaĩa na ũkũmũ

kũvika yĩla nĩmaia amaitha maku ungu wa ũtonyi waku.’

37Ethĩwa ĩndĩ Ndeviti eetie Klĩsto, ‘Mwĩai,’ kũtonyeka ata Klĩsto ethĩwe e nzyawa yake?”

Yesũ Aikany'a Andũ Mesũvĩane na Amanyĩsya ma Mĩao

(Mat 23.1-36; Lk 20.45-47)

Ĩkomano ĩnene nĩyamwĩthukĩĩasya Yesũ akĩmanyĩsya yĩna ũtanu. 38Nthĩnĩ wa ũmanyĩsyo wake, Yesũ nĩwaisye atĩĩ, “Ĩsũvĩanei na amanyĩsya ma Mĩao; mendete kũthi mekĩĩte ngũa ndaasa, na kũkethaw'a na ndaĩa me ndũnyũ. 39O ta ũu mendete kwĩkala ivĩlanĩ sya mbee nyũmbanĩ sya Ayuti sya kũthaithĩa na kũmbanĩa, na kwĩkalaa kũndũ kwa ndaĩa me mbokanĩ. 40Nĩmavenaa aka ndiwa syĩndũ syoo na kwĩseũvya kwa kũvoya mboya ndaasa. Ũsilĩlo woo ũkeethĩwa wĩ mũnene mũno.”

Mũvothi wa Kĩveti Ndiwa

(Lk 21.1-4)

41Yesũ nĩwailyĩ nthĩ vakuvĩ na kĩndũ kĩla kyeekĩawa mĩvothi, na nĩwasyaĩĩsye ũndũ andũ aingĩ meekĩaa mbesa kĩnandũnĩ kya Ĩkalũ. Andũ aingĩ ala athwii nĩmeekĩaa mbesa mbingĩ. 42Ĩndĩ kĩveti kĩmwe ndiwa na kĩtaĩ syĩndũ, nĩkyookie na kyeekĩa tũsumunĩ twĩlĩ, tũla nĩ ũndũ ũmwe na silingi ũmwe. 43Nĩvo ĩndĩ Yesũ wametie amanyĩw'a make na amea atĩĩ, “Nyie nĩmũtavya w'o kana kĩveti kĩĩ ndiwa na kĩte syĩndũ, nĩkyo kyaumya mbingĩ kũte andũ ala angĩ onthe. 44Andũ ala angĩ meumasya nũndũ mena mbingĩ, ĩndĩ kyo, o na kau nĩ ngya, kyaumya syonthe ila kĩĩ nasyo. Isu nosyo kĩĩ kĩkwatya kwondũ wa mavata makyo onthe.”

Currently Selected:

Mk 12: KAMBA

Highlight

Copy