Mk 13

Yesũ Ayathana Kwanangwa kwa Ĩkalũ

(Mat 24.1-2; Lk 21.5-6)

1Yesũ aumaalũkĩte Ĩkalũnĩ, ũmwe wa amanyĩw'a make nĩwamwĩie atĩĩ, “Mũmanyĩsya, kwa sisya ũndũ mavia aya manakavĩte na ũndũ myako ĩno ĩnenevete!” 2Nake Yesũ amwĩa atĩĩ, “Nũkwona myako ĩno ĩnenevete ũu? Vai ĩvia yĩmwe yĩkatiwa yĩ ĩũlũ wa yĩngĩ; onthe makaomboangwa vyũ.”

Mathĩna na Maũnyamao ala Mokĩte

(Mat 24.3-14; Lk 21.7-19)

3Yesũ ailyĩ nthĩ Kĩĩmanĩ kya Mĩthata asyaĩtye Ĩkalũnĩ, Vetelo na Yakovo na Yoana na Endelea nĩmaendie vala ũĩ vate andũ angĩ mamũkũlya atĩĩ, 4“Tũtavye, maũndũ aa makeethĩwa ĩndĩĩ, na nĩ kyaũ kĩkonany'a kana ĩvinda yĩ vakuvĩ maũndũ asu methĩwe?”

5Yesũ amea atĩĩ, “Ĩkalai mwĩsũvĩĩte na mũiketĩkĩle mũndũ o na wĩva amũkenge. 6Andũ aingĩ makooka na ĩsyĩtwa yakwa mayasya, ‘Ninyie Klĩsto,’ na makakenga andũ aingĩ. 7Yĩla mwĩĩw'a ituu sya makaũ na ngewa sya makaũ mokĩte mũikaamake. Maũndũ asu no nginya mekĩke, ĩndĩ maikethĩwa mayonany'a kana ĩvinda ya mũminũkĩlyo nĩ ĩviku. 8Nthĩ ĩkakwatya kaũ na ĩngĩ, na ũsumbĩ ũkavithũkĩa ũngĩ. Kũkeethĩwa itetemo sya nthĩ kũũ na kũũ, na kũkeethĩwa na mayũa. Maũndũ asu nĩmo makethĩwa wambĩlĩĩlyo wa thĩna, ta woo ũla wambaa kũkwata mũndũ mũka ĩvindanĩ ya kũsyaa.

9 # Mat 10.17-20; Lk 12.11-12 “Inyw'ĩ nĩmwaĩlĩte kwĩsũvĩa nũndũ andũ makamũkwata na kũmũtwaa kotinĩ, na o na makamũvũĩa nyũmbanĩ sya Ayuti sya kũthaithĩa na kũmbanĩa. O ta ũu nũndũ wa kwĩthĩwa mwĩ aatĩĩi makwa, mũkatwawa mbee wa makavana na asumbĩ mwĩthĩwe ngũsĩ kwamo. 10Ĩndĩ mũminũkĩlyo ũtanoka, no nginya ũvoo mũseo wĩamba kũtavanw'a kwa andũ onthe. 11Yĩla mwĩkwatwa na kũtwawa kotinĩ mũikaatinde mũithĩnĩka mwĩthi kwasya ata. Mwĩneena kĩla mwĩnengwa kavindanĩ o kau, nũndũ ndeto ila mũkaneena iikethĩwa syĩ syenyu; ikauma kwa Veva Mũtheu. 12Mũndũ akanengane mwana-a-inyia oawe, na ĩthe wa mwana akanengane mwana wake oawe. O ta ũu, syana ikookĩla ilee asyai na kũmanengane moawe. 13#Mat 10.22 Nenyu mũkamenwa nĩ andũ onthe nũndũ wakwa, ĩndĩ mũndũ ũla wĩũmĩĩsya kũvika mũminũkĩlyo akatangĩĩwa.

Kĩndũ kya Kũvukya

(Mat 24.15-28; Lk 21.20-24)

14 # Nda 9.27; 11.31; 12.11 “Yĩla mũkona, ‘Kĩndũ kya kũvukya kĩetae wanangĩko,’ kĩũngyĩ vala kĩtaĩlĩte kwĩthĩwa, (Mũndũ ũla ũkũsoma vaa nĩatate kũelewa nĩ kĩla kĩũwetwa), andũ ala me Yutia mekĩa mathi iĩmanĩ. 15#Lk 17.31 Mũndũ ũla ũkethĩwa e kĩalanĩ kya nyũmba yake ĩũlũ, ndakaanange ĩvinda ayuma alike nyũmba ose kĩndũ athi nakyo. 16O ta ũu, mũndũ ũla ũkethĩwa e mũũndanĩ, ndakaasyoke nyũmba kwake akose ngũa yake ya ĩũlũ. 17Ĩvinda yĩu yĩkeethĩwa yĩ ya thĩna mũnene kwa aka ala aito, na ala makethĩwa me na twana tũnini tũkwonga! 18Voyai Ngai nĩ kana maũndũ asu maikaaĩthĩwe ĩvindanĩ ya mbevo na mbua! 19#Nda 12.1; Meko 7.14 Nũndũ mathĩna ma ĩvinda yĩu makeethĩwa me mathũku mũno kũvĩtũka thĩna o na wĩva, ũla waaĩthĩwa kuma Ngai oomba nthĩ kũvika yu, o na kũikethĩwa thĩna ũngĩ wĩana ta ũsu. 20Ta kethĩwa Ngai ndaolete matukũ asu, vai mũndũ ũvĩta. Ĩndĩ kwondũ wa anyuve make, nũolete matukũ asu.

21“Kwoou ĩvindanĩ yĩu ethĩwa mũndũ o na wĩva akamwĩa, ‘Sisyai, Klĩsto e vaa!’ kana, ‘E vaya,’ mũikaaĩtĩkĩle ndeto syake. 22Kũkaumĩla andũ aingĩ mekwĩyĩta Klĩsto o vamwe na athani aingĩ ma ũvũngũ. Makeeka syama na maũndũ ma kũseng'ya nĩ kana masye andũ, o na ala anyuve ma Ngai ethĩwa ũu nũtonyeka. 23Ĩndĩ inyw'ĩ ĩsũvĩei! Nĩnamũtavya maũndũ onthe ĩvinda yĩu yĩtanavika.

Kũka ĩngĩ kwa Mwana wa Mũndũ

(Mat 24.29-31; Lk 21.25-28)

24 # Ĩsa 13.10; Esek 32.7; Yoe 2.10,31; 3.15; Ũvu 6.12 “Ĩvindanĩ yĩu ĩtina wa mathĩna asu, syũa yĩkaya kĩvindu na mwei ndũkaumya kyeni. 25#Ĩsa 34.4; Yoe 2.10; Meko 6.13 Ndata ikavalũkanga kuma matunĩ, na mavinya ma syĩndũ ila syĩ yayayanĩ makathingithangw'a. 26#Nda 7.13; Ũvu 1.7 Nĩvo ĩndĩ andũ makamwona Mwana wa Mũndũ okĩte e mathweonĩ na e na ũtonyi na ndaĩa nene. 27Akatũma alaĩka mathi makombany'e anyuve make kuma kĩla vandũ ĩũlũ wa nthĩ.

Kwĩmanyĩsya kuma Mũkũyũnĩ

(Mat 24.32-35; Lk 21.29-33)

28“Ĩmanyĩsyei ũndũ kuma mũkũyũnĩ. Yĩla mbonge syaw'o syoololoa na syamesya matũ, nĩmũmanyaa kana ĩvinda ya mbua yĩ vakuvĩ. 29No ta ũu, mwoona maũndũ asu mayĩkĩka, manyai kana Mwana wa Mũndũ e vakuvĩ vyũ, o vaa mũomonĩ. 30Nĩmũtavya w'o, maũndũ aa makeekĩka andũ ala me thayũ yu tũĩ matanakw'a onthe makathela. 31Ĩtu na nthĩ ikathela, ĩndĩ ndeto syakwa ikekala tene na tene.

Vai Mũndũ wĩsĩ yĩla Saa kana Mũthenya wa Mũminũkĩlyo Wĩvika

(Mat 24.36-44)

32 # Mat 24.36 “Vai mũndũ o na ũmwe wĩsĩ mũthenya kana saa wa mũminũkĩlyo. O na alaĩka ma ĩtunĩ vamwe na Mwana mayĩsĩ; no Asa e weka wĩsĩ mũthenya ũsu. 33Ĩkalai mwĩsũvĩĩte, vamwe na kwĩyũmbany'a, nũndũ mũyĩsĩ ĩla ĩvinda yĩu yĩkavika. 34#Lk 12.36-38 Kũkeethĩwa o ta ũndũ mũndũ akĩthi kyalo kuma mũsyĩ kwake wĩkaa. Nũtiĩaa athũkũmi wĩa ũla metethasya ate kw'o, na nĩwĩyĩaĩaa ũla ũsũvĩaa mũsyĩ aũsiasye nesa. 35Kwoou ĩkalai mwĩyũmbanĩtye, nũndũ mũyĩsĩ yĩla mwene wa mũsyĩ wĩũka. Nũtonya kũka wĩoo, kana ũtukũ katĩ, kana kũkilĩlye kũkya, kana syũa yĩyuma. 36Nũtonya kũka kwa kĩthũlũmũko na aimwĩthĩa mũkomete. 37Ũndũ ũsu ngũmũtavya inyw'ĩ, nĩtavya andũ onthe: Ĩkalai mwĩyũmbanĩtye!”

Currently Selected:

Mk 13: KAMBA

Highlight

Copy