Mk 10
10
Yesũ Aimanyĩsya ĩũlũ wa Kũtaanĩsya kwa Andũ Matwaanĩte
(Mat 19.1-12; Lk 16.18)
1Yesũ nĩwaumie vau athi nthĩ ya Yutia, na ainganĩsya ngalĩko ĩla ĩngĩ ya Ũsĩ wa Yolotani. Andũ aingĩ nĩmookie ĩngĩ na moombanĩa vala ũĩ, nake ambĩĩa kũmamanyĩsya o ũndũ wakothaa kwĩka.
2Avalisi amwe nĩmookie vala ũĩ mayenda kũmũtata na kwoou mamũkũlya atĩĩ, “Nĩwaĩlu mũndũ kũlũngya mũka?”
3Yesũ nĩwamakũlilye atĩĩ, “Inyw'ĩ mwanengiwe mwĩao ũilyĩ ata nĩ Mwose?” 4#Kũt 24.1-4; Mat 5.31 Namo mamwĩa, “Mwose nĩweetĩkĩlilye mũndũ kũandĩka valũa wa kũmũlea mũka, na akĩmũlũngya athi vyũ.” 5Nake Yesũ amea atĩĩ, “Mwose amũandĩkĩie mwĩao ũũ nũndũ wa wũmũ wa ngoo syenyu. 6#Mwa 1.27; 5.2 Ĩndĩ kuma mwambĩlĩĩlyonĩ wa kũmbwa kwa nthĩ, Ngai oombie mũndũ-ũme na mũndũ mũka. 7#Mwa 2.24 ‘Kĩu nĩkyo kĩtumaa mũndũ-ũme auma kwa ĩthe na nyinyia, na ailũmany'a na mũka wake, 8na elĩ makĩtw'ĩka kĩndũ kĩmwe.’ Kwa kĩtumi kĩu, ti andũ elĩ ĩngĩ, ĩndĩ nĩ kĩndũ kĩmwe. 9Kwoou mũndũ o na wĩva ndakaataany'e ala Ngai ũkwatanĩtye.”
10Yĩla masyokie nyũmba, amanyĩw'a make nĩmamũkũlilye ĩngĩ ĩũlũ wa ũndũ ũsu wa mũtwaano. 11#Mat 5.32; 1Ako 7.10-11 Yesũ nĩwameie atĩĩ, “Mũndũ o na wĩva ũla ũlũngasya mũka na akĩtwaa mũndũ mũka ũngĩ, ethĩawa aivĩtĩsya mũka kwa kwĩka ũlaalai. 12Nake mũndũ mũka amũlea mũũme, na aitwawa nĩ mũndũ ũngĩ ethĩawa akĩlaalaa.”
Yesũ Aiathima Syana Nini
(Mat 19.13-15; Lk 18.15-17)
13Andũ amwe nĩmaeteie Yesũ syana nini aiathime kwa kũsilĩĩla moko, ĩndĩ amanyĩw'a make mamasiĩĩa kwĩka ũu. 14Yĩla Yesũ woonie ũu, athata na amea amanyĩw'a make atĩĩ, “Ekanai na syana nini syũke vala nĩĩ, mũikaisiĩĩe, nũndũ ũsumbĩ wa Ngai nĩ wa ala mailyĩ tasyo. 15#Mat 18.3 Nĩmũtavya w'o, mũndũ o na wĩva ũla ũtosaa ũsumbĩ wa Ngai ũndũ kana kanini katonya kũwosa, ndakalika vo.” 16Nĩvo ĩndĩ Yesũ woosie syana isu na aiathima kwa kũsilĩĩla moko.
Mũndũ Mũthwii Ayenda Thayũ Ũtathela
(Mat 19.16-30; Lk 18.18-30)
17Yesũ ayuma vau athi, mũndũ ũmwe nĩwookie vala ũĩ asembete, atulya ndu mbee wake na amũkũlya atĩĩ, “Mũmanyĩsya mũseo, naĩlĩte kwĩka ata nĩ kana nĩkwate thayũ ũtathela?”
18Yesũ amwĩa atĩĩ, “Wĩmbĩta mũseo nĩkĩ? Vai mũndũ mũseo; no Ngai mũseo e weka. 19#Kuma 20.12-16; Kũt 5.16-20 We nĩwĩsĩ ũndũ mĩao ĩkwasya: ‘Ndũkoae mũndũ; ndũkalaalae; ndũkoye; ndũkanengane ũkũsĩ wa ũvũngũ ĩũlũ wa mũndũ ũngĩ; ndũkavene mũndũ syĩndũ syake kwa nzĩa ya ũkengani, na nenga ĩthe waku na inyia waku ndaĩa.’ ”
20Mũndũ ũsu amwĩa atĩĩ, “Mũmanyĩsya, nyie nambĩĩie kũkwata mĩao ĩsu yonthe kuma nĩ mũnini.”
21Yesũ nĩwasyaisye mũndũ ũsu na ngoo yake yamwenda, na amwĩa atĩĩ, “Ve ũndũ ũmwe ũtialĩtye, naw'o nĩ ũũ: Enda ũkathoosye syĩndũ syaku syonthe na ũinenga ngya mbesa ila ũũkwata, naku ũkeethĩwa na ũthwii ĩtunĩ, na ĩndĩ ũyũka ũngatĩĩe.” 22Mũndũ ũsu eew'a ndeto isu, atukya ũthyũ na athi ew'ĩte woo mwingĩ nũndũ aĩ mũthwii mũno.
23Yesũ nĩwasiangisye ngalĩko syonthe na eea amanyĩw'a make atĩĩ, “Ũkeethĩwa wĩ ũndũ wĩ vinya kwa mũndũ mũthwii kũlika ũsumbĩnĩ wa Ngai!” 24Ndeto isu nĩsyaseng'isye amanyĩw'a mũno, ĩndĩ Yesũ amakindĩlĩĩla o ĩngĩ amea atĩĩ, “Syana syakwa, kũlika ũsumbĩnĩ wa Ngai nĩ ũndũ wĩ vinya mũno! 25Nĩ ũndũ wĩ laisi kwa ngamĩle kũlikĩla kalimanĩ ka singano, kũte mũndũ mũthwii kũlika ũsumbĩnĩ wa Ngai.” 26Amanyĩw'a make nĩmaseng'ie mũno nĩ ndeto syake na mamũkũlya atĩĩ, “Na yu nũũ ũla ũtonya kũkwata thayũ ũtathela?” 27Yesũ nĩwamasyaisye na amea atĩĩ, “Kwa andũ ũndũ ũsu ndũtonyeka, ĩndĩ kwa Ngai ti ũu, nũndũ kwa Ngai vai ũndũ ũtatonyeka.”
28Vetelo nake amwĩa atĩĩ, “Kwa sisya, ithyĩ nĩtũtiĩte syĩndũ syonthe tũkakũatĩĩa!”
29Yesũ asya atĩĩ, “Nĩmũtavya w'o, mũndũ o na wĩva ũla ũtiĩte mũsyĩ, kana ana-a-inyia, kana eĩtu-a-inyia, kana nyinyia, kana ĩthe, kana syana syake, kana ng'ũndũ kwondũ wakwa na kwondũ wa Ũvoo Mũseo, 30akakwata ĩtuvi nũndũ wa ũu. Ĩvindanĩ yĩĩ akakwata kũndũ ĩana: Mĩsyĩ, ana-a-inyia, eĩtu-a-inyia, aainyia, syana na ng'ũndũ, ĩndĩ ũu wĩ o vo akakwata mathĩna, na ĩvinda yĩla yũkĩte akakwata thayũ ũtathela. 31#Mat 20.16; Lk 13.30 Ĩndĩ aingĩ ala yu matongoetye makatongoew'a, na aingĩ ala yu matongoew'e makatongosya.”
Yesũ Aineena Ĩvinda ya Katatũ ĩũlũ wa Kũkw'a na Kũthayũũka Kwake
(Mat 20.17-19; Lk 18.31-34)
32Yesũ na andũ angĩ ala waĩ namo maĩ nzĩanĩ mambatĩte Yelũsalemu, na nĩwe waĩ mbee woo amatongoesye. Amanyĩw'a make nĩmaseng'ete mũno na andũ ala angĩ mamũatĩĩe maĩ na w'ĩa. Yesũ nĩwametie ala amanyĩw'a ĩkũmi na elĩ mathi nzama na ambĩĩa kũmatavya maũndũ ala mekũthi kwĩkĩka kwake. 33Nĩwameie atĩĩ, “Ĩthukĩĩsyei, yu tũendete Yelũsalemu, na Mwana wa Mũndũ nũkũthi kũnenganwe mokonĩ ma athembi anene na amanyĩsya ma Mĩao. Makamũtw'ĩĩa kũawa, na makĩmũnengane kwa Andũ-ma-mbaĩ-ingĩ, 34ala namo makamũthekeea na kũmũtw'ĩlanga mata, na kũmũvũa, na kũmũaa. Ĩndĩ akathayũũka kuma kwa akw'ũ ĩtina wa mĩthenya ĩtatũ.”
Yakovo na Yoana Makĩyĩtĩsya Ũnene vala ve Yesũ
(Mat 20.20-28)
35Nĩvo ĩndĩ Yakovo na Yoana, ana ma Nzevetii, mathengeeie vala ve Yesũ na mamwĩa atĩĩ, “Mũmanyĩsya, nĩtũkwenda ũtwĩke o ũndũ tũũkũkũlya.”
36Nake amakũlya atĩĩ, “Mwĩenda nĩmwĩke ata?”
37Namo mamũsũngĩa, “Twĩenda wĩtwĩkalya ithyĩ, ũmwe ngalĩko ya kw'oko kwaku kwa aũme, na ũla ũngĩ ngalĩko ya kw'oko kwaku kwa aka watw'ĩka mũsumbĩ.”
38 #
Lk 12.50
Yesũ amea atĩĩ, “Inyw'ĩ mũyĩsĩ kĩla mũũkũlya. Nĩmũtonya kũmĩĩsya kũnyw'a kĩkombe kya mathĩna kĩla ngilĩlye kũnyw'a? Na nĩmũtonya kũvatiswa na ũvatiso wa mathĩna ũla ngilĩlye kũvatiswa naw'o?”
39Namo mamwĩa atĩĩ, “Ĩĩ, nĩtũtonya.”
Nake Yesũ amea, “Inyw'ĩ mũkanyw'a kĩkombe kĩla nĩnyw'a, na kũvatiswa ũndũ nĩvatiswa, 40ĩndĩ ndi na ũtonyi wa kũnyuva ũla wĩĩkala ngalĩko ya kw'oko kwakwa kwa aũme, kana ngalĩko ya kw'oko kwakwa kwa aka. Ngai aiĩte myanya ĩsu kwondũ wa ala ũnyuvĩte meĩkala vo.”
41Yĩla amanyĩw'a ala angĩ ĩkũmi meewie kĩla Yakovo na Yoana makũlya nĩmathatiw'e nĩmo mũno. 42#Lk 22.25-26 Nĩvo ĩndĩ Yesũ wametie onthe vamwe na amea atĩĩ, “Inyw'ĩ nĩmwĩsĩ kana andũ ala masumbĩkaa Andũ-ma-mbaĩ-ingĩ, mamasumbĩkaa na ũkũmũ w'onthe, na anene moo nĩmameaĩaa. 43#Mat 23.11; Mk 9.35; Lk 22.26 Ĩndĩ ũu ti w'o kwaĩlĩte kwĩthĩwa kũilyĩ katĩ wenyu. Ethĩwa ũmwe wenyu nũkwenda kwĩthĩwa e mũnene, no nginya ethĩwe mũthũkũmi wa ala angĩ. 44Na ethĩwa ũmwe wenyu eenda kwĩthĩwa e mũtongoi wa ala angĩ, no nginya ethĩwe ngombo yenyu inyw'onthe. 45Nĩkwĩthĩwa o nake Mwana wa Mũndũ ndaaũka kũthũkũmwa nĩ andũ, ĩndĩ ookie kũmathũkũma ne we, na kwĩnengane akw'e nĩ kana ovosye andũ aingĩ kuma naĩnĩ.”
Yesũ Aivosya Kĩlalinda kĩtawa Mbatimaũsi
(Mat 20.29-34; Lk 18.35-43)
46Yesũ nĩwavikie Yeliko e na amanyĩw'a make, na mayuma vau maatĩĩwa nĩ ĩkomano ĩnene. Mũndũ ũmwe kĩlalinda weetawa Mbatimaũsi, mwana wa Timaũsi, ailyĩ nthĩ ũtee wa nzĩa akĩvoya andũ syĩndũ. 47Yĩla weewie kana Yesũ kuma Nasaleti nĩwe ũvĩtĩte, nĩwamwĩtie na wasya mũnene ayasya atĩĩ, “Yesũ mwana wa Ndeviti, mbĩw'ĩe tei!”
48Andũ aingĩ nĩmamũkanisye avindye, ĩndĩ nake eetana na wasya mũnene mbeange, “Mwana wa Ndeviti, mbĩw'ĩe tei!”
49Yesũ nĩwaũngamie na asya atĩĩ, “Mwĩtei oke vaa.”
Kwoou meeta mũndũ ũsu makĩmwĩa, “Ĩthĩwa na ũtanu, ũkĩla Yesũ nũkũkwĩta!”
50Nĩwekisye ĩtheka ngũa ĩla weevw'ĩkĩte, athaanyũka na athi vala ve Yesũ.
51Yesũ nĩwamũkũlilye atĩĩ, “Wĩenda ngwĩke ata?”
Nake amwĩa, “Mũmanyĩsya, nĩenda ũndonyethye kwona nthĩ.” 52Nake Yesũ amwĩa atĩĩ, “Enda, nĩwavow'a nũndũ wa mũĩkĩĩo waku.”
Vau kwa vau nĩwambĩĩie kwona nthĩ na athi amũatĩĩa Yesũ.
Currently Selected:
Mk 10: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
