EMERENG’ANIO 3
3
Ogosemia ekiaare egeke
1Omwana one, tobaisa kweba amorokererio aane, korende tiga enkoro yao ebwate amachiko aane. 2Ayio nagere omenye amatuko amange, na emiaka emenge, naende ogendererete koba nomorembe. 3Totiga obuya na ekeene birue asore; obisibe ase rigoti riao, na obirike ase enkoro yao. 4Igo nario oranyore ogwancherwa na okomanya okuya ase obosio bwa Nyasae, na ase mwanyabanto.
5Osemerie Omonene nenkoro yao yonsi; tobaisa gosemeria okomanya kwao. 6Orengererie Omonene, omoorokie ase chinchera chiao chionsi, nere narongeyie oboeto bwao. 7Tobaisa gwekora omong’aini ase okorora kwao omonyene; omoiroke Omonene na bweatanane korwa ase amabe. 8Korakore igo, ayio nagwenie omobere oo abeke emeseto y’amauga ao chinguru. 9Osike Omonene ne chinibo chiao chionsi na ogotongora kwao gwonsi kw’endagera. 10Erio ebiage biao mbiichore nendagera enyinge na ebimitero biao biichore nedivai engiya.
11Omwana one, tobaisa kwanga gose gochaya ogoaka kw’Omonene kw’ogokorongeyia. 12Omonto onde bwensi Omonene anchete nigo akomorongeyia, buna ise omwana akorongeyia omwana oria agokirie nere. 13Nare nomogoko omonto oyio onyorire obong’aini naende ore nokomanya. 14Obong’aini nigo bobwate ebitoki ebinge kobua ebie chifeta na ebie chitahabu. 15Nigo bore nengencho enene kobua amagena akomeka‐meka e rigori rinene, gose tokoboreng’ania na kende gionsi oganetie. 16Obong’aini nigo bobwate obogima bw’amatuko amange ase okoboko kwaye gw’okorio, na ase okoboko kwaye gw’okobee nigo bobwate obonda obonge amo nogosikwa. 17Chinchera chiaye nigo chire echi’omogoko, na oboeto bwaye bwonsi nigo bore obw’omorembe. 18Nigo bore omote bw’obogima ase abwo babobwatererete; na kera omonto ogendererete kobobwata bokong’u nasesenirie.
19Omonene nigo abegete oboroso bw’ense nobong’aini bwaye,
na agakong’ia igoro nokomanya kwaye.
20Ase obong’aini bwaye chindiba nigo chikobochoria,
na amare atonyia riime.
21Omwana one, bwata bokong’u obong’aini obuya na okomanya; tobaisa gotiga ebio birue ase obosio bwao. 22Igo ebio mbibe obogima ase omoyo oo, na ogwechabera okuya ase rigoti riao. 23Erio notaare ase enchera yao kore noborendi obuya, gose tokogochwa okogoro kwao. 24Ekero ogochia korara, toba nobwoba, koraire nonyore chitoro chingiya. 25Tobaisa kwoboa okogosa kogocha mobosokano, gose ogosirigwa kw’abanyabibe kogocha buna omoubera. 26Omonene nabe ogosemeria kwao, ere narende okogoro kwao tikobaisa kobwatwa ase oboreba.
27Tobaisa korina abaremerwa amaya aya bagwenerete konyora, onye ayio are ase okobua kwao kobak onya. 28Ekero obwate egento ase engaki eyio kware koa omonto omino, tobaisa komotebia, “Genda ochiche ankio, nario ndagekoe.” 29Tobaisa gokora emeroberio gokorera omonto omino bobe; oyio omenyete amo naye, ogosemeretie ng’a anyore oborendi obuya. 30Tobaisa koamererania na monto onde engencho ende etaiyo, onye taragokorera bobe bonde. 31Tobaisa koba ne ribero ase omonto otari gokora ay’oboronge, gose tobaisa kwega chinchera chiaye, 32ekiagera abanto abasareku nigo bare okogechia ase Omonene, korende obobisi bwaye nigo bore ase abwo bare ne chinkoro chindonge. 33Okoragereria kw’Omonene nigo kore ase chinyomba chi’abakori amabe, korende nigo agosesenia chinka chi’abanyene oboronge. 34Omonene nigo agochecheria abwo bagochecheria, korende abaitongo nigo akobaa obuya na amabera. 35Abanto abang’aini mbanyore omwando bw’obonene, korende abariri mbabogorie obosooku.
Currently Selected:
EMERENG’ANIO 3: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
