EMERENG’ANIO 2
2
Eng’eria y’obong’aini
1Omwana one, ancha amang’ana aane, ogache amachiko aane ase enkoro yao, 2erinde oigwe obong’aini, naende orue enkoro yao ebe nokomanya. 3Obe gokorangeria korigia chisemi, naende osorore onyore okomanya. 4Origie obong’aini buna okorigia chifeta, obogira‐girie buna okoriga‐rigia chinibo chibisire. 5Oise gokora bo, rirorio nomanye komoiroka Omonene, naende nigo oranyare komomanya Nyasae. 6Omonene nere okoa abanto obong’aini; chisemi na okomanya nigo bikorwa ase omonwa oye. 7Abare ne chinkoro chindonge Omonene nigo abagacherete obong’aini oboikeranu. Ere nigo are enguba ase abanto abwo bagotaara ase oboronge. 8Nigo arendete chinchera chi’abagokora ekeene, naende orenda chinchera chi’abamoirogete.
9Koranyigwere, rirorio nomanye ayare boronge na ekeene, na ayagwenerete: ee, nomanye chinchera chionsi chire chingiya, 10na obong’aini mbosoe ase nekoro yao, ne chisemi nigo chiragokie omoyo oo. 11Emeroberio y’ebirengererio ebiya nekorende, na okomanya okuya ngokorende boigo. 12Obong’aini mbokorusie korwa ase chinchera chi’obobe na korwa ase abanto bagokwana amang’ana ’obosiru. 13Abanto abwo nigo bagotiga chinchera chi’oboronge, babwatia chinchera chi’omosunte. 14Nigo bakogokera ase ogokora amabe, naende bagokera chingencho chionsi chi’obobe. 15Chinchera chiabo nigo chire chinkorekanu, nigo bagotaara ase chinchera chire borogochi.
16Obong’aini obwo mbogotoorie korwa ase omokungu onde bwensi omotayayi, oyio ogokwana amang’ana okweansia korwa ase omonwa oye, 17oyio otigire omwanchi bw’oboke bwaye, naende bwebire okobwatana kw’ogotianania kwa Nyasae oye. 18Ere amo nab’enyomba yaye nigo bagotirimboka gochia ase amakweri, ne chinchera chiaye nigo chikobaraa gochia aase abakure. 19Monto onde bwensi ogochiera omokungu oyio tari koirana naende, takoiranera chinchera chi’obogima. 20Ase ayio, obwatie enchera y’abanto abaya, na otaare ase oboeto bw’abanyaboronge. 21Ekiagera abare ne chinkoro chindonge mbamenye ase ense, na abaikeranu mbagenderere komenya aroro. 22Korende abakori amabe mbaitwe barue ase ense, na abasaria mbasirigwe kegima.
Currently Selected:
EMERENG’ANIO 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
