EMERENG’ANIO 4
4
Ayakonyorekana korwa ase obong’aini
1Inwe abana baane, igwa amorokererio aane inche iso; tegerera mono, erinde monyare koba nokomanya. 2Inche nigo nkobaa amorokererio amaya; timotiga aya nabachikeire. 3Nigo narenge omwana, narenge na tata; nigo narenge omwororo nanchire na baba, ekiagera nigo narenge omomoima. 4Tata akanyorokereria, agantebia, “Tiga amang’ana aane abeere ase enkoro yao ime; orende amachiko aane, erio nario orabe moyo.” 5Enyorere obong’aini na okomanya, tobaisa kobieba! Tibwanga koigwera amang’ana ngokwana korwa ase omonwa one. 6Tobaisa gotiga obong’aini, ekiagera borobwo mbokorende. Obwanche, na borobwo mbogere ogenderere koba buya. 7Obong’aini nigo bore obw’engencho enene. Ase ayio, enyorere obong’aini, na kende gionsi okorigia, rigia obe nokomanya. 8Obobare koba nengencho enene, naborobwo mbogokinie; koraboboanie nigo borakorentere ogosikwa. 9Mbobeke ase omotwe oo ekiore gechabeire, naende bokoe egutwa y’obonene.
10Aye omwana one, igwa amang’ana aane, oyaanche, igo nario emiaka y’obogima bwao erabe emenge. 11Inche nakworokereirie enchera y’obong’aini; nakoraaire ase oboeto bore oboronge. 12Ekero orabe kogotaara, togotererigwa, na ekero orabe gokominyoka, tokogochwa. 13Bwata amorokererio bokong’u, toyatiga arue asore; yarende, ekiagera naro obogima bwao. 14Tobaisa kobwatia enchera y’abakori amabe, gose tobwatia chinchera chi’abanto ababe. 15Bweatanane korwa ase enchera eyio, toyebwatia, korende ogobere oetere ensemo, ogende bosio. 16Abanto abwo tibari korara goika barore ng’a bakorire amabe. Onye tibarakorera omonto amabe, tibari korara chitoro. 17Endagera yabo bakoria nogokora amabe, na edivai yabo bakonywa nobotindi.
18Korende enchera y’abanyene oboronge nigo enga buna amasase a mambia; ayio akogenderera koraba goetania goika bwakia se. 19Enchera y’abakori amabe nigo enga buna omosunte ekerima; tibari komanya ebinto bikobagocha.
20Omwana one, tegerera oigwe amang’ana aane! Igwera amang’ana nkogotebia. 21Amang’ana ayio tabaisa korua ase amaiso ao. Yagache ime ase enkoro yao. 22Ayio nigo are obogima ase oyio oyanyorire, naende nigo akogwenia omobere oye bwonsi. 23Renda enkoro yao kobua ande onsi orendete, ekiagera nao chinsoko chi’obogima chikorua. 24Tuguta chinkwana chi’obokorekanu korwa ase omonwa oo, na amang’ana ’obong’ainereria korwa ase ebikoba biao. 25Tiga amaiso ao arigererie gochia bosio, na ebioge bi’amaiso ao biramokigwe boronge. 26Rongeyia oboeto bw’amagoro ao, ne chinchera chiao chionsi chibe chindonge. 27Togobera gochia aande, ensemo y’okorio gose ey’okobee. Rusia okogoro kwao korwa ase ebibe.
Currently Selected:
EMERENG’ANIO 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
