OMOBARO 13
13
Abanto chirooti ikomi na babere
(Okoir 1:19–33)
1Omonene agakwana na Musa, akamotebia, 2“Chora omotang’ani oyomo korwa ase kera egesaku ase ebisaku bionsi ikomi na bibere bi’Abaisraeli, erio obatome bagende koroota ense ya Kanani, ense eria ngochia koa Abaisraeli.” 3Musa agatoma abanto korwa ase erooro ya Parani, buna Omonene amochigete. Abanto abwo bonsi nigo barenge abatang’ani ase Abaisraeli.
4Aya naro amarieta abo:
Korwa ase egesaku kia Reuben, Samua, mosinto o Sakuri;
5korwa ase egesaku gia Simeoni, Safati, mosinto o Hora;
6korwa ase egesaku kia Yuda, Kalebu, mosinto o Yefune;
7korwa ase egesaku gia Isakaru, Igali, mosinto o Yusufu;
8korwa ase egesaku gi’Efraimu, Hosea, mosinto o Nuni;
9korwa ase egesaku kia Benjamin, Paliti, mosinto o Rafu;
10korwa ase egesaku gia Sabuloni, Gadieli, mosinto o Sodi;
11korwa ase egesaku kia Yusufu (nakio ekia Manase), Gadi, mosinto o Susi;
12korwa ase egesaku kia Dani, Amieli, mosinto o Gemali;
13korwa ase egesaku gi’Aseri, Seturi, mosinto o Mikaeli;
14korwa ase egesaku kia Nafutali, Nabi, mosinto o Bofasi;
15korwa ase egesaku kia Gadi, Geueli, mosinto o Maki.
16Aya naro amarieta ’abanto baria Musa atomete gochia koroota ense eria. Musa akaroka Hosea, mosinto o Nuni, Yoshua.
17Ekero Musa are kobatoma gochia koroota ense ya Kanani, akabatebia, “Genda motiire gochia Negebu, ensemo ya irianyi y’ense eria, naende motiire gochia igoro ase ense y’ebitunwa. 18Morigererie buna ense eria ere, naende morore gose abanto bareo mbare ne chinguru, gose naboro bare, gose nabake, gose nabange. 19Naende morore gose ense eria abanto bamenyete nengiya gose nembe, naende morore emechie yabo ase bamenyete, onye nigo ere ebitwori gose nigo egiteire chindwaki. 20Morigererie gose riroba ndire nobotobu gose neritaka, naende gose emete nereo, gose teiyo. Mobe abaremu, morentane okwama kw’amatunda gw’ense eria.” (Engaki eria nigo yarenge ekero emesabibu konya yamire ase ogotongorwa.)
21Ase ayio bakagenda bakaroota ense eria, bagachakera korwa ase erooro ya Sini bagaika Rehobu ase enchera ekogenda Hamati. 22Bagatiira, bakagenda ritang’ani ase ensemo ya irianyi y’ense eria, na bagaika Heburoni, agwo ase Ahimani, na Sesai, na Talimai, abanto b’ororeria rw’Anaki, bamenyete. (Heburoni konya oagachirwe emiaka etano na ebere ritang’ani omochie o Soani o Misiri otaraagachwa.) 23Bagaika ase rikura ri’Esikoli, na aroro bakabutora orosagia rw’emesabibu rwabwate egesago ekenene mono, bagasomeka omwaro ase orosagia roria, na abanto babere bakarwambana. Naende bagatwa amakomomanga na amako. 24Aase aria akarokwa Rikura ri’Esikoli ase engencho y’orosagia roria Abaisraeli babutorete korwa aroro.
25Ekero amatuko emerongo ene aerire, abanto baria chirooti bakairana korwa ase okoroota ense eria. 26Bakairana gochia ase Musa na Haroni, na ase omoganda bwonsi bw’Abaisraeli agwo Kadeshi ase erooro ya Parani, bakabatebia amang’ana onsi, na bakaborokia okwama gw’ense eria. 27Barabwo bagatebia Musa, “Ntwagenda ase ense eria gwatotomete, ntwayenyora ng’a nentenenku ere namabeere na amooke, rora okwama gw’ense eria. 28Korende nonya naboigo, abanto bamenyeteo nigo bare ne chinguru, na emechie yabo nemenene mono, naende egitire buya ne chindwaki. Tari ayio oka, korende boigo ntwarora abanto b’ororeria rw’Anaki bare aroro. 29Abaameleki nigo bamenyete ase ense ya Negebu, ensemo ya irianyi y’ense eria; Abahiti, na Abayebusi, na Abaamori, nigo bamenyete ase ense y’ebitunwa. Abakanani barabwo nigo bamenyete ase enyancha enene mbarabare, naende ang’e norooche rwa Yorodan.”
30Korende Kalebu agakiria abanto tibabaisa koamereria Musa, agateba, “Tiga togende bwango, erinde toire ense eria, ekiagera intwe ntonyare kobua ense eria.”
31Abanto baria bagendete amo nere bagateba, “Intwe titokonyara korwania abanto baria tobabue; nigo bare ne chinguru gotobua.” 32Ase ayio bakarentera Abaisraeli amang’ana amabe igoro y’ense eria bagendete koroota, bagateba, “Ense eria twataara ime yaye koyeroota, nigo ere ense egoita abanto bamenyeteo. Abanto bonsi twarora nabatambe mono. 33Ee, ntwarora amamonto, abanto b’ororeria rw’Anaki. Intwe nigo twerora ng’a nabasinini mono, tore buna ebisase. Naboigo twarorekana asebare.”
Currently Selected:
OMOBARO 13: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
