OMOBARO 14
14
Abanto bakaba bakwomania Musa na Haroni
1Erio omoganda bwonsi bw’abanto bagaaka eriogi rinene, bakaba bakorera ase obotuko boria. 2Abaisraeli bonsi bakaba bakwomania Musa na Haroni; bonsi bagakwana “Nigo anga yaba buya onye ntwakwerete Misiri, gose ase erooro eye. 3Ninki kiagera Omonene agotoira ase ense eria tochie goitwa ase esegi? Abakungu baito, na abana baito, nigo bagochia gwoswa nababisa baito. Nigo yare koba buya toirane Misiri.” 4Barabwo bagatebania, “Tochore omonto oyomo abe omoraai oito, toirane Misiri.”
5Musa na Haroni bagatung’ama inse bakaumama ase amasio ’omoganda bwonsi bw’Abaisraeli osangererekanete. 6Erio Yoshua, mosinto o Nuni, na Kalebu, mosinto o Yefune, baria barenge abamo be chirooti chiria chiarootete ense eria, bagatandora chianga chiabo, 7bagatebia omoganda bwonsi bw’Abaisraeli, “Ense eria twataarete ase okoyeroota nigo ere ense engiya mono. 8Onye Omonene okogokigwa naintwe, natoire aroro na gotoa ense eria entenenku ere namabeere na amooke. 9Timobaisa kwanga koigwera Omonene, na timobaisa kwoboa ababiare b’ense eria; abwo nigo barabe asetore buna endagera. Baurirwe okorendwa kwabo; Omonene nigo are amo naintwe; timobairoka.” 10Korende omoganda bwonsi ogaaka eriogi, ogateba ng’a baitwe namagena. Erio obonene bw’Omonene bokaoroka mobosokano agwo ase Eema y’Omosangererekano ase Abaisraeli bonsi.
Musa ogosabera abanto
11Omonene agatebia Musa, “Ngoika ririri abanto aba barabe bagonchaya? Na ngoika ririri barabe batari konyegena, nonya nakorire ebikone ebinge ase egati yabo? 12Nkobaaka inde noborwaire bogoita erinde imbasirie, na aye ngokore obe egesaku ekenene, naende kere nokobua goetania abanto aba.”
13Korende Musa akamoiraneria, “Aye nigo kwarusetie abanto aba korwa ase ense ya Misiri ne chinguru chinene. Ekero Abamisiri bonsi baraigwe aya gwakorire ase abanto aba, 14barabwo mbatebie abanto b’ense eye amang’ana ayio. Barabwo konya baigure ng’a aye Omonene nigo ore ase egati y’Abaisraeli, kwarorekanire asebare obosio ase obosio, ne riire riao nigo riteneine asebare, naende naye okobatang’ana, omobaso ase riire rire buna esiiro, na obotuko ase omorero ore buna esiiro. 15Bono onye aye kogoita abanto aba bonsi amo, erio abanto b’ebisaku abaraigwe chinkuma chiao mbatebe: 16Omonene nigo asinyetwe koira abanto aba ase ense eria konya arire eira akobaa; ase ayio obaiteire ase erooro. 17Bono nagosabire, tiga okobua kwao, aye Omonene, kobe okonene buna aye kwarire eira, kogokwana: 18Inche Omonene tindi omwango bw’okoba nendamwamu, nigo inde omonyene amabera, naende nigo inde nobwanchani botari koera. Nigo nkwabera amamocho na ogosaria, korende tingotiga koa abana egesusuro goika ekiaare kia gatato, na egia kane, ase engencho y’amabe ’abaibori babo. 19Ase ayio nagosabire, bwabere ebibe bi’abanto aba koreng’ana nobonene bw’obwanchani bwao botari koera, koreng’ana buna aye kwabaaberete korwa ekero barenge Misiri goika rero iga.”
20Erio Omonene agateba, “Nabaabeire koreng’ana buna gwansabire. 21Korende ekeene, buna inche inde moyo, naende buna ense yonsi eraichorwe nobonene bwane, 22onde tari ase abanto aba orasoe ense eria. Aba barorire obonene bwane na ebikone biria nakorete aaria Misiri, na ase erooro eye, korende nonya naboigo babeire bagonteema ase chingaki echi chionsi, nonya ng’ara ikomi, bangire konyigwera. 23Ase barabwo onde tari nonya noyomo, oranyare korora ense eria narierete chisokoro chiabo eira ng’a nimbayee. Onde tari ase abwo banchayete oranyare koyerora. 24Korende Kalebu, omosomba one, ekiagera abwate omoika ore nogwatananekana korwa ase oyo bwa baria bande, naende obeire okonyigwera buya ase amang’ana onsi, nimoire ase ense eria agendete koroota naende ning’ee abanto b’ororeria rwaye ense eria ebe eyabo. 25Na bono ekiagera Abaameleki na Abakanani bamenyete ime ase amakura, inwe ankio moonchoke, mochake koirana gochia ase enchera ekogenda ase omosomo bw’Enyancha Embariri.”
Omonene akaa abanto abwo bamwemurunganeretie ebisusuro
26Omonene agakwana na Musa na Haroni, akabatebia, 27“Inee! Ngoika ririri omoganda oyo omobe oremurunganie asende? Naigure Abaisraeli banyemurunganeirie. 28Obatebie ng’a inche Omonene nigo ngoteba iga: Buna inche inde moyo, naigure amang’ana ayio mwakwanire, ayio naro ndabakorere. 29Ekiagera mwemurunganirie asende, inwe mwensi abamwabarirwe na korikwa, abamwakoorire emiaka emerongo ebere na goetania, nigo morakwe, na emebere yaino ekwete ebeere aiga ase erooro. 30Ase ense eria nabarierete eira na gotiana ng’a nimbayee, onde tari asemore orachie komenyao, otatiga Kalebu, mosinto o Yefune, na Yoshua, mosinto o Nuni. 31Korende abana baino, abwo mwatebete ng’a nabooswe, aba nabwo ndaire aroro, na barabwo mbamenye ase ense eria inwe mwangire. 32Korende inwe nigo morakwere aiga ase erooro, na emebere yaino esirere aiga. 33Abana baino nababe abarisia ase erooro eye ase engaki y’emiaka emerongo ene, nabarabwo nabachandeke, ekiagera inwe motabete abegenwa asende, mbabe bagochandeka goika omonto bw’omoerio bw’ekegori kiaino akwe, na omobere oye osirere ase erooro eye. 34Inwe nigo morachandeke ase emiaka emerongo ene, omwaka oyomo ase kera rituko mwarenge koroota ense eria, nainwe namonyare komanya ng’a inki gekoba ekero nkoba mamincha yaino. 35Ninche Omonene nakwanire. Ekeene ninkore egento eke ase omoganda oyo omobe osangererekanire amo, na obeire mamincha yane. Aiga ase erooro ninsirie abanto aba, aa ase erooro nao barakwere.”
36Abanto baria Musa atomete gochia koroota ense eria barentete amang’ana amabe igoro y’ense eria, bakagera omoganda bwonsi okemurungania ase Omonene. 37Ase ayio Omonene akabaaka noborwaire bogoita, na barabwo bagakwera agwo ase obosio bwaye. 38Korende Yoshua, mosinto o Nuni, na Kalebu, mosinto o Yefune, barabwo boka bagatigwa bare moyo korwa ase abanto baria bagendete koroota ense eria.
Abaisraeli bagoteema gosoa Kanani engaki entang’ani
(Okoir 1:41–46)
39Musa agatebia Abaisraeli amang’ana onsi Omonene akwanete, na abanto bakarera mono nobororo. 40Ase emambia ye rituko ria kabere bakaimoka, bagatiira gochia ase ense y’ebitunwa, bagakwana, “Rora twachire, nao tore aa, bono twanchire kogenda ase ense eria Omonene atotebetie. Intwe twakorire ebibe.”
41Korende Musa akabatebia, “Nase ki bono mogosaria ogochika kw’Omonene. Timokonyara konyora ogosesenigwa ase okogendao. 42Timobaisa kogenda; moise gokora igo, rirorio nigo mogochia goitwa nababisa baino, ekiagera Omonene tari amo nainwe. 43Aroro agwo bosio bwaino Abaameleki na Abakanani mbareo. Nigo bagochia kobarwania bababue na kobaita nemioro, ekiagera inwe mwaonchokire, mwangire koigwera Omonene; nere takonyara koba amo nainwe.”
44Korende bagekora abaremu, bagatiira gochia ase ense y’ebitunwa, nonya Esanduku eria yare ne chibao chirikire okobwatana kw’Omonene yatigarete ase egetwori, na Musa nao atigarete. 45Erio Abaameleki na Abakanani abamenyete ase ense y’ebitunwa, bagatirimboka bakarwania Abaisraeli abwo, bakababua na kobaseria, bakababwatia goikera Horima.
Currently Selected:
OMOBARO 14: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
