OMOBARO 15
15
Amachiko igoro y’ebing’wanso
1Omonene agakwana na Musa, akamotebia, 2“Kwana n’Abaisraeli, obatebie buna barachie gokora ekero baraike ase ense eria ngochia kobaa. 3Batebie: Monyare korua ase Omonene eng’iti korwa ase chiombe, gose korwa ase riicho rie ching’ondi, gose chimbori, chibe ekeng’wanso kegosambwa nomorero, gose ekeng’wanso kende gionsi ase ogoikerania eira mwariete, gose eki’ogwancha kwaino, gose ase chingaki chichikire ase Amatuko aino Amanene, kebe ne rimisu rigiya rikomogwenera Omonene. 4Oyokorua ebing’wanso buna ebio ase Omonene, goika arue okoruegwa kw’endagera, obosie obonuke ebimunu bibere bwochoganirie namaguta egetuba ekemo, 5na edivai egetuba ekemo kebe okoruegwa gw’ekenyugwa, amo na kera emanwa y’eng’ondi; onye nekeng’wanso ki’ogosambwa gose ekeng’wanso kende gionsi. 6Ekero okorua emingichi ebe ekeng’wanso, orente amo nero obosie obonuke ebimunu bine, bwochoganirie namaguta egetuba ekemo na ekeng’ese, bibe okoruegwa kw’endagera. 7Ase okoruegwa gw’ekenyugwa morue edivai egetuba ekemo na ekeng’ese ebe rimisu rigiya rikomogwenera Omonene. 8Ekero okorua eeri ensae ebe ekeng’wanso ki’ogosambwa, gose ekeng’wanso kende gionsi, onye nase ogoikerania eira kwariete, gose ekeng’wanso ki’omorembe ase Omonene, 9orue amo neeri eria obosie obonuke ebimunu bitano na ekemo, bwochoganirie namaguta ebituba bibere, 10na orue edivai ebituba bibere ebe okoruegwa gw’ekenyugwa. Okwo nokoruegwa kogosambwa nomorero kore ne rimisu rigiya rikomogwenera Omonene.
11“Ebinto ebi nabio biraruegwe amo na kera eeri, gose emingichi, gose kera emanwa y’eng’ondi gose ey’embori. 12Buna koreng’ana omobaro bwe ching’iti echio chiraruegwe chibe ebing’wanso orabe, nokoruegwa kw’endagera naboigo korabe. 13Abaisraeli bonsi ababiare nabwo barabwatie omoroberio oyio, ekero bakorua okoruegwa kw’endagera kogosambwa nomorero, kobe risimu rigiya rikomogwenera Omonene. 14Onye omogeni ore amo nainwe, gose omomenyi omenyete ase egati yaino, nere oganetie korenta okoruegwa kwaye kogosambwa nomorero, kobe rimisu rigiya rikomogwenera Omonene, nigo arabwatie omoroberio oria oria obekirwe asemore. 15Ase omosangererekano oyio ogochika nokomo korabe asemore na ase omomenyi omenyete ase egati yaino. Okwo nakobe ogochika koragenderere botambe, ebiaare ase ebiaare. Buna inwe more, naboigo omomenyi omenyete ase egati yaino arabe ase obosio bw’Omonene. 16Ogochika nokomo, na omoroberio noyomo, asemore na ase omomenyi omenyete amo nainwe.”
17Omonene agakwana na Musa, akamotebia, 18“Kwana n’Abaisraeli, obatebie: Ekero moraike ase ense eria ase ngochia kobaira, 19na mokoria endagera y’ense eria, morente okoruegwa kogosungusigwa ase Omonene. 20Ekero moraroisie omogati korwa ase obosie bw’ogotongora kw’endagera, namoyorente ase Omonene obe okoruegwa kw’ogotongora buna mokomoruera endagera korwa ase ekeooreri kiaino. 21Ase ebiaare biaino bionsi morentere Omonene okoruegwa korwa ase obosie bw’ogotongora kwaino.
22“Korende nenyare koba ng’a mwamochire kobwatia amachiko ande onsi Omonene achikire Musa, 23gose abanto baino tibarakora onsi aya Omonene achikire goetera ase Musa, gochakera rituko riria Omonene aruete amachiko, na kogenderera ebiaare ase ebiaare. 24Onye okomocha okwo gwakorirwe ase ogotancha, na ase ogotamanya kw’omoganda bwonsi bw’abanto, rirorio barue eeri ensae ebe ekeng’wanso ki’ogosambwa kere ne rimisu rigiya rikomogwenera Omonene. Amo nekio barente okoruegwa kw’endagera, na ogw’ekenyugwa, koreng’ana nomoroberio ochikire, amo negoree eyemo ebe ekeng’wanso ki’ebibe. 25Omokuani akore okobwatanigwa ase omoganda bwonsi bw’Abaisraeli, na barabwo mbaaberwe, ekiagera okomocha okwo nigo gwakoretwe mosiabano ase ogotancha. Barabwo barentire okoruegwa kwabo, ekeng’wanso kegosambwa nomorero ase Omonene, naboigo barentire ekeng’wanso kiabo ki’ebibe ase Omonene ase engencho y’okomocha kwabo gwakoretwe mosiabano ase ogotancha. 26Naboigo omoganda bwonsi bw’Abaisraeli amo nomomenyi omenyete ase egati yabo, bonsi nabaaberwe, ekiagera abwo bonsi nigo babareretwe okomocha koria gwakoretwe mosiabano ase ogotancha.
27“Onye omonto oyomo ogokora ebibe mosiabano atancheti, arue emanwa esubeni yakoorire omwaka oyomo, ebe ekeng’wanso ki’ebibe. 28Omokuani akore okobwatanigwa ase obosio bw’Omonene ase omonto oria okorire ebibe atancheti, na omonto oria naaberwe. 29Nigo morabe nogochika okomo ase oyio okorire ebibe mosiabano, atancheti, karabe omobiare bw’Abaisraeli, gose omomenyi omenyete ase egati yaino.
30“Korende omonto orakore gento kende gionsi moeneno, karabe omobiare bw’Abaisraeli, gose omomenyi omenyete ase egati yaino, oyio igo oramire Omonene, ere oyio naatananwe korwa ase abanto baye. 31Oyio ochayire ring’ana ri’Omonene, naende osaririe ogochika kwaye, takororerwa amabera. Goika aatananwe kegima, nere abarerwe ebibe biaye.”
Omonto ogosaria Esabato
32Ekero Abaisraeli bagendererete koba ase erooro, omonto oyomo akanyorwa ogotenya chinko ase rituko ri’Esabato. 33Abanto baria bamonyorete bakamoira ase Musa na Haroni, na ase omoganda bwonsi. 34Omonto oria agasiekerwa aase gete akarendwa, ekiagera konya teramanyekana boronge egento agwenerete akorerwe. 35Erio Omonene agatebia Musa, “Omonto oyio goika aitwe akwe: asokigwe isiko y’egetwori, erio omoganda bwonsi omoake amagena.” 36Abanto bonsi b’omoganda bakamosokia isiko y’egetwori, bakamoaka amagena goika agakwa, buna Omonene achigete Musa.
Amachiko igoro y’amasugunia
37Omonene agakwana na Musa, akamotebia, 38“Kwana n’Abaisraeli, obachike ng’a bakore amasugunia ase emego ye chianga chiabo, babeke ase kera obosugunia eusi ere buru. Naboigo barakore ebiaare ase ebiaare. 39Ekiagera amasugunia ayio abe ekeinyorio asemore. Ekero mokoyarigereria monyare koinyora amachiko aane onsi na koyabwata. Naboigo moranyare gokonywa, erinde mobe abegenwa asende na gwetanga korwa ase okogania okobe gwe chinkoro chiaino na amaiso aino. 40Ase igo moinyore na kobwata amachiko aane onsi, nainwe namobe abachenu asende inche Nyasae oino. 41Ninche Omonene, Nyasae oino, nabarusetie korwa ase ense ya Misiri, erinde imbe Nyasae oino. Inche ninche Omonene, Nyasae oino.”
Currently Selected:
OMOBARO 15: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
