OMOBARO 12
12
Miriamu okonyora egesusuro
1Miriamu na Haroni bagakwana amang’ana arenge mamincha ya Musa, ekiagera Musa konya onyuomire omokungu korwa ase Abaetiopia. 2Bagakwana, bagateba, “Inee! Omonene nigo agokwana na Musa bweka? Tari gokwana naintwe?” Omonene akaigwa amang’ana ayio. 3Omonto oyio Musa nigo arenge omoitongo mono kobua abanto bonsi barenge ase ense.
4Erio agwo Omonene agakwana na Musa, na Haroni, na Miriamu, akabatebia, “Nimbaganetie inwe batato mochiche agwo ase Eema y’Omosangererekano.” Abwo batato bakagenda aroro. 5Omonene agaika korwa igoro ore ime ase riire riria riare buna esiiro, agatenena agwo ase egesoero ki’Eema eria, akarangeria Haroni na Miriamu. Barabwo bagasuka gochia bosio, 6na Omonene akabatebia, “Igwa amang’ana aane: Onye omobani ore ase egati yaino, inche Omonene nigo nkwemanyekania asare ase okorora, naende nakwana nere ase chindoto. 7Korende ase Musa, omosomba one, taibo, ere nomwegenwa ase enyomba yane yonsi. 8Nigo ngokwana nere obosio ase obosio, gose tindi gokwana nere ase emerabaaro; ere ororire ekieni kiane. Nase ki inwe motabete nobwoba gokwana mamincha ya Musa, omosomba one?”
9Endamwamu y’Omonene ekaba enene asebare, akarua aroro agwo, akagenda. 10Ekero riire riria riaruete ase Eema eria, omobere o Miriamu konya obeire noborwaire bwa ukoma, okaraba se. Haroni akaonchoka komorigereria, akarora ng’a omobere oye obeire noborwaire bwa ukoma. 11Erio Haroni agatebia Musa, “Aye omonene one, koranche, tobaisa gotoa egesusuro, ekiagera intwe nigo twakorire egento ki’oboriri, na twakorire ebibe. 12Totiga Miriamu abe buna oyokure, buna omonto oiboretwe ne chinyama ekeng’ese, chianiarokeire inda, chiaerire.”
13Musa akarera ase Omonene, “Aye Nyasae, nagosoroire, koranche ogwenie Miriamu!”
14Korende Omonene akairaneria Musa, “Onye rende ise arenge komotwera amate ase obosio bwaye, Inee, tagwenerete anyore obosooku ase engaki y’amatuko atano na abere? Tiga aatananwe korwa ase egetwori abekwe aase aao ase engaki y’amatuko atano na abere, na nyuma y’ayio airanigwe ase egetwori.” 15Ase ayio Miriamu agasokigwa isiko y’egetwori, akabekwa aase aao ase engaki y’amatuko atano na abere, na abanto tibaimogete kogenda goika ekero Miriamu airanete ase egetwori. 16Nyuma y’ayio abanto bakaimoka kogenda korwa ase Haseroti, bagaika ase erooro ya Parani, bagatoora aroro.
Currently Selected:
OMOBARO 12: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
