OMOBARO 11
11
Aase akorokwa Tabera
1Abanto bakereera ase engencho y’emechando yabo. Ekero Omonene aigwete okwereera kwabo akaba nendamwamu enene, agatoma omorero ogoka ase egati y’abanto, na omorero oria ogasamba abanto barenge ase chinsinyo chi’ebitwori. 2Abanto bakarera ase Musa ng’a bakonywe, nere agasaba Omonene, na omorero oria okarimigwa. 3Aase aria akarokwa Tabera,#11:3 Tabera, engencho yaye: omorero ogwoka ekiagera omorero bw’Omonene bwogete ase egati y’abanto.
Musa ogochora abatang’ani emerongo etano na ebere
4Abanto baria basang’anaine n’Abaisraeli nigo barenge nobotoonu obonene bw’okogania chinyama, na Abaisraeli boigo bakarera bagateba, “Naki totanyora chinyama torie? 5Twainyoire chinswe twarenge koria ase ense ya Misiri totare goakanera, na endagera ende enga buna emiongo emerandi, na emenyobio, na ebitunguo biare ao ao, ebiororo amo nebiroro. 6Na bono chinguru chiaito chiatoereire, titobwati endagera ende tokoria otatiga mana yoka.”
7Mana nigo yarenge kororekana buna chinyeke chi’amaemba enkomba. 8Abanto nigo barenge gosoka bayesangereria, naende bayesia ne chingena, gose bayeswaga ase chikonu. Erio baba bakoyeiyekera ase chinyongo na koyeroisia yaba emegati. Igo yarenge gwansa buna amaandasi aroiseirie amaguta. 9Mana eyio nigo yarenge kogwa amo ne riime ase ebitwori ekero kia botuko.
10Musa akaigwa abanto bakwereera ase chiamate chiabo, kera omonto ase egesoero ki’eema yaye. Omonene akaba nendamwamu enene asebare; ase ayio Musa akagechigwa. 11Ere akamotebia Omonene, “Nase ki gwankoreire inche, omosomba oo, obobe obo iga? Naende ntanyoreti ogwancherwa asore. Nase ki kwang’eire emeremo emenene ase okoraa abanto aba? 12Inee! Ninche naiborete abanto aba bonsi? Gose ninche nabatongete? Naki rende ogontebia ng’a mbabogorie na kobarera ase egekuba kiane, buna omoreri akobogoria omwana ekeng’werere okogonka, goika imbaikie ase ense eria kwarierete chisokoro chiabo eira ng’a nobayee?” 13Ng’ai nkorusia chinyama nkoa abanto aba bonsi? Barabwo nigo bakorera asende bagoteba: Toe chinyama torie! 14Inche bweka tinkonyara koraa abanto aba, egurube eye nendito mono asende. 15Onye aye kogonkorera amang’ana buna ayio, indorera amabera, ong’ite rimo rioka inkwe ase obosio bwao, erinde timbaisa korora obokong’u obo.
16Omonene akamoiraneria, “Sangereria abagaaka b’Abaisraeli emerongo etano na ebere, abwo basikire, bamanyekanete bare abatang’ani b’abanto, obarente agwo ase Eema y’Omosangererekano, batenene aroro amo naye. 17Inche ning’ike korwa igoro, nkwane naye aroro agwo. Naende ning’ee barabwo korwa ase omoika oria ore ime asore. Erio barabwo bakore emeremo amo naye, erinde tobaisa kobogoria obokong’u bw’okoraa abanto aba aye bweka. 18Kwana nabanto, obatebie: Echene inwe abanyene ase engencho y’ankio; namonyore chinyama mokoria. Omonene oigure okwereera kwaino na buna mwaboria: Ning’o ogotoa chinyama torie? Ekero twarenge ase ense ya Misiri, nigo twarenge buya. Ase ayio Omonene nache abae chinyama morie. 19Timogochiria ase rituko erimo rioka, gose ase amatuko abere, gose atano, gose ikomi, gose emerongo ebere, 20korende namorie chinyama ase omotienyi omogima goika mochiroke chietere ase chimioro na kobagara‐garia moyo. Ayio nigo arakoreke, ekiagera mwangire Omonene oria omenyete ase egati yaino, mwarerire ase obosio bwaye na gokwana: Ninki kiagerete tokarua Misiri?”
21Musa agatebia Omonene, “Abanto aba nkoraa, nigo bare abarwani chilifu amagana atano na rimo bagotaara namagoro, naye bono gwatebire ng’a nobae chinyama barie ase omotienyi omogima. 22Inee! Ntonyare konyenya ching’ondi gose chiombe chiisaine abanto aba baegwe barie baigote? Gose ne chinswe chionsi chia nyancha chirasangererigwe, erinde chibaisane?”
23Omonene agatebia Musa, “Inee! Nigo oroche ng’a okoboko kwane nokweng’e? Bono norore gose amang’ana aane naikeranigwe asore, gose yaya.”
24Ase ayio Musa akagenda, agatebia abanto amang’ana onsi Omonene akwanete. Agasangereria abagaaka emerongo etano na ebere, nabwo bagatenena agwo goetanana Eema y’Omosangererekano. 25Erio Omonene agaika korwa igoro ore riire ime, agakwana na Musa, na akaa abagaaka baria emerongo etano na ebere korwa ase omoika oria oria orenge ime ase Musa. Ekero omoika oria obete igoro asebare barabwo bakabana, korende tibagenderera gokora igo naende nonya ndinde.
26Bono abanto babere, Elidadi na Medadi, barabwo bagatigara ase egetwori, na omoika ogacha igoro asebare. Igo barenge abamo b’abwo bachoretwe, korende tibagenda agwo ase Eema, na barabwo bakabanera agwo ase egetwori. 27Omonto oyomo omosae akaminyoka ase Musa, akamotebia, “Elidadi na Medadi nkobana bare ase egetwori.”
28Yoshua, mosinto o Nuni, nigo arenge omokoreri o Musa korwa ekero arenge omosae. Ere agakwana na Musa, akamotebia, “Omonene one, bakanie.”
29Musa akamoboria, “Aye nigo ore ne ribero ase engencho yane? Ninganetie ng’a Omonene ae abanto bonsi omoika oye, erinde babe ababani.” 30Erio Musa na abagaaka b’Abaisraeli bakairana ase egetwori.
Omonene ogotoma chinkware
31Omonene akarenta omwaga, na omwaga oyio okarenta chinkware korwa ase enyancha, ogachiruta igoro y’ebitwori gochia ase oboare bw’orogendo rwe rituko erimo goetania ebitwori chigatorerekana, chikaba chinduenyi gocha igoro koreng’ana ekerengo ki’amaboko abere. 32Abanto bakaimoka, bagasangereria chinkware chiria ase rituko riria rigima, na obotuko bwonsi, naende rituko ria kabere. Oyosangereretie chinke nigo asangereretie chiaisaine goetania ebitonga rigana erimo. Bagachikora emetanda aande onsi ase ebitwori. 33Ekero abanto babekire chinyama menwa yabo, na konya batarachimera, Omonene akaba nendamwamu enene asebare, akabaita ase okobaaka namaakwa amanene mono. 34Aase aaria akarokwa Kibiroti‐Hatawa,#11:34 Kibiroti‐Hatawa, engencho yaye: chimbeera chi’abatoonu ekiagera aroro agwo nao abanto baria barenge abatoonu b’okogania chinyama batindegetwe.
35Abanto bakarua Kibiroti‐Hatawa, bakagenda bagaika Haseroti, bakabeera aroro.
Currently Selected:
OMOBARO 11: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
