OMOBARO 10
10
Ebirombeta bie chifeta
1Omonene agakwana na Musa, akamotebia, 2“Roisia ebirombeta bibere bie chifeta chiturire. Obe gokobibugia ekero ogosangereria omoganda amo, na ekero abanto barabe bakoimoka korwa ase ebitwori gochaka orogendo. 3Ekero ebirombeta bionsi bibere birabugigwe, abanto bonsi nabache na gosangererekana agwo ase egesoero ki’Eema y’Omosangererekano. 4Korende onye ekemo gioka gekobugigwa, abatangani abwo bare abateneneri b’ebisaku bi’Abaisraeli nabwo boka barachiche asore. 5Ekero morabugie ekerombeta ase eriogi ri’ogotabobora, abanto bare ase ebitwori bi’ensemo ya moocha baimoke bachake orogendo rwabo. 6Naende ekero morabugie ekerombeta ase eriogi ri’ogotabobora eria kabere, abanto bare ase ebitwori bi’ensemo ya irianyi baimoke bachake orogendo. Ekerombeta goika kebugigwe ase eriogi erio ase chingaki chionsi abanto barabe bakomanora gochaka orogendo. 7Korende ekero omosangererekano okorangerigwa gochicha amo, ebirombeta goika bibugigwe, go tari ase eriogi ri’ogotabobora. 8Abamura ba Haroni omokuani nabwo barabe bakobugia ebirombeta ebio.
“Oko nakwo korabe ogochika asemore kogenderera botambe, ebiaare ase ebiaare. 9Ekero morabe mokorwana esegi nababisa baino abwo barache kobarwania ase ense yaino, mobe mokobugia ebirombeta ase eriogi ri’ogotabobora, erinde monyare koinyorwa ase obosio bw’Omonene, Nyasae oino, na inwe namotoorigwe korwa ase ababisa baino. 10Ase amatuko aino ay’omogoko, na amatuko achikire abe Amatuko Amanene asemore, na ase omochakano bw’emetienyi namobe mokobugia ebirombeta igoro y’ebing’wanso biaino bi’ogosambwa, na ebi’omorembe, na ebirombeta ebio bigere mobe mokoinyorwa ase obosio bwa Nyasae oino. Inche ninche Omonene, Nyasae oino.”
Abaisraeli bakomanora korwa ase egetwori
11Ase rituko ri’emerongo ebere ri’omotienyi o kabere, ase omwaka o kabere, riire riria rikaimokerera igoro korwa ase Obomenyo bore noborori. 12Abaisraeli bakaimoka korwa ase erooro ya Sinai, bakagenda bakaba bakona‐gotoora egetwori ase egetwori, ne riire riria rigaika agwo ase erooro ya Parani, rikabeera aroro.
13Omonene agachika Musa, na Abaisraeli bagachaka orogendo rwabo ase ekero egetang’ani. 14Abanto b’egetwori kia Yuda, abatoorete inse y’ebendera yabo, bakaba abatang’ani b’okoimoka gochaka orogendo, ekeombe ase ekeombe, na Nahasoni, mosinto bw’Aminadabu, nere orenge omoraai bw’omoganda oria. 15Netaneli, mosinto o Suari, nere orenge omoraai bw’abanto b’egesaku gia Isakaru, 16na Eliabu, mosinto o Heloni, nere orenge omoraai bw’abanto b’egesaku gia Sabuloni.
17Ekero Obomenyo bwatagoretwe Abagerisoni na Abamerari, abarenge kobobogoria, bagachaka orogendo.
18Nyuma y’ayio abanto b’egetwori kia Reuben, abatoorete inse y’ebendera yabo, bakaimoka kogenda ekeombe ase ekeombe, na Elisuri, mosinto o Sedeuri, nere orenge omoraai bw’omoganda oria. 19Selumieli, mosinto o Surisadai, nere orenge omoraai bw’abanto b’egesaku gia Simeoni. 20Eliasafu, mosinto o Deueli, nere orenge omoraai bw’abanto b’egesaku kia Gadi.
21Erio Abakohati bakaimoka kogenda babogoretie ebinto ebichenu. Ekero konya bataraika ase egetwori bakanyora ng’a baria abande batenenirie Obomenyo boria Obochenu.
22Naende abanto b’egetwori gia Efuraimu, abatoorete inse y’ebendera yabo, bakaimoka kogenda, ekeombe ase ekeombe, na Elisama, mosinto bw’Amihudi, nere orenge omoraai bw’omoganda oria. 23Gamalieli, mosinto o Pedasuri, nere orenge omoraai bw’abanto b’egesaku kia Manase. 24Abidani, mosinto o Gidioni, nere orenge omoraai bw’abanto b’egesaku kia Benjamin.
25Omoerio abanto b’egetwori kia Dani, abatoorete inse y’ebendera yabo, bakaimoka kogenda, ekeombe ase ekeombe. Abwo nigo barenge abarendi ba nyuma ase ebitwori bionsi. Ahieseri, mosinto bw’Amisadai, nere orenge omoraai bw’omoganda oria. 26Pagieli, mosinto bw’Okirani, nere orenge omoraai bw’abanto b’egesaku gi’Aseri, 27na Ahira, mosinto bw’Enani, nere orenge omoraai bw’abanto b’egesaku kia Nafutali. 28Oyo noro orenge omoroberio bw’Abaisraeli ekero barenge kogenda orogendo rwabo, ekeombe ase ekeombe, ekero kende gionsi baare koimoka korwa ase egetwori.
29Musa agakwana na Hobabu, mosinto o Reueli Omomidiani, akamotebia, “Intwe nkogenda tore aase aaria ase Omonene atotebetie ng’a natoe. Inchuo ogende amo naintwe, na intwe natogokorere amaya, ekiagera Omonene orire eira ng’a nasesenie Abaisraeli.”
30Korende Hobabu akairaneria, “Tinkogenda amo nainwe; inche nigo nkoirana ngende ase ense yane, na ase abanto b’eamate yane.”
31Musa akamosorora, akamotebia, “Koranche tobaisa gototiga, ekiagera aye nomanyete buna togochia konagotoora ase erooro. Ase ayio nobe kogototang’ana. 32Naende koragende amo naintwe, amaya aria Omonene agochia gotokorera, ayio naro naintwe toragokorere.”
Abanto bakoimoka kogenda
33Abaisraeli bakaimoka korwa ase egetunwa keria ki’Omonene, bakagenda orogendo rw’amatuko atato. Esanduku y’okobwatana kw’Omonene yare ne chibao chirikire okobwatana ekabatang’ana ekabanyorera aase bagochia gotoora, 34ne riire riria ri’Omonene nigo riarenge igoro asebare ekero kia mobaso chingaki chinde chionsi barenge koimoka korwa ase ebitwori kogenda ase orogendo.
35Ekero kende gionsi Esanduku eria yarenge gochaka kobogorigwa gotang’ana orogendo, Musa nigo arenge kobora, “Omonene, imoka, ababisa bao tiga baserigwe na goserebanigwa, na baria bakogechete tiga batame korwa ase obosio bwao.” 36Na ekero Esanduku eria yarenge goikigwa aase bagotimokera, Musa nigo arenge goteba, “Aye Omonene, bairanere Abaisraeli aba bare chilifu ne chilifu.”
Currently Selected:
OMOBARO 10: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
