OMOBARO 9
9
Epasaka ase erooro
1Ase omwaka o kabere, omotienyi bwe ritang’ani, nyuma Abaisraeli kobarure ense ya Misiri, Omonene agakwana na Musa agwo ase erooro ya Sinai, akamotebia, 2“Abaisraeli goika barende rituko ri’Epasaka ase engaki echikire. 3Ase rituko ria ikomi na kane ri’omotienyi oyo, chinsa chia mogoroba, namorende rituko erio ase engaki echikire koreng’ana nemeroberio eria yachigetwe.” 4Ase igo Musa agatebia Abaisraeli ng’a barende rituko rinene ri’Epasaka. 5Na abanto bagakora bo, bakarenda rituko riria rinene ri’Epasaka agwo ase erooro ya Sinai, ase omotienyi bwe ritang’ani, ase rituko ria ikomi na kane, chinsa chia mogoroba. Abaisraeli bagakora amang’ana onsi buna Omonene achigete Musa.
6Korende mbarengeo abanto gete besoyirie ase ogotacheneka ase ogokuna omobere bw’omonto okwete. Barabwo tibanyarete korenda rituko ri’Epasaka ase rituko riria. Ase ayio bakagenda ase Musa na Haroni ase rituko riria, 7bakabatebia, “Intwe nigo twabeire abatachenegeti ase ogokuna egetondo. Inee! Ninki kiagera twatangirwe titorua okoruegwa ase Omonene ase engaki Abaisraeli bachikire komoruera okoruegwa kwabo?”
8Musa akabatebia, “Ganya, inyigwe aya Omonene arachike igoro asemore.”
9Omonene agatebia Musa, 10“Kwana n’Abaisraeli obatebie: Onye omonto onde oino, gose oyo bw’ororeria rwaino, obeire oyotachenegeti ase ogokuna egetondo, gose nigo are aare ase orogendo, na onye origetie korenda rituko ri’Epasaka y’Omonene, 11nigo ararirende ase omotienyi o kabere, rituko ria ikomi na kane, chinsa chia mogoroba. Narie emanwa y’eng’ondi y’Epasaka amo nemegati etabekiri memera, ne chinyeni chindoro. 12Tebaisa gotigaria nonya nensinini ye chinyama echio goika rituko ria kabere, gose tabuna riuga nonya nerimo ri’emanwa eria. Narende rituko riria rinene ri’Epasaka koreng’ana nemeroberio eria yachigetwe. 13Korende omonto ochenegete gose o takari aare ase orogendo, oretange tarenda rituko ri’Epasaka, omonto oyio naatananwe korwa ase abanto baye, ekiagera ere tarenteti okoruegwa kwaye ase Omonene ase engaki eria echikire. Okomocha kw’ebibe kw’omonto oria nkobe igoro yaye.
14“Onye omomenyi omenyete ase egati yaino bwanchete koria Epasaka y’Omonene nigo arakore koreng’ana nemeroberio eria yachigetwe. Mobe nogochika okomo ase omomenyi na ase omobiare.”
Riire igoro y’Obomenyo Obochenu
(Okong’ 40:34–38)
15Ase rituko erio Obomenyo boria Obochenu bwatenenetigwe, riire rigatuba Obomenyo obwo, engencho yaye Eema y’Oborori.
Na korwa mogoroba goika mambia riire riria rikarorekana rire buna omorero. 16Naboigo riire riagendererete botambe gotuba Obomenyo boria Obochenu; ase obotuko rirorekana rire buna omorero. 17Ekero kende gionsi riire riria riarenge koimokerera igoro korwa ase Eema eria, erio Abaisraeli nigo barenge komanora, bachaka orogendo rwabo. Na aase riire riria riarenge gotenena, aroro agwo nao Abaisraeli barenge gotoora. 18Ase ogochika kw’Omonene nigo baare gochaka orogendo, na ase ogochika kwaye nigo baare gotoora. Engaki yonsi riire riria riagendererete kobeera igoro ase Obomenyo boria, abanto nigo baare kogenderera kobeera ase egetwori. 19Onye riire riria riarenge kobeera igoro ase Obomenyo boria amatuko amange, Abaisraeli nigo baigwerete Omonene, na barabwo tibarenge komanora kogenda. 20Ase chingaki chinde riire riria nigo riarenge kobeera igoro ase Obomenyo boria amatuko amake oka. Buna Omonene achigete, abanto nigo baare kobeera ase egetwori, naende ekero Omonene arenge kobachika, bachaka kogenda ase orogendo rwabo. 21Chingaki chinde riire riria nigo riarenge kobeera igoro ase Obomenyo boria korwa mogoroba goika mambia rioka. Ekero kende gionsi riire riarenge koimokerera igoro, abanto nigo barenge gochaka orogendo rwabo. Onye riarenge kobeera agwo omobaso na obotuko goika ekero riarenge koimokerera igoro naende, abanto nigo barenge gochaka orogendo ekero ekio. 22Onye riire riarenge kobeera igoro ase Obomenyo boria amatuko abere, gose omotienyi oyomo, gose engaki entambe, Abaisraeli nigo barenge kobeera ase egetwori, tibarenge komanora kogenda, korende ekero riire riaimokereire igoro, barabwo nigo barenge gochaka orogendo. 23Buna Omonene arenge gochika nigo barenge gotoora, batiga orogendo, gose baimoka bachaka orogendo. Bakaba bakoigwera Omonene buna achigete goetera ase Musa.
Currently Selected:
OMOBARO 9: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
