OMOBARO 8
8
Okobekwa gwe chitaya
1Omonene agakwana na Musa, akamotebia, 2“Tebia Haroni ng’a, ekero arabeke chitaya isano na ibere ase ekebekerero gie chitaya, achibeke erinde chimoreke gochia bosio.” 3Haroni agakora bo, akabeka chitaya echio, erinde chimoreke gochia bosio bw’ekebekerero ekio, buna Omonene achigete Musa. 4Ekebekerero gie chitaya na enterekerero yaye, amo nemegwekano yaye y’ebisicha nigo biaroisirie korwa ase chitahabu chiturire. Nabo Musa aroisetie ekebekerero ekio buna Omonene konya amochikire.
Abalawi bagwatananwa na gochenwa
5Omonene agatebia Musa, 6“Atanana Abalawi korwa ase Abaisraeli na obachene. 7Ekero okobachena nigo orakore iga: Onyororokie amache ’ogwesibia igoro yabo, na barabwo bakigite emebere yabo yonsi na basibie chianga chiabo. Erio babe bachenekire. 8Naende barente eeri ensae amo nokoruegwa kw’endagera kw’obosie obonuke bwochoganirie namaguta. Naye oire eeri ende ensae ebe ekeng’wanso ki’ebibe. 9Osangererie omoganda bwonsi bw’Abaisraeli na orente Abalawi agwo bosio bw’Eema y’Omosangererekano. 10Ekero kwarentire Abalawi ase obosio bwane, inche Omonene, Abaisraeli goika babeke amaboko abo igoro ase emetwe yabo. 11Naende Haroni arente Abalawi ase obosio bwane, babe buna ekeng’wanso ki’ogosungusigwa korwa ase Abaisraeli. Naboigo Abalawi baatananwe, babe ekeegwa ase ogonkorera inche Omonene. 12Nyuma yaye Abalawi goika babeke amaboko abo igoro ase emetwe ye chieri chiria, naye orusie eeri eyemo ebe ekeng’wanso ki’ebibe, na eyende ebe ekeng’wanso ki’ogosambwa asende inche Omonene, na igo okore okobwatanigwa ase Abalawi.
13“Obeke Abalawi babe bagokonya Haroni na abamura baye, obaatanane babe buna ekeng’wanso ki’ogosungusigwa asende inche Omonene. 14Ase enchera eyio obaatanane Abalawi korwa ase Abaisraeli, barabwo mbabe abaane. 15Ekero kwabachenire na kobaatanana babe buna ekeng’wanso ki’ogosungusigwa, barabwo basoe ase Eema y’Omosangererekano babe bagokora emeremo aroro. 16Barabwo baruegwe kegima korwa ase Abaisraeli babe abaane, ekiagera nabachorire ribaga ri’abana abatangi b’Abaisraeli. 17Abana abatangi bonsi b’Abaisraeli nabaane, ne ching’iti chintangi boigo. Rituko riria naitete abana abatangi bonsi amo ne ching’iti chintangi ase ense ya Misiri, nigo neatananerete abana abatangi b’Abaisraeli amo ne ching’iti chintangi. 18Na bono nachorire Abalawi babe abaane ribaga ri’abana abatangi bonsi b’Abaisraeli. 19Narure Abalawi babe ekeegwa ase Haroni na abamura baye korwa ase Abaisraeli, erinde bakore emeremo ase engencho y’Abaisraeli, agwo ase Eema y’Omosangererekano. Boigo bakore okobwatanigwa asebare, erinde nintange amaakwa tabanyora ekero bagoika ang’e n’Aase Aachenu.”
20Naboigo Musa, na Haroni, amo nomoganda bwonsi bw’Abaisraeli bakaba bagokorera Abalawi. Abaisraeli bakabakorera kera ring’ana Omonene konya achikire Musa babakorere. 21Abalawi bagechena korwa ase ebibe na bagasibia chianga chiabo, na Haroni akabaatanana bakaba buna ekeng’wanso ki’ogosungusigwa ase obosio bw’Omonene, naende agakora okobwatanigwa asebare, na kobachena. 22Nyuma y’ayio Abalawi bakagenda ase obokoreri bwabo ime ase Eema y’Omosangererekano inse y’oborendi bwa Haroni na abamura baye. Buna Omonene konya achikire Musa igoro y’Abalawi nabo Abaisraeli babakorerete.
23Omonene agakwana naende na Musa, akamotebia, 24“Eye nero emeremo y’Abalawi: Abwo bakoorire emiaka emerongo ebere na etano, na goetania, nigo barabe bagokora emeremo ase Eema y’Omosangererekano. 25Ekero bakoorire emiaka emerongo etano batige batimoke korwa ase emeremo eria. 26Barabwo mbabe ne ribaga ri’ogokonya baria bamwabo bare abakoreri ase Eema y’Omosangererekano, korende tibabaisa gokora emeremo eyio abanyene. Naboigo oraroberie Abalawi ase emeremo yabo.”
Currently Selected:
OMOBARO 8: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
