MATAYO 10

Ogotomwa kw’abatomwa baria ikomi na babere, na amarieta abo

(Mar 3:13–19; Luk 6:12–16)

1Yeso akarangeria aborokigwa baye ikomi na babere bache asare, akabaa okobua ase ebirecha ebibe na kobiseria, na kogwenia amarwaire onsi na oboreu bwonsi. 2Na amarieta abo baria ikomi na babere naro aya: Oyo bwe ritang’ani, Simion, oyokorokwa Petero, na Anderea momura omwabo; Yakobo, omwana o Zebedi na Yohana momura omwabo; 3Filipo na Baritholomayo; Tomas na Matayo, omorusia ebango; Yakobo bw’Alufayo na Tadayo; 4Simion, oyomo bw’Abazelote, na Yudas Iskariota, nere oyo omoruete.

Emeremo y’abatomwa

(Mar 6:7–13; Luk 9:1–6)

5Aba ikomi na babere Yeso akabatoma, akabachika, “Timogenda enchera ende yonsi y’abanto b’Ebisaku, nonya nomochie bw’Abasamaria timosoa onde bwonsi, 6korende mbuya mochiere ching’ondi chinsiru chi’enyomba ya Israeli. 7Na inwe ase okogenda kwaino, randia, motebe: Oboruoti bwa igoro bwaikire ang’e. 8Abarwaire bagwenie, abakure babokie, abare noborwaire bwa ukoma basibie, na ebirecha birusie. Mwaeirwe bosa, nainwe karue bosa. 9Timobogoria chitahabu, gose chifeta, gose chitaai ase ebimoya biaino. 10Gose esaro ase orogendo, gose chianga ibere, gose ebikoroto, nonya nenyimbo, ekiagera omokori emeremo nagwenerete endagera yaye. 11Na omochie onde bwonsi morasoe, na agachie gonsi, morigie ning’o ogwenerete aroro, mobeere nere goika moruo. 12Ekero mogosoa enyomba eria, yekwanie. 13Onye enyomba eria egwenerete, tiga omorembe oino oyeikere; ko onye tegwenereti, omorembe oino nobairanere inwe. 14Onye onde tari orabaroisie inwe, gose koigwa amang’ana aino, kamokorua enyomba eria gose omochie oria, mokong’onteo orotu rw’amagoro aino. 15Nekeene nabatebirie: Nebe aororo ase Sodomu na Gomora ase rituko ri’ekina kobua ase omochie oria.

Ogochandwa kw’aborokigwa ba Yeso

16“Rigereria, nabatomire inwe buna ching’ondi gati‐gati ye chisese chi’orosana. Ase ayio mobe abang’aini buna ching’iti, na abororo buna amaruma. 17Inwe mwerende ase mwanyabanto, ekiagera barabwo nababaire ase ebigambero, babang’wanie emecharichi ase chisinagogi chiabo. 18Na inwe namoirwe ase abagavuna na ase abaruoti ase engencho yane, koba kirori asebare na ase abanto b’Ebisaku. 19Ekero bakobaira, timoichana buna mogochia koiraneria, gose eki mogochia gokwana, ekiagera ase ekero keria inamoegwe aya morakwane; 20naki tari inwe morakwane, korende n’Omoika o Iso oino orakwane goetera ime yaino. 21Na momura omwabo omonto narue oyomwabo, erinde aitwe, na ise nomwana oye, na abana nabaimokere abaibori babo babaite, 22na inwe namogechwe nabanto bonsi ase engencho y’erieta riane, korende oyoraremererie goika omoerio, oyio natooreke. 23Ekero barabwo barabachande ase omochie oyomo, motame gochia ase oyonde; nekeene nabatebirie: Timogokoora emechie y’Abaisraeli Omwana‐o‐mwanyabanto ataracha.

24“Omworokigwa tari omonene kobua omworokia oye, gose omosomba tari omonene kobua omonene oye. 25Yamoisanire omworokigwa koba buna omworokia oye, na omosomba buna omonene oye. Inee! Onye barogete omonyene enyomba Beelizebuli, tibakoroka baria b’enyomba yaye bo kobua ere?

Oyogwenerete koirokwa

(Luk 12:2–9)

26“Ase ayio, timoiroka baria, ekiagera ing’ana rinde tiriri rimumekeirie ritache koorokigwa, gose eribisekanete ritache komanyekana. 27Eri nkobatebia ase omosunte ime, ritebe ase omobaso; na eri mokoigwa rikomonyererwa, rirarie igoro ase ebirama. 28Timoiroka abagoita omobere, abatanyare goita omoyo; kobua moiroke oyo oranyare goita omobere na omoyo ase omorero o kare na kare. 29Inee! Chinchiro ibere tichiri koonigwa ase ebesa eyemo? Naende nonya nakamo kabo tigakogwa inse, Iso oino atancheti. 30Korende nonya nechitukia chi’emetwe yaino chionsi chiabarirwe. 31Ase ayio, timoiroka; inwe imobuete rigori rie chinchiro chinyinge. 32Naki kera omonto oranyatore ase mwanyabanto, nainche boigo nimwatore ase Tata one ore igoro, 33korende oyorankane ase mwanyabanto, nainche nimokane ase Tata one ore igoro.

Ogochorwa ogokong’u na eng’eria yaye

(Luk 12:51–53; 14:26–27)

34“Timokaga ng’a nigo nachire korenta omorembe ase ense; tincheti korenta omorembe, korende omoro bw’esegi. 35Eke nacheire nakio eke: nogwatanana omonto na ise, omwana omoiseke na ng’ina, na moka momura na ng’ina biara. 36Na abanto b’enyomba y’omonto inababe ababisa baye. 37Oyo bwanchete ise gose ng’ina kombua, oyio tangwenereti, na oyo bwanchete omwana oye omomura gose omoiseke kombua, oyio tangwenereti. 38Na oyo otabogoreti omosalaba oye na gontunyana, tangwenereti. 39Oyorarigie koegera obogima bwaye nabosirie, na oyorasirie obogima bwaye ase engencho yane nabonyore.

40“Oyobanchire inwe, onyanchire na inche, na oyo oranyanche inche, omwanchire ere oyontomete. 41Oyobwanchire omobani ekiagera ere nomobani, nanyore eng’eria y’omobani; na oyo bwanchire omonto omoronge ekiagera ere nomonto omoronge, nanyore eng’eria y’omonto omoronge. 42Naki onde bwensi oramoe oyomo obo bw’aba abake amache amakendu negekombe ekiagera ere nomworokigwa, nekeene nabatebirie: Tagosiria eng’eria yaye nonya ng’ake.”

Currently Selected:

MATAYO 10: EKEGUSIIBBLE

Highlight

Copy