MATAYO 11

1Ekero Yeso akoorire gochika aborokigwa baye ikomi na babere, akaimoka korwa aria, akagenda kworokereria na korandia ase emechie yabo.

Yohana Omobatisi

(Luk 7:18–35)

2Ekero Yohana achia koigwa aaria ase echela ebitage bia Kristo, agatoma aborokigwa baye komoboria, 3“Aye naye oria ogocha, gose toganye omoao?” 4Yeso akabairaneria, akabatebia, “Genda motebie Yohana ayamwaigwa na ayamwarora: 5Abarenge emeuko nkorora bare, abarenge amagata ngotaara bare, abarenge noborwaire bwa ukoma basibekire, abarenge emetino nkoigwa bare, abare ebitondo nkobokigwa bare, na abataka nkoranderigwa bare amang’ana amaya. 6Nasesenirie onde bwensi otagochiri nainche.”

7Na ekero bachia kogenda, Yeso agachaka gokwana nemeganda igoro ya Yohana, “Inki mwachiete korora aria ase erooro? Negetonto gekonyegerigwa nembeo? 8Gose inki mwachiete korora isiko? Omonto bweboyetie chianga chinterere? Rigereria, abakweboyia chianga chinterere nigo bamenyete ase chinyomba chi’abaruoti. 9Nase ki rende mwachiete isiko? Korora omobani? Ee, nabatebirie, oyore omonene kobua omobani. 10Naki oyio nere amang’ana aya arikire igoro yaye:

“Rigereria, natomire omotomwa one ase obosio bwao,

oyo oratang’ane koroisia enchera yao!

11Nekeene nabatebirie inwe ng’a ase baria baiboire nabakungu, mobani onde taratoka ore omonene kobua Yohana Omobatisi; korende oyore omoke ase oboruoti bwa igoro nomonene komobua. 12Korwa amatuko a Yohana Omobatisi goika bono oboruoti bwa igoro nigo bogosogwa ne chinguru, na abwo abanyanguru nigo bakobosoa ne chinguru. 13Naki ababani bonsi mbabanete, na amachiko boigo, goika ekero kia Yohana. 14Na inwe onye morigetie gwancha, ere nere Elija otebetwe ore gocha. 15Oyore namato akoigwera, tiga aigwe.

16“Korende inaki ndagwekanie ekegori eke? Nkegwekaine nabana baikaransete ase chichiiro, bakorangeria abagisangio babo, bagoteba, 17Twababugeirie ebiroria, na inwe timotengeti; tweumirie, na inwe timorereti. 18Naki Yohana nigo achete, tare koria gose tare konywa: bagateba; Nare nekerecha. 19Omwana‐o‐mwanyabanto nigo achete okoria na konywa, na barabwo bagoteba: Rora, ere nomonto omoribobe na oyogotinda edivai, omosani bw’abarusia ebango na abanyene ebibe! Na obong’aini bwa Nyasae bwamanyekanire koba oboronge ase abana baye bonsi.”

Obobe bw’emechie eria etegenete

(Luk 10:13–15)

20Erio agachaka gotogonyera emechie eria, aase ebikone biaye ebinge bie chinguru biakorekire, ekiagera etaonchogete: 21“Obobe nobwao, Korasin! Obobe nobwao, Bethisaida! Ekiagera onye mbiakoregete ase Turo na Sidoni ebikone bie chinguru ebiakoregete asemore, abanto b’aroro, anga mbaonchogete kare na kobeka chianga chie chigunia, na kweaka ribu. 22Korende nabatebirie inwe, nebe aororo ase Turo na Sidoni ase rituko ri’ekina kobua asemore. 23Naye Kapernaumu, noimokererigwe igoro? Noche goikigwa goika Eora y’Amakweri, ekiagera onye ebikone bie chinguru ebiakoregete asore mbiakoregete ase Sodomu, nanga omochie oyio noteneine goika rero. 24Korende nabatebirie inwe ng’a nebe aororo ase ense ya Sodomu ase rituko ri’ekina kobua asore.”

Okoba buna omwana omoke

(Luk 10:21)

25Ase ekero keria Yeso agakwana, “Nakobakire aye Tata, Omonene o igoro na ense, ng’a kwabisire amang’ana aya ase abare nobong’aini ne chisemi, na kwayamaanoire ase abana abake. 26Ee, Tata, oko nakwo kwarenge ogwancha kwao okuya.

Obotomwa bwa Yeso omonyene

(Luk 10:22)

27“Naeirwe ebinto bionsi na Tata one; monto onde tari omomanyete Omwana otatiga Tata; na onde tari omomanyete Tata otatiga Omwana, na onde bwensi Omwana agochora komoorokeria. 28Inchuo asende inwe mwensi aba mwarosigwe ase emeremo emerito, na abwo mwabunekire ne chigurube, na inche nimbatimokie. 29Bogoria rikorogoto riane, mwegere asende, ekiagera inche nomwororo na omoitongo ase enkoro, na inwe namonyore ogotimoka ase emioyo yaino, 30ekiagera rikorogoto riane neriororo, na egurube yane nengusu.”

Currently Selected:

MATAYO 11: EKEGUSIIBBLE

Highlight

Copy