MATAYO 9

Okogwenigwa kw’omonto orenge rigata

(Mar 2:1–12; Luk 5:17–26)

1Agasoa obwato, akaamboka, agaika omochie oye. 2Na rigereria, bakamorentera omonto orenge rigata, oraire borere; na Yeso, ekero achia korora okwegena kwabo, agatebia oria rigata, “Remia enkoro, omwana one, ebibe biao biabeirwe.” 3Na rora, abande ase aborokia b’amariko bakabora ase emioyo yabo, “Omonto oyo nkorama are.” 4Yeso namanyete ebirengererio biabo, akababoria, “Nase ki inwe mokorengereria ebirengererio ebibe ase chinkoro chiaino? 5Ndiriri rire eriango, goteba: Ebibe biao biabeirwe, gose goteba: Imoka ogende? 6Korende monyare komanya ng’a Omwana‐o‐mwanyabanto nare nokobua ase ense gw’okwabera ebibe.” Erio agwo agatebia oria orenge rigata, “Imoka, bwetweke oborere bwao, ogende bwoo.” 7Akaimoka, akagenda bwoye. 8Emeganda egachia korora aya, bakooboa, bakamotogia Nyasae, oyoete mwanyabanto okobua konga buna oko.

Okorangerigwa kwa Matayo

(Mar 2:13–17; Luk 5:27–32)

9Ekero Yeso achia goeta korwa aroro akarora omonto oyomo okorokwa Matayo, oikaransete aase bakobangerwa ebango, akamotebia, “Ntunyana!” Akaimoka, akamotunyana.

10Ekero Yeso aikaransire nyomba koragera, rora, abarusia ebango abange amo nabanyene ebibe bagacha, bagaikaransa amo na Yeso na aborokigwa baye. 11Ekero Abafarisai bachia korora aya, bakaboria aborokigwa baye, “Nase ki omworokia oino akoria amo nabarusia ebango na abanyene ebibe?” 12Agachia koyaigwa, akabatebia, “Abare buya tibari korigia omorwaria, otatiga abarwarete. 13Genda mweorokererie engencho yaye ninki: Inche nigo ndigetie amabera, gose tari ekeng’wanso. Naki tincheti korangeria ababoronge, korende abanyene ebibe.”

Riborio igoro y’okweng’ata

(Mar 2:18–22; Luk 5:33–39)

14Ekero ekio aborokigwa ba Yohana bakamochiera, bakamoboria, “Nase ki intwe na Abafarisai tokweng’ata ekero ase ekero, ko aborokigwa bao tibari kweng’ata 15Yeso akabatebia,” “Inee! Abarangerigwa b’enyangi inabanyare korera ekero omonyuomi are amo nabarabwo? Korende amatuko nache, barache kourwa omonyuomi; erio nario barache kweng’ata. 16Onde tari okobeka ekeraka ki’egetambaa ekeyia ase eanga engotu, ekiagera keria kiabekwa nigo kegotandora eanga eria, na ase yatandogete ake nigo ekona‐gochiererera. 17Gose onde tari okobeka edivai enyia ase ebirandi ebigotu biroisirie korwa ase amasankwa. Eise kobekwa bo, ebirandi biria nigo biratandoke, na edivai eiteke, na ebirandi bisareke; korende edivai enyia nigo ekobekwa ase ebirandi ebiyia, bionsi bibere biasirana.”

Omoiseke o Yairo na omokungu ore noborwaire bw’okorua amanyinga bakogwenigwa

(Mar 5:21–43; Luk 8:40–56)

18Ekero Yeso are gokwana aya, omonene oyomo agacha, akabeka amaru inse asare, okobora, “Omwana one omoiseke okure bono iga, korende inchuo aye, omobekere okoboko, na ere nabe moyo.” 19Yeso akaimoka agatunyana omonto oria, ere na aborokigwa baye. 20Na rora, omokungu oyomo oyorenge noborwaire bw’okorua amanyinga ase engaki y’emiaka ikomi na ebere, akamochiera korwa nyuma, agakuna omokoba bw’eanga yaye. 21Igo arengereretie ase omoyo oye ime, “Inse gokuna eanga yaye, ningwene.” 22Yeso akeonchora, akamorora, akamotebia, “Moiseke one, remia enkoro; okwegena kwao gwakogwenirie.” Omokungu oria akagwena erio kegima. 23Yeso agachia gosoa enyomba y’omonto oria omonene, akarora abakobugia ebiroria, na abanto abasangererekaneteo bakorera. 24Akabatebia, “Karuo aa! Omoiseke oyo takweti, okorara araire gwoka.” Bakamosekerera. 25Korende ekero baria basangererekanete amo basogetigwe isiko, agasoa ime, akamobwata okoboko, na omoiseke oria akaimoka. 26Amang’ana aya agasarera ase ense eria yonsi.

Abanto babere emeuko bakogwenigwa

27Ekero Yeso arenge goeta korwa aase aria, abanto babere abarenge emeuko bakamotunyana, bagaaka eriogi, bakabora, “Tororere amabera, aye omwana o Daudi!” 28Yeso agachia gosoa nyomba, baria barenge emeuko bakamochiera. Yeso akababoria, “Inee! Mwegenire ng’a inche ninyare gokora ring’ana eri?” Bakamotebia, “Ee, Omonene.” 29Erio agwo agakuna amaiso abo, akabatebia, “Koreng’ana nokwegena kwaino abe asemore.” 30Amaiso abo akaramokigwa. Yeso akabachika bokong’u, “Rigereria monto onde tabaisa komanya amang’ana aya.” 31Korende barabwo bagasoka isiko, bagasareria amang’ana aye ase ense eria yonsi.

Omonto orenge rimama, naende obwatire nekerecha

32Ekero bachia gosoka isiko, rora, abanto bakamorentera omonto orenge rimama, naende igo abwatire nekerecha. 33Ekero ekerecha giachia goserigwa, omonto oria rimama agakwana. Emeganda egakumia, ekabora, “Tana kororekana nonya ng’ake ase Abaisraeli amang’ana anga buna aya.” 34Korende Abafarisai bakabora, “Nigo agoseria ebirecha ase chinguru chi’omonene bw’ebirecha.”

35Yeso agaetanana emechie yonsi na ebichie, okworokereria ase chisinagogi chiabo, okorandia amang’ana amaya ay’oboruoti na kogwenia amarwaire onsi na oboreu bwonsi.

Yeso okororera abanto amabeebe

36Agachia korora emeganda y’abanto, akabarorera amabeebe, ekiagera konya bachandekire, baserebekanire buna ching’ondi chitari nomorisia. 37Erio agatebia aborokigwa baye, “Rigesa nerinene, korende abakori emeremo nabake; 38gaki mosabe Omonene bwe rigesa atome abakori emeremo ase rigesa riaye.”

Currently Selected:

MATAYO 9: EKEGUSIIBBLE

Highlight

Copy