MATAYO 8

Okogwenigwa kw’omonto orenge noborwaire bwa ukoma

(Mar 1:40–45; Luk 5:12–16)

1Ekero Yeso achia gotirimboka korwa ase egetunwa igoro, emeganda emenge ekamotunyana. 2Rora, omonto orenge noborwaire bwa ukoma akamochiera, akamotung’amera, akamotebia, “Omonene, onye ngwancha nonyare gonsibia.” 3Yeso akarambora okoboko kwaye, akamokuna, akamotebia, “Nanchire; sibeka.” Erio agwo oborwaire bwaye bwa ukoma bogasibigwa. 4Yeso akamotebia, “Rigereria, totebia monto onde ing’ana; korende genda, bweorokie ase omokuani, orue ekeng’wanso egiachigetwe na Musa, erinde kebe kirori ase abanto.”

Omosomba bw’omotang’ani bw’abarwani rigana okogwenigwa

(Luk 7:1–10)

5Naende agachia gosoa Kapernaumu, omotang’ani bw’abarwani rigana akamochiera, akamosorora, 6agateba, “Omonene, omosomba one nyomba araire, oborwaire bomogataetie, akoromwa mono.” 7Yeso akamotebia, “Ninchiche komogwenia.” 8Oria omotang’ani bw’abarwani rigana akamoiraneria, “Omonene, inche tinyisaini aye orasoe inse y’ekerama kiane; korende kwana ring’ana rioka, na omosomba one nagwene. 9Naki inche nomonto inde inse ase okobua, naende ninde nabarwani inse asende. Kondatebie oyo: Genda, ogenda; na oyonde: Inchuo, ocha; na omosomba one: Kora iga, okora.” 10Ekero Yeso amoigwa agakumia, agatebia abamotunyanete, “Nekeene nabatebirie: Nonya nase Abaisraeli tindanyora okwegena okore buna oko. 11Nabatebirie ng’a abange nabache korwa moocha na bosongo, nabaikaranse amo na Ibrahimu, na Isaka, na Yakobo, ase oboruoti bwa igoro, 12korende abana b’oboruoti nabatugutwe isiko ase omosunte; na aroro abanto mbabe nekerero na okoriania amaino.” 13Yeso agatebia omotang’ani oria bw’abarwani rigana, “Genda bwoo, nabe asore koreng’ana nokwegena kwao.” Omosomba oria akagwenigwa ase ekero keria.

Yeso okogwenia ng’ina biara Petero na abande abange

(Mar 1:29–34; Luk 4:38–41)

14Ekero Yeso asoete nyomba mwa Petero, akarora ng’ina biara Petero oraire, orwarete esosera. 15Akamokuna okoboko kwaye. Esosera ekamotiga, na ere akaimoka akamokorera. 16Riachia koba mogoroba, bakamoirera abanto abange ababwatire nebirecha, na ere akarusia ebirecha ase ring’ana, na bonsi abarenge abarwaire akabagwenia; 17rinyare goikerana eriatebetwe nomobani Isaya, ogoteba, “Ere akaimokia oboreu bwaito, na akabogoria amarwaire aito.”

Amateemwa ase abwo barigetie koba aborokigwa

(Luk 9:57–62)

18Bono ekero Yeso achia korora emeganda emenge yamoetananire, agachika ng’a baimoke korwa aroro bagende ng’umbu. 19Omworokia bw’amariko oyomo akamochiera, akamotebia, “Omworokia, ningotunyane aande onsi ase okogenda.” 20Yeso akamotebia, “Ebibwe mbire namakuruma, ne chinyoni chia igoro nchire nebiswa, korende Omwana‐o‐mwanyabanto tari naase akobeka omotwe oye.” 21Na oyonde ase aborokigwa baye akamotebia, “Omonene, ritang’ani ing’a ribaga ngende gotindeka tata.” 22Korende Yeso akamotebia, “Ntunyana, tiga abakure batindeke abakure babo.”

Yeso ogotoereria omwaga

(Mar 4:35–41; Luk 8:22–25)

23Ekero achia koriina obwato, aborokigwa baye bakamotunyana. 24Rora, omwaga omonene okaimoka ase enyancha, goika obwato bogatubwa nemerindo; korende ere konya orarire. 25Bakamochiera, bakamotura, bakamotebia, “Omonene, totoorie, ngosira tore!” 26Akabatebia, “Naki mokwoboa, inwe abamore nokwegena ogoke?” Erio akaimoka, agatogonyera omwaga na enyancha; gokaba ogotoerera okonene. 27Abanto baria bagakumia, bagateba, “Monto ki oyo, nonya nomwaga na enyancha bikomoigwera?”

Ebirecha biabwatete Abageraseni

(Mar 5:1–20; Luk 8:26–39)

28Ekero achia goika ng’umbu y’ense y’Abageraseni, abanto babere ababwatire nebirecha bakaumerana nere, na barabwo nigo baare korwa ase chimbeera, nigo barenge abatindi mono, goika monto onde tarenge konyara goeta enchera eria. 29Na rora, barabwo bagaaka eriogi bakabora, “Inaki intwe tore naye, Omwana o Nyasae? Inee! Ngwachire aiga gotoita ekero engaki etaraika?” 30Riicho rie chimbeche chinyinge ndiarenge egeka, rikorisia. 31Ebirecha biria bikamosorora, bikabora, “Onye kogotorusia aa, rirorio toe ribaga tosoe ase riicho rie chimbeche.” 32Akabitebia, “Genda!” Bigasoka, bigasoa ase chimbeche. Na rora, riicho rionsi rigatirimboka, rigasoa enyancha ime, rigasirera aroro. 33Na abarisia bagatama, bakagenda omochie bakararia amang’ana onsi ayakoregete ase baria babwatire nebirecha. 34Na rora, abanto bonsi b’omochie oria bakagenda koumerana na Yeso; bagachia komorora, bakamosorora arue ensemo yabo.

Currently Selected:

MATAYO 8: EKEGUSIIBBLE

Highlight

Copy