MATAYO 7

Igoro y’okogambia abande

(Luk 6:37–38,41–42)

1“Timogambia, nainwe timokogambigwa. 2Naki ekina mokonacha, nakio morache konacherwa. Na ekerengo keria mokorengera, nakio morache korengerwa. 3Inaki okorigereria ekeogoto kere ase eriso ri’oyomino, na omoribo ore ase eriso riao ime toyorochi? 4Gose naki oratebie oyomino: Ntige nkorusie ekeogoto kere ase eriso riao, na rora omoribo nore ase eriso riao? 5Aye omong’ianereria, rusia ritang’ani omoribo ore ase eriso riao, nario orarore buya omanye korusia ekeogoto korwa ase eriso ri’oyomino.

6“Timoa chisese ekere egechenu, gose timoitera chiruru chiaino ase chimbeche, tichicha gochitacha namagoro abo, naende chibaonchokere inwe, chibaare.

Okoa omoyo bw’ogosaba

(Luk 11:9–13)

7“Saba, namoegwe; rigia, namonyore; tura, namoigorerwe. 8Ekiagera kera oyogosaba nigo akoegwa, na ere oyokorigia nigo akonyora, na ere oyogotura nigo akoigorerwa. 9Gose monto onde nare asemore, na omwana oye amosabe omogati, Inee, namoe rigena? 10Gose karamosabe enswe, namoe eng’iti? 11Onye inwe, abamore ababe, momanyete koa abana baino ebiegwa ebiya, Inee, Iso oino ore igoro takomenta mono kobaa amaya abwo bakomosaba?

Ogochika okore okuya mono

(Luk 6:31)

12“Nabo ande onsi morigetie abanto babakorere inwe, nainwe mobakorere bo. Ekiagera ayio naro amachiko na amang’ana ’ababani.

Chinchera ibere

(Luk 13:24)

13“Soa ase egesieri kere ekegote, ekiagera egesieri gekogenda ase obosiru nekegare, na enchera ekogendao nengare, na abagosoa gochiao nabange. 14Korende egesieri gekogenda ase obogima nekegote, na enchera ekogendao nenyerere, na abakoyenyora nabake.

Ekeene na oborimo

(Luk 6:43–44)

15“Mwerende nababani b’oborimo abwo bagocha asemore beboyetie chingobo chie ching’ondi, na ime yabo nigo bare chisese chi’orosana chikoria kegima. 16Ase amaamo abo namobamanye. Inee! Abanto nigo bagotwa amasabibu korwa ase emetobo, gose amako korwa ase amageri? 17Naboigo kera omote omuya nigo okwama amatunda amaya, na omote omobe nigo okwama amatunda amabe. 18Omote omuya tokonyara kwama amatunda amabe, na omote omobe tokonyara kwama amatunda amaya. 19Kera omote otameti amatunda amaya nigo okogechwa, otugutwa ase omorero. 20Naboigo, nase okwama kwabo morabamanyere.

Amang’ana na ogokora

(Luk 6:46; 13:25–27)

21“Tari kera omonto ogontebia: Omonene, Omonene, orasoe ase oboruoti bwa igoro, korende noyogokora ogwancha gwa Tata one ore igoro. 22Ase rituko riria nabange barantebie: Omonene, Omonene, titware kobana ase erieta riao, na ase erieta riao goseria ebirecha, na ase erieta riao gokora ebikone bie chinguru ebinge? 23Erio nainche nimbatebie maiso marore abanto baria: Timbamanyeti inwe nonya ng’ake; karue asende, inwe abakori amabe!

Amaroso abere

(Luk 6:47–49; Mar 1:22)

24“Kera oyomo oyokoigwa amang’ana aya aane, na koyakora, nagwekanigwe nomonto orenge omong’aini, oagachete mwaye igoro ase egetare; 25embura egatwa amo nomwaga, na eooro egacha, egatwoma enyomba eria, korende tiyagwa, ekiagera oboroso bwaye bwaagachetwe igoro ase egetare. 26Na kera oyomo oyokoigwa amang’ana aya aane, go tayakora, nagwekanigwe nomonto omoriri, oagachete mwaye ase amaroba; 27embura egatwa amo nomwaga, na eooro egacha, bigatwoma enyomba eria, ekagwa; okogwa kwaye gokaba okonene.”

28Ekero Yeso akoorire amang’ana aya, emeganda egakumia ase okworokereria kwaye, 29ekiagera nigo arenge koborokereria buna oyore nokobua, na tari buna aborokia babo b’amariko.

Currently Selected:

MATAYO 7: EKEGUSIIBBLE

Highlight

Copy